Job 34

Lugbara (E’yo Siza Alatararu Munguniri BIBLIA)

← Chapter 33 Jump to: Chapter 35 →

1Elihu nga vini e’yo omvi kini:

2Emi eri e’yo mani, emi’ba onduaru ’diyi la, emi co bile ma vu, emi nita be ’diyi;

3a’disiku bileni e’yo ’yoza ma aji o’bi ekile tileni nyaka ma aji o’bilerile.

4Ama ma ope ama dri e’yo kililiruri’i; ama ma ni ama eselia e’yo ovupi onyiruri.

5A’disiku Yobu kini, Ma kililiru, azini vini, Mungu ’du e’yo kililiru maniri ’bo;

6ka tro ma onyiru ti, la ma ekile ’ba inzo lipirile; ebi ma ruaari econi jazaru ku, ma ka tro ovu ezata kokoru ti.

7Agu Yobule edematara mvupi ’bani yi mvulerile,

8mupi ’ba azi onzi ’yepi ’diyi be tualu, acipi ’ba onziru ’diyi pieri a’di’i ya?

9Te eri ’yo ’bo kini, ’Bani ovuzu ayikosi Mungusiri feni ’ba dri orodri ku.

10E’yo ’disi emi eri e’yo mani, emi ’ba e’yo vaza be ’diyi, Mungu econi azi onzi ’yezaru ku, Okpoe’i econi e’yo onzi ’yezaru ku.

11Te eri nga arioti ofe ’ba dri azi erini vusi, eri nga fe ’ba drini e’yo isuzu trotro geri yini vusi.

12Ada, Mungu ngani e’yo ’ye onzi ku, Okpoe’i ngani e’yo li inzoru ku.

13A’di azi eri ovuzu nyaku ma driliani ya? A’di fe angu wudrikuru driani ovuzu eri ma driani ya?

14Eri ka asi ’bani omvi i vu, ka orindi ’bani pi oku i vu avani be,

15’ba rua ari be ’diyi dria nga dri ja tualu, ’ba yi nga ofu irifuraru dika.

16Mi ka e’yo va curu’do ra, mi eri ’di; mi eri e’yo mani ’yole ’diyi ma o’duko.

17’Ba e’yo kililiruri ngupi onziri nga angu nya ra ya? Mi nga ’ba kililiru azini okporuri ma e’yo li eri ndezu ra ya?

18’Yozu opi tia, Mi ’ba saaru, kani ’ba ’wara ’diyi ma tia, Emi onzi, ’diniri onyiru ya?

19Ka’dini ’yozu ’ba ’ba opiru ’diyi opepi ku, ’ba afa e’iru ma e’yo ’bapi drile aga ’ba alioruni kuri ma tia ’dinile eri onzi aga ra, yi driani ovule azi eri ma dri pamvunirisi.

20Yi odra mbelekocici, iniayii ’dia ’di, ’ba ma rua oya ra, yi aga mu ra, wu ’ba okporu ’diyi ra, te dri ’banisi ku.

21Eri ma mileni geri ’bani lulenirisi, erini geri yini muzuri ondrele driarisi.

22Angu iniru, kani dra ma endrilendri ’ba azi onzi ’yepi ’diyini ecozu yi zizu aleniani yo.

23’Dini leni eri ma ndru e’yo ’bani dika raka erini emuzu Mungu ma drilia fizu e’yo lizuria ndo, ’dini ku.

24Eri onyo ’ba okporu ’diyi ra geri ’bani nile kurisi, eri ’ba azini o’ba yi ma paria.

25E’yo ’disi eri ni ’yeta yini, eri ogu yi va inisi, nga ani dri ja ra.

26Eri o’di yi ekile ’ba azi onzi ’yepi ’diyile ’ba azini ma milia ayii,

27yini yi ojale kalaa, kuzu eri vuti bizu jarisi, yini lele geri erini ’diyi ma azi ma e’yo egale aluni kurisi,

28’dini yi fe alia ma wutani ecazu eri ma bilea, eri eri ’ba inzaleri ma awu ra-

29Eri ka asi anzuru fe ra, a’di eco e’yoni lizu onzini ya? Eri ka i mile zi, a’di eco eri ndrezaruni ya? kani suru ve, kani ’ba alu vu dria trotro.

30’ba Mungu inzipi kuri ma ce ani ’ba dri ku, ’ba aluni ma mba ’ba lokirisi ku beni.

31A’disiku ’ba azini ’yo Mungu ma tia ’dinile ra ya? kini, Ma isu imbata ’bo, ma ngani eza dika ku;

32mi ma imba ma afa mani ndrele kurisi; ma ka e’yo onzi ’ye ’bo ti, ma ngani eri ’ye dika ku.

33Afa ofeza erini nga ovu mini lelerile mini eri gale sirisi ya? Te mi ma pe mi’i, ma ’yo, e’yo ’disi mi ma ’yo e’yo mini nileri.

34’Ba e’yo vaza be ’diyi nga e’yo ’yo ma tia, ada, ’ba dria ondua be ma eripi ’diyi, kini:

35Yobuni e’yo ’yo nita kokoru, e’yo erini ’yole ’diyi yi ondua kokoru.

36Onyiru Yobuni o’bizu kpere asizania, erini e’yo omvile ’ba azi onzi ’yepi ’diyilerisi.

37Erifii mbuza Mungu ruaasi amveri o’bale ezata erini aziniri ma driarisi; eri e’yo nze dri sazasi ama eselia, eri e’yo ini ’yole ’diyi ere kakau Mungu ruaa.

← Chapter 33 Jump to: Chapter 35 →