Luke 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Eri nga eca ’dini o’du ’dayisi, Kaisari Augusito azi azita kini ’ba wudrikuru dria ’diyi ma ru ma ovu sizaru,

2Ru siza ’diri eri sile oko Kurinioni opi nyazu gavenaru Suria ma driliarisiri’i.

3’Ba dria mu ndra yi ru osizu, ’ba kinakina muzu aku yi vileria.

4Yusufu indi efu Galilia engazu aku Nazaretiasi, nga etu angu Yudiaa fizu aku Daudini omvele Betelehemu’iria, eri ma suruni engale Daudi ma ori ma aliarisi,

5ru yini osizu Mariamu aliria erini be, de eri ovu okporovuru.

6Eri riga di eca ’dini, de yini ovuria ’dale o’du erini mva osizuri eca ra.

7Eri nga aliriamva erini osi agimvaru, eri nga eri ombe bongo mva ombezurisi, eri nga eri la oguru tini afa nyazuri ma alia, a’disiku pari yini omujoarini ovule yorisi,

8’Ba kabilo ocepi ’diyi ovu angu ndea lazu nyamukoa, kabilo yini o’biru ’diyi agei teria ini be rra.

9Malaika Opini nga pa so yi vu, diza Opini nga di yi ma ageia, yi nga ru ani tu.

10Te malaika ’yo yi tia, Emi ru ku; mi ndre, ma olu emi tia e’yo baru ayikoru tu ovupi ’ba dria driri,

11kini, andru osi emi dri aku Daudinia ’Ba ’ba Papiri, eri Kristo Opi’i.

12E’yo ’diri nga ovu emi dri ecetaniriru: emi nga odekua isu ombezaru bongo mva ombezurisi erini laria oguru tini afa nyazuri ma alia.

13Coti malaika ongulumuru engapi ’bua ’diyi ovu malaika ’diri be, yi ru Munguni inzu ambo, kini,

14Diza ma ovu Mungu vu uru ’bua, azini nyakua asi anzuru ma ovu ’ba Munguni ovuzu yi vu ayikosi ’diyi vu.

15Eri nga eca ’dini, malaika ka yi ku mvizu ’bua ’bo, ’ba kabilo ocepi ’diyi nga e’yo ’yo yi eselia ’dini kini, Ama mu di curu’do Betelehemua, e’yo i ’yepi te Opini ecele ama dri ’dori ndrezu.

16Yi nga mu mbele mbele, nga Mariamu pi isu Yusufu pie, odekua lapi oguru tini afa nyazuriari be.

17Yi ka eri ndre ’bo, yi ece e’yo ovupi ’yozaru yi tia mva ’diri ma e’yosiri;

18’ba dria e’yo ’di eripi ’diyi osu tu e’yo ’ba kabilo ocepi ’diyini ’yole yi tiarisi.

19Te Mariamu mba e’yo ’diyi ma ta dria i asia, asisile drozu drinia.

20’Ba kabilo ocepi ’diyi mvi, ru Munguni inzizu diza fezu eri dri indi, e’yo dria yini erile azini ndrele, ekile erini ovule oluzaru yi ma tiarilerisi.

21O’du aro ka yi de ’bo eri agele lizu, yi ’da ru erini Yesu’i, ’di ru malaikani ’dale de nga eri ovuni andri ma alia kuri’i.

22O’du yini yi rua ’bazu alaru ’diyi ka yi de ra azita Musanini ’yolerile, yi eji eri uru Yerusalemua, fezu Opi dri

23(yini sile azita Opini ma aliarile ’dini, ’Ba nga aliriaanzi agupianziru opojo ma tile zipi oko ’diyi dria alu alu omve alatararu Opi dri)

24edeta fezu indi, yini sile azita Opini ma aliarile, angaraka iri kani a’balau o’buru ma anzi iri.

25Isu ’ba alu indi Yerusalemua runi Simeoni’i, agupi ’diri eri ’ba kililini, Mungu ma e’yo va eri tu, eri asi omiza Israelini te; Orindi ’Alatararu ovu eri ma dria.

