Luke 23

Lugbara (E’yo Siza Alatararu Munguniri BIBLIA)

← Chapter 22 Jump to: Chapter 24 →

1’Ba ongulumuru yi okupi’diyi dria nga enga uru, nga eri ji