Job 21

Lugbara (E’yo Siza Alatararu Munguniri BIBLIA)

← Chapter 20 Jump to: Chapter 22 →

1Yobu nga di e’yo omvi kini:

2Emi eri e’yo mani emi asi driasi, e’yo ’diri ma omi emi asi.

3Emi ku nga ma ma ’yo e’yo indi, te ma ka ’yo ’bo, emi ede di ma drile drile ndo.

4Te ma’i, wuta mani eri ’ba vu ya? Ma ma ovu asi teza kokoru ku a’disi ya?

5Emi lu ma, emi osu ani, emi bi emi ti drisi.

6Ma ka kiri e’yo ’diri ega’i a’dule, fe ma asini otizu oti, ma rua ya ya urisi.

7’Ba azi onzi ’yepi ’diyi ovu idriru, yi ca eli be fudri ci, yi ma okpo ere i drile drile a’disi ya?

8Fe yi ma orini pa sozu yi milia kirikiri, anzi yini otile ’diyi ovu yi milia.

9Jo yini ovu e’yo ’yaasi uri kokoru, kali Munguniri coni yi ku.

10Monio yinini ti amva ra, mva eceni i ’ba kokoruni ku; tiandri yini eri ti ti, e’beni e’be ’ e’be ku.

11Yi anzi nyiri yini ofu o’biru ’diyile, anzi yini adri ongo tu.

12Yi ongo ngo ari pisi o’di be, yi ovu ayikosi ejeleko awusi.

13Yi ovu drilebaru o’du yini alia dria, yi adri si Pari ’ba drazaniria mbelekocici.

14Te di yi ’yo Mungu tia, Mi da mi ama vurisi ra! Ama leni geri mini nizu ku.

15Okpoe’ini a’di’i, amani azi ngazu eri driri ya? Ama ka e’yo zi eri tia, ama a’di ma orodri isu ya?

16Mi ndre, drileba yini ovuni yi ma dria ku; e’yo ’ba azi onzi ’yepi ’diyini amaleri ovu ma vu ziri.

17Inyu ’ba azi onzi ’yepi ’diyi ma tala paleko si ya? Yi ma candini ecazu yi ma ruaa? Munguni candi awaria yi dri adra erinisi ya?

18Yini ovuzu ani ase vole vu olini drolerile, ekile anya drileko akulukuni ’dulerile ya?

19Emi ’yo kini, Te Mungu adri e’yo onzi nde ma arioti ta mba, muzu ofezu eri anzipi ma ruaa ra. Te onyiruni eri ma ofe eri eri ma ngulupi ma ruaa, eri ma ni e’yoni beni.

20Eri ma ndre i ma ngulupi ma dri jaza i milesi, eri ma mvu Okpoe’i ma adra’i.

21A’disiku jo erini eri ma vutiari nga eri dri ayiko ngori fe, ka isu de li mba erini ma kalafe agaa ’bo ya?

22’Bani nga Munguni imba e’yo onizu ra ya? Isu de eri ’ba uru ’diyi ma e’yo lini.

23’Ba azini dra de eri pi okpo be, erini ovuria de ava liria e’yo ’yaasi,

24de kereniri ga tre lesusi, de falani ma odu nzuni nga ku.

25Aziniri dra asi candiru turi be, awini afa onyiru ma aji o’bi ku.

26Yi la va iri tro irifura ma alia trotro, obu ase yi ma rua ci.

27Mi ndre, ma ni asisile emini piyi lokiri emini otule ma ruaa ma ’yezu onzi ’diyi be ra.

28A’disiku emi ’yo kini, Jo opiniri ngoa ya? Hema ’ba onzini ovuzu aleniari ngoa ya?

29Emi zini e’yoniri ’ba agapi geria ’diyi ma tia ku ya? Emi nini e’yo eti yini nzeleri ku ya?

30Kini, O’du ocokorurisi yi adri ’ba azi onzi ’yepiri ku ja, yi adri eri ji pari azinia o’du adranirisi.

31A’dini nga geri eriniri e’da eri ma miliani ya? A’dini nga vini e’yo erini ’yeleri ma arioti ofe eri drini ya?

32Yi ka nga eri ma avu ji sazu ’bilia raria, yi nga nyadriniri ma agei te amutisi.

33Nyanyaku e’buari nga ovu eri dri aluzaru; ’ba dria nga eri ma vuti bi, ekile ’ba mupi drilenia ’diyini ovule kakau lakokorurile.

34Emi ma asi omi e’yo toko toko ’diyisi ngoni ngoni ya? Isu de e’yo emini omvile ’diyi ma alia kiri inzo aceni.

← Chapter 20 Jump to: Chapter 22 →