26Te orindi Alatararu ece eri dri ’dini, kini eri ngani dra ndre ku de nga eri ndreni Kristo Opini ku.

27Eri fi Orindisi hekalua; te ’ba eri tipi ’diyi ka odekua Yesuni ofi hekalua, yini ’yezu ani eri vu azitani ’yolerile,

28eri nga mva amvu i ma rua, riga Mungu ma ru inzi kini,

29Opi, curu’do mi fe ati’bo mini ma mvi asi anzuru be, mini ’yolerile;

30a’disiku mile mani ndre para mini

31mini edele ’ba dria ma miliari ’bo;

32angu ’izu ’ba jururu ’diyi vu, azini diza ’ba mini Israelini diyini ecezu.

33Ati pi andri be osu osu e’yo ’yole eri ma e’yosirisi;

34Simeoni nga asi ndriza fe yi dri, nga ’yo andri Mariamu ma tia, Mi ndre, mva ’diri yi ’ba eri ’dini ’ba Israelini kakau yini yi ecozu va, azini yini engazu uru, azini eceta ’bani ngale 0’daleriru;

35te seini nga mi ngulupi ma orindi so indi; asisile ’ba kakau ma asia ’diyi ma ovu ecezaru ani beni.

36Nabi okuru runi Ana, Fanueli zi’i, eri ndra indi (eri ovu eli be kakau, ka zi ’bo eri adri ndra agupi erini be eli aziri,

37erini ovuria awuziru eli o’de eri dria kali aro drini su ’bo), Ana nde kuni hekalu ku Mungu inzizu nyaka ’dazasi, zita zizu etu be ini be dria.

38Erini ecaria etu ’dasi eri fe lawa’difo Mungu dri, nga vini e’yo erini ’yo ’ba onzeta Yerusalemuni tepi ’diyi ma tia dria.

39Te yi ka e’yo dria azita Opinini ’yolerile ’diyi ede ’bo,yi mvi Galilia aku yi ma ngulupi Nazaretiaria.

40Mva zo ra, rua erini eca okpo be, ondua ga asinia tre; ’yeta anzutiri Munguni ovu eri ma dria.

41’Ba eri tipi ’diyi adri mu eli vusi eli vusi Yerusalemua omu agaza ’ba drilesiri nyazu.

42Eli erini ka ca mudri drini iri, yi mu uru yini adrile mule omu nyazurile;

43yi ka o’du omuni ’diyi de ’bo, ’yini mviria, agimva Yesu nga awi vile Yerusalemua. Te ’ba eri tipi ’diyi nini ku;

44yini egaria kini eri ovu ’ba acipi tualu geria ’diyi ma eselia, yi mu geria o’du alu pi, yi nga eri nda ori’ba yini ma eselia azini ’ba yini nile ’diyi ma eselia indi;

45yi ka eri isu ku, yi nga mvi Yerusalemua eri ndruzu.

46Eri nga eca ’dini, o’du na ka yi de ra yi isu eri hekalu ma alia, erini riria ’ba e’yo imbapi ’diyi ma eselia, e’yo yini eriria, e’yo ziria yi tia indi;

47’ba dria eri eripi ’diyi osu tu e’yo vaza erini pisi e’yo omviza erini be.

48Yi ka eri ndre ’bo, yi nga osu tu; andrini nga ’yo eri tia, Mva, mi ’ye ama be ’dini a’disi ya? Mi ndre, ama nda mi mi ati be candisi.

49Eri ’yo yi tia kini, Emi nda ma a’disi ya? Emi i nini ku kini ma ma ovu ma Ata ma e’yo ma alia ku ya?

50Te yi vani e’yo erini ’yole yi tiari ku.

51Eri si yi be, nga ca Nazaretia, nga e’yo yini inzi ra; te andri erini mba e’yo ’diyi ma ta dria i asia ci.

52Yesuni zoria eri zo ondua be azini rua be,’yeta anzuturi be dria Mungu vu azini’ba vu ndi.

← Chapter 1 Jump to: Chapter 3 →