Job 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1O’du azini anzi Mungunini emuzu yi e’dazu Yehova ma miliari eca vini dika. Satani emu vini indi yi ma eselia i e’dazu Yehova ma milia.

2Yehova ’yo Satani ma ria, Mi enga ngoa ya? Satani nga di e’yo omvi, ’yo Yehova ma tia kini, Ma ibi enga mani aciria ’dile ’dale nyaku ma dria, mani kelekele coria ’dale ’dole eri ma alia.

3Yehova nga ’yo Satani ma ria, Mi ega ati’bo mani Yobu ma e’yo ra ya? ’ba azini erile nyaku ma driani yo, eri ’ba e’yo kokoruri, ’ba kililiruni, ’ba Mungu rupi, i onapi e’yo onzisiri’i. Eri kuni nga e’yo ini kililiruri ku, ka tro mi fe ma enga eri ruaa eri dri jazu e’yo kokoru ti.

4Satani nga e’yo omvi Yehova ria, ’yo ra kini, Enyi enyi ma paria! Ada ’ba nga afa erini ovuzu yi be ’diyi ofe dria idri ini ma paria.

5Te mi eju mi dri curu’do, mi elo eri ma fala pi rua be, eri nga mi o’da kpere va mi milia ’dia.

6Yehova nga ’yo Satani ma ria, Mi ndre, ma fe eri mi dria; te kiri mi ma ku idri erini’i.

7’Dini Satani nga fu Yehova ma miliasi, nga Yobuni co apipi onzikanyarusi kurubu, engazu eri ma pa agelea kpere eri ma dri olubua.

8Eri nga ajirikolo ’du i rua fazu, nga di ri ofuta ma alia.

9Oku erini nga di ’yo eri ma ria kini, Ka adri ’dini, mi ebi mi e’yo mini kililiruri be ’dani ya? Mi o’da Mungu, mi dra di ani beni.

10Te eri ’yo eri ria, Mi ’yo ekile oku ondua kokoru ’diyi ma azini ’yolerile. Ngoni ya? Ama nga e’yo onyiru a’i Mungu dri lu’i, ama ngani e’yo ewaru a’i ku ya? E’yo ’diyi ma alia dria, Yobu ezani e’yo i tisi ku.

11Te di Yobu ma agyi na ’diyi ka e’yo onzi dria ecapi eri ma ruaari ma e’yo eri ra, yi dria alu alu enga yi ma ngulupi ma pariasi, Elifazi ’ba Temanini pi, Bilidadi ’ba Suhini pi, Zofari ’ba Naamatini pie. Yi otu e’yo yi eselia emuzu eri owuzu, azini asini omizu.

12Yi ka yi mile enga uru ziri, yi nini eri ku; yi nga di wu o’duko urusi; yi alu alu nga yi ma bongo ’beza asi ra, nga irifura omvu uru yi ma dria.

13’Dini yi ri va nyakua eri omvezu o’du aziri ini be rra, te ’ba aluni ’yoni e’yo azini eri ma ria ku, yini ndrele candi erini ovu amboru turisi.

← Chapter 1 Jump to: Chapter 3 →