Job 38

Lugbara (E’yo Siza Alatararu Munguniri BIBLIA)

← Chapter 37 Jump to: Chapter 39 →

1Yehova nga di e’yo omvi Yobu ma ria oli adropa’diriruri ma aliasi kini:

2’Ba e’yo amaza ojapi bizaru e’yo ’yole nita kokorurisi ’diri a’di’i ya?

3Mi a’di mi opile agupile; ma nga e’yo zi mi tia, mi olu di ma tia.

4Mani ndra nyaku ma eti ’baria, mi ndra ngoa ya? Mi olu di, mi ka ovu e’yo vaza be raria,

5A’di otu o’bizaniri ma e’yoni ya? -mi ka ni raria! A’di se baka eri ma driani ya?

6E’do etini o’ba a’di afa ma dria ya? A’di ’ba oni amboru kalatiarini ya,

7o’du ndra leleo piyini ongo ngozu tualu, Mungu anzipini otrezu ayikosirisi?

8A’di opi miri ma ti tikosi, erini ndra efuria okposi, ekile erini engale opojoarileni ya?

9Ewu mani ndra iriti edezu eri dri bongoru, azini ini iniciciruri edezu eri ma bongo odekua ombezurirurisi;

10o’du nde mani ndra azita mani azizu tinia, kalitile piyi o’bazu ringili berisi,

11mani ’yozu kini, Mi eco eca ’ dia ra, te mi ma aga drile ku, yi mini ombupi ombu afusi ’diyi ma asi ’dia.

12Mi azi e’yo o’biti dri, engazu mi o’duni e’dozurisi ra ya? Mi fe angu atizani i pari nizu mi’i ya?

13Eri ma la ani angu ma kalatini asizu ’diyi ra, ma oya ’ba azi onzi ’yepi ’diyi aleniasi beni.

14Eri nga i oja odri driadriamva eceta beri ma etiarile, afa dria nga efu yi e’dazu bongole.

15Oga diza diko ’ba azi onzi ’yepi ’diyi ma dria si, wu ejule ururi nyo i ra.

16Mi fi pari yi mirinirini adizu ’diyia ya? Kani yi aliru ma pari vutinia ele tu ’diyia ya?

17Ece mi dri kalitile draniri ’bo ya? Kani mi ndre dra ma endrilendri ma kalitile ra ya?

18Mi va wudrikuru ma wala ra ya? Mi olu e’yoni, mi ka ni dria raria.

19Geri mupi pari dizani ovuzuriari, ngoa ya? Kani vini inini, parini ngoa ya?

20Mini ani geri nde bizu kpere asiria, mini ani geri mupi kpere eri vile joa ’diyi nizu beni?

21Mi ega mi ni ada, mini ndra ovule osizaru ’bo ewu ’darisirisi, ’bari, o’du mini ma kalafe yi de kakau ka!

22Mi fi pari taluji ma ta mbazuria ya? Mi ndre vini pari si ta mbazu ’diyi ra ya?

23Mani tani mbale o’du candirurini ecazurisi, o’du omba pini a’di beria ’diyi.

24Diza co i esele geri ngosi ya? Oli engapi etuni efurialeruri ere i nyaku dria geri ngosi ya?

25A’di ga yi geri yi tipi tiri drini ya? Kani geri ovi gapi le leri dri,

26fezu ozooni ’dizu angu ’ba kokoria, angu roko dria ’bani ovuzu alenia yoria;

27fezu angu piriniri pini trazu angu andrururi be, fezu ase ibiruni engazu ani.

28Ozoo ma ati indi ya? A’di ti andrali otipi otirini ya?

29Si kongolokoru efu a’di ma opojoa ya? A’di ti angu ambiza ’bua anguni i ojazu ani emverurini ya?

30Yi mirini omba ekile onile, yi aliru ma mile omba kongolokoru egbesi.

31Mi eco ’bi’bio Nyunyumeru Vi okupi aziri ’diyi ombezare tualu ya? Mi eco Aseti ma baka tru ra ya?

32Mi eco ’bi’bio ecetaru ewu esele copi ’diyi ofu o’du yinisi ra ya? Mi eco ’bi’bio omvele Ngururi dri cezaru anzi be ra ya?

33Mi ni azita ’buni ’diyi ra ya? Mi eco fezu opi nyaza erinini pa sozu nyakua ra ya?

34Mi eco mi o’duko engazaru iriti azizu, yi ta papi cirini mi a’buzu beni ra ya?

35Mi eco ovi ma ti pezaru, yi ma mu ani ya? ’yozu mi tia kini, Ama ’do’i.

36A’di ’ba ondua iriti iniru ’diyi ma alia, a’di fe e’yo vaza ngaraka’diu drini ya?

37A’di eco iriti ma kalafe lazaru i ma onduasini ya? A’di eco imvu ozooni ’bua ’diyi ma ti elazaru,

38ewu irifurani yi etizu odriru, o’ditini yi ekpazu tualuria ya?

39Mi nga za nda kamiandri dri ya? Mi nga kamianziru ’diyi ma abiri inyu ra ya?

40yi ka la va yi ma ojia, ka te pari zizaru za mbazuria?

41A’di fe za koreke iniruri dri, anzi erini ka wu Mungu vu dri cizu nyakaakosiria ya?

← Chapter 37 Jump to: Chapter 39 →