Job 22

Lugbara (E’yo Siza Alatararu Munguniri BIBLIA)

← Chapter 21 Jump to: Chapter 23 →

1Elifazi ’ba Temanini nga di e’yo omvi kini:

2’Ba eco ovuzaru Mungu dri orodriru ra ya? Ada, ’ba onduaruri eri orodriru i ma ngulupi dri.

3Mi ka ovu kililiru, e’yoni ayiko fe Okpoe’ini dri ra ya? Mi ka geri mini ’ba ezata kokoru, e’yoniri orodriru eri driraya?

4Eri ega mi dria mini eri rulerisi, erini fizu mi be e’yo liza ma i alia ya?

5Azi onzi mini ovuni amboru ku ya? E’yo onzi mini asini ku.

6A’disiku mi a’i afa toboru mi adri dri toko, mi otru ’ba pililiru ’diyi ma bongo ’bo.

7Mi feni yi mvuza ’ba andepiri dri ku, mi oga nyaka feko ’ba abiri beri dri si.

8Te ’ba okporuri nya angu ra, ’ba inzita beri adri alenia.

9Mi pe awuzi ma ti mvizu pirini, mi onyo ’ba ata kokoru ’diyi ma wu ra,

10E’yo ’disi vuluvulu ovu mi ageia ci, mi asi oti uri eceapi rugburisi;

11kani angu biza, mini ani angu ndrezu kurisi, yi tipi turi a’bu mi dri ci.

12Mungu ovuni ’bu uru turia ku ya? Mi ndre ’bi’bio, yi uru tu tu ’doni ya!

13Te mi ’yo ra kini, Mungu ni a’di e’yoni ya? Eri eco e’yo lizaru angu bipi iniciciruri ma eseleasi ya?

14Iriti iniru ’diyi a’bu eri, erini nezu ani kuni, eri aci angu ’buari ma ageiasi kuru.

15Mi nga geri oku ’ba onzi ’diyini acizuri ma ta mba ya?

16Opa ’ba nde ’diyi yi o’duzu de nga ewu yiniri eceani ku; anzu yi ma jo eti ekile yi tizale.

17’Ba nde ’yo Mungu tia, Mi da mi ama vurisi ra; azini, Okpoe’i eco ama dri a’di ’yezaru ya?

18Te ti, eri fe ndra yi ma joni gazu tre tre afa onyiru ’diyisite e’yo ’ba onzi ’diyini amaleri ovu ma vu ziri.

19’Ba kililiru ndre ra, ovu ani ayikosi; ’ba e’yo kokoru ’diyi ogu yi, Yi ’bazu aparakaru,

20kini, Ada ja ’ba ndra engapi ama ruaa ombaru ’diyi ma dri ’bo, aci eve ’ba joloko yini acepi ’diyi ’bo.

21Emi ni emi Mungu be, emi ovu a si anzurusi ani; ’dini e’yo onyiruni nga eca ani mi vu beni.

22Mi a’i imbata efupi eri ma tiari fo, mi mba e’yo ’yoza erini ma ta mi asia.

23Mi ka nga mvi Okpoe’i vu, eri nga mi edre uru, mi ka nga e’yo kililiru kuri ’ba hema mini vusi ziri.

24Mi ’ba lonyi mini va irifura ma alia, mi ’ba mele Ofiriari oni yi raza ma alia ’diyi ma eselia;

25Okpoe’ini nga ovu lonyi miniru, eri nga ovu mi dri dahabu aje nyapi turile.

26’Dini ayikoni nga di mi fu Okpoe’i ma e’yosi, mi nga mi mile enga Mungu

27Mi nga zita mini zi eri tia, eri nga mi eri ra; mi nga oyo mini sole ’diyi ofe ra.

28Mi nga e’yo azi, e’yoniri nga pa so mi dri ra, dizani nga di geri mini ma dria.

29Ka ’ba ’be va, mi nga ’yo ra, Engaza ururi ci; Munguni nga ’ba afu kokoruri pa ra.

30Eri nga ’ba e’yo kokoruri ari ra; ada, mi dri alani nga fe mi pa eri drini.

← Chapter 21 Jump to: Chapter 23 →