Job 35

Lugbara (E’yo Siza Alatararu Munguniri BIBLIA)

← Chapter 34 Jump to: Chapter 36 →

1Elihu nga vini e’yo omvi kini:

2Mi ega ’diri eri e’yo kililiru miniri ya? Kani mi ’yo ra yani, kini, Ma kililiru aga Mungu ra;

3mini ’yole kini, Orodrini nga ovu mi dri ngoni ya?-risi, azini vini kini, Orodri mani ngale isuleri aga orodri mani te isule ma ka ndra eza rari ngoni ngoni ya?

4Ma nga e’yo omvi mi tia ra mi agyi ovupi mi be ’diyi pie.

5Mi lu ’bua, mi ndre; mi lu ’bu ovupi mi dria uru tu aga rari.

6Mi ka eza ra, mi Mungu ma ruaa a’di ’ye ya? Ezata mini ka yi ere drile drile ti, mi a’di ’ye eri vu ya?

7Mi ka ovu kililiru, mi eri dri a’di afa fe ya? Eri a’di afa a’i mi dria ya?

8E’yo onzi miniri eco ’ba mileri ezazaruni; e’yo kililiru miniri eco ’ba ori ma aza kozaru ra.

9’Ba yi otre inzatani ovule kakaurisi; yi wu aza koza ndazu ’ba okporu ma dri ma e’yosi.

10Te ’ba aluni ’yoni ku, kini, Mungu ma ’Bapi, ongo fepi ma dri ongozu Inisi,

11Mungu ama imbapi aga anyapa asea ’diyi ra, ondua fepi ama dri aga aria ’bua ’diyi dria rari ngoa ya?

12Yi owu ’dale ’da, te eri omvini e’yo ku, afu ’ba onzi ’diyinisi.

13Ada, Mungu ngani e’yo toko toko ’diyi eri ku, Okpoe’i ngani e’yo ’dinile ’diyi ega ku.

14Ka’dini mi ka ’yo ra mi ndreni eri ku, e’yo nderi ovu eri milia, mi eri te te, ’dini, eri nga e’yo mini eri ngoni ngoni ya!

15Te curu’do erini ’ba andrile adra erini ma alia kurisi, erini vini asi afuru ma e’yo egale tu tu kurisi,

16e’yo ’disi Yobu zi ani i tile e’yo toko toko ’diyi ’yozu, eri e’yo ’yoza ere drile drile kakau nita kokoru.

← Chapter 34 Jump to: Chapter 36 →