Job 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1Yobu nga eli e’yo omvi, kini:

2Adaru, ma ni ra eri ’dini: te ’ba eco ovu kililiru Mungu ma milia ngoni ngoni ya?

3Eri ka le agata ga eri be, eri econi e’yo alu omvizaru eri tia zita alifu ma eselia ku.

4Eri onduaru asia, eri okporu tu -’ba i asi imbapi a’eli ’elizu eri be drileba isupi aniri a’eli’i ya?-

5eri adri oni ambo ambo ’eliyi o’du ji pari azinia, te yi nini e’yoni ku, erini yi oguria adra inisi;

6eri adri nyaku oya eri ma pariasi, agofe erini nga ani ya ya;

7eri e’yo azi etu ma tia, eri efuni ani ku; eri ’bi’bio opi ci;

8eri’i a’dule ’bu ajapiri, eri pa otu yi mirini ombupi ombu ’diyi ma dria;

9eri ’ba ’bi’bio ndu ndu, Leleo pi, Aseti pie, jo aliza kala uruleruria ’divi pie;

10eri adri e’yo amboru ’bani etini ndale ti ’diyi ’ye, ada, afa osutaru kakau lakokoru.

11Mi ndre, eri aga ma ageia, te ma ndreni eri ku; eri aga vini drile, te ma vani eri ku.

12Mi ndre, eri afa opa; te a’di eco eri ogazaruni ya? A’dini nga ’yo eri ma tia, Mi a’di ’ye ya-rini ya?

13Mungu ngani adra erini ma ti nze ku; ’ba Rahabu ma aza kopi ’diyi avu va eri ma palaa.

14Ka’dini ’ba maleri eco e’yo omvi eri tia ngoni ngoni, e’yo mani ngale ’yole eri be ’diyi opezu ya?

15Ma ka te tro ovu kililiru ti, ma econi te e’yo omvi eri tia ku; ma te lu matu ’ba ’ba e’yo mani lipiri vu’i.

16Ma ka ndra eri omve, ka ndra omvi mani ra, ti ma econi a’izaru kini eri ma o’duko eri ra, ’dini ku.

17Erini ma nyole oli okpoturisi, erini bile ezule ma ruaa e’yo kokorurisi;

18eri a’ini mani ava sezu ku, eri fe asi draza ga ma alia tre.

19Ka e’yo okponisi, mi ndre, eri okporu! Ka e’yo lizasi, te a’dini nga pa so ma aza kozuni ya?

20Ma ka tro ovu kililiru ti, ma ngulupi ma tini nga e’yo li ma ndezuni; ma ka tro ovu e’yo kokoru ti, eri nga ma e’da ’ba onzini.

21Ma e’yo kokoru; ma asini ma ngulupi ma e’yosi ku; ma ’ba idri mani aparakaru.

22Eri dria e’yo alurile; e’yo ’disi ma ’yo kini, eri ’ba kililiru ’diyi pi ma dri ja ’ba e’yo onzi be ’diyi pie tualu.

23Dra onzi ka ’ba fu rugburu, eri nga ’ba e’yo kokoruri ma candi gu gu.

24Fe angu wudrikuruni ’ba e’yo onzi ’yepi ’diyi ma dria ’bo; eri ’ba e’yo lipi alenia ’diyi ma mile a’bu cika eri’i yo, eri te bani a’di’i ya?

25Te o’du mani aga mbeleru aga ojio onzupi e’yo ojipiri ra; yi apa ra, yi ndreni e’yo onyiru ku.

26Yi aga ekile o’bo acipi mbeleru ’diyile, aji esipi hwi va za driarile.

27Ma ka ’yo ra, Ma drini nga awu mani ma e’yo avi ra, ma nga mile mani candiruri oja ra, ma nga ovu ayikosi,

28te ti ma ovu urisi candi mani ’diyisi dria, ma ni ra mi ngani ma la ekile ’ba e’yo kokorurile ku.

29Mi nga e’yo li ma ndezu; ka’dini ma ma ecandi toko a’disi ya?

30Ma ka tro ma oji yi sirurisi ti, ma ka tro ma dri oji alatararu sabunisi ti,

31te mi nga ma su yi geria, ma vile bongori nga ani ma ngu onzi.

32A’disiku Mungu ovuni ’ba ekile male, mani ani e’yo omvizu tiniani, amani efizu ani pari e’yo lizuria tualu ’dini ku.

33’Ba e’yo lipi ama eselia ecopi i dri ’bapi ama ruaa iri troni yo.

34Eri ma nze kali ini ma vurisi fo! E’yo erini uriuriruri ma fe mani uri ku.

35Ka’dini ma te nga e’yo ’yo, ma ngani di ’ye erisi urisi ku, te ma ngulupiruni ovuni ’dini ku.

← Chapter 8 Jump to: Chapter 10 →