Luke 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1Eri ’yo e’yo o’beza yi tia, yi imbazu yi ma zi Mungu ’dani ’dani, ma ande ku;

2kini, ’Ba e’yo lipiri indi aku azinia, eri runi Mungu ku, erini vini ’ba ma e’yo ku indi;

3awuziou alu aku nde ’daria indi, eri adri emu eri vu ’yozu, Mi li e’yo mani ari’bo mani beri onyiru fo!

4O’du kakau eri ga si; te vilerisi eri ’yo i asia, Ma ka tro Mungu ru ku,; azini e’yo ’bani eri ku ti,

5te oku ’dirini ma ecandilerisi, ma nga di e’yo erini li onyiru ra, eri kazu fezu ma andezu kai erini emule dika dikarisi ku.

6Opi nga ’yo ra, Emi eri e’yo ’ba e’yo lipi kililiru ku ’dirini ’yoleri.

7Mungu ngani e’yo li ’yeke ’ba erini opele owupi etusi inisi i vu ’diyi dri ku ya? Eri ngani yi eri asi e’yeresi ku ya?

8Ma ’yo emi tia, eri nga e’yo yini li onyiru mbele mbele. Ka’dini ti, Mvi ’bani ka emu ra, eri nga a’ita isu nyakua ra ya?

9Eri nga vini e’yo o’beza ’diri olu ’ba azini yi ma ngulupi ma e’yo a’ipi kini yi ovu ’ba kililiruni, te ’ba azini ndrepi dria ’ba tokole ’diyi ma tia:

10Agupi iri tu hekalua Mungu zizu, aluri ’ba Farisaini, aziniri ’ba musoro okupiri.

11’Ba Farisaini nga pa so zizu i ma ngulupisi kini, Mungu, ma ’yo awa’difo mi tia mani ovule ’ba azi ’diyile kurisi, ’ba afa opapi ’diyile, ’ba kililiru ku ’diyile, ’ba ali o’bapi ’diyile, kani ’ba musoro okupi va ’dirile kurisi.

12Ma adri nyaka ’da sabato alu ma alia pale iri; ma adri afa dria mani isule mudri ’diyi ma esele aluri fe ra.

13Te ’ba musoro okupiri so pa re ’dani, eri ga mile engako ’bua si, te eri nga i agati di, kini, Mungu, mi ovu yikisi ma vu, ma’i ma ’ba azi onzi ’yepiri!

14Ma ’yo emi tia, ’ba ’diri si mvi jo inia erini ovuria kililiru Mungu ma milia agu nde ’dari agazu; te ’ba dria alu alu i ma ngulupi ’bapi uru ceniri, yi nga eri omvi ele; te yi nga ’ba i ma ngulupi omvipi ele ceniri ’du ’ba uru.

15Yi eji vini anzi odekuaru yini eri vu, eri ma elo yi rua ani; te ’ba erini imbale ’diyi ka ndre ra, yi nga ega yi dria.

16Te Yesu nga yi omve i vu, kini, Emi ku anzi nyiri nyiri ma emu ma vu, emi ma oga yi ku; te suru Munguni ovu ’ba ’dinile ’diyini.

17Ma ’yo emi tia ndi ndi, ’ba azini ka ngoni ti, ka suru Munguni a’i mva gakandiarule ku, eri ngani fi alenia aluni ku.

18’Ba ambo alu zi eri tia ’dini kini, ’Ba ’ba Imbapi bari, ma nga ’ye ngoni mani idri ’dani ’dani isuzu ya?

19Yesu nga ’yo eri tia, Mi omve ma ’ba baru a’disi ya? ’Ba baruni yo, kiri alu Mungu’i.

20Mi ni azita ra: Mi ’ba ali ku, Mi ’di ’ba ku, Mi ogu ku, Mi nze e’yo eti inzoru ku, Mi inzi mi ati pi mi andri be.

21Eri ’yo ra, Ma mba e’yo ’diyi ma ta dria gbu mvaasi.

22Yesu ka eri ra, eri ’yo eri tia, Afa azini alu ece nga mi dri ’yekokoru. Mi fe afa dria mini ovuzu yi be ’diyi ozi ra, mi awa ’ba alioru ’diyi dri, mi nga ani lonyi isu ’bua; mi emu di ma vuti bi ndo.

23Te eri ka e’yo ’diri eri ra, eri ’ba ovu candisi tu, erini ovule ’ba afa e’iru turisi,

24Yesuni eri ndreria ’yo ra, ’Ba afa e’iru ’diyini fizu suru Munguniria ewani ’doni!

25Ngamiani fizu sindani ma talaasiri bani ewa kokoruni aga ’ba afa e’iruni fizu suru Munguniari ra.

26’Ba eripi ’diyi ’yo ra, Ka’dini a’di eco i pazaruni ya?

27Te eri ’yo, E’yo ecopi ’basi ku ’diyi eco Mungusi ra.

28Petero ’yo ra, Mi lu, ama ku afa ama vile ’diyi ra, mi vuti bizu.

29Eri ’yo yi tia, Ma ’yo emi tia ndi ndi, ’ba jo pi kupi suru Munguniri ma e’yosi, oku pie, adripi pie, ’ba yi tipi ’diyi pie, anzi pie dria ’diyi ma aluni

30ngani ece afa isuzu parinia pale karakarau ewu ’dorisi ku, eri nga vini ovu idri ’dani ’daniri be ewu ngapi emupirisi indi.

31Eri oku ’ba mudri drini iri ’diyi i vu, nga ’yo yi tia, Mi ndre, ama tu uru Yerusalemua, azini e’yo dria nabini sile Mvi ’bani ma e’yosi ’diyi nga yi ’ye ra.

32Te eri nga ovu fezaru ’ba jururu dri, yi nga eri ede ogutasi, yi nga drinza fe eri dri, yi nga cucu wu eri ruaa;

33yi nga eri co ninisi, yi nga eri fu kai ra, te o’du nasi eri nga enga dika.

34Te yi vani e’yo ’diyi ma azi aluni ku; e’yo ’yoza ’diri ovu zizaru yi dri, yi nini e’yo erini ’yole ’diyi ku.

35Eri nga eca ’dini, erini ecaria Yerikoa ogogo, ’ba alu mileefi odraza beri de ri geri tia afa a’izu,

36eri ka ’ba ongulumuru eri yini agaria, eri zi e’yo ’diri a’di e’yoni ya.

37Yi nga olu eri tia, kini, Yesu ’ba Nazaretiari agani.

38Eri oyu o’duko urusi kini, Yesu, Daudi mvi la, mi ’ba yiki ma vu fo!

39’Ba mupi drilenia ’diyi ega eri dria kini ma adri ciri; te eri tre o’duko urusi aga ra, Daudi mvi la, mi ’ba yiki ma vu fo!

40Yesu so pa ci, nga ’yo kini ma eji eri i vu; eri ka eca ogogo, eri zi tinia ’dini,

41Mi le ma ma ’ye mi vu a’dini ya? Eri nga ’yo ra, Opi, ma le te angu ndre fo!

42Yesu ’yo eri tia, Mi ndre angu ki! A’i,a mini pa mi ’bo.

43Perepere eri ’ba angu ndre, nga eri vuti bi, diza fezu Mungu dri; ’ba ongulumuru ka ndre ra, yi nga inzita fe Mungu dri indi.

← Chapter 17 Jump to: Chapter 19 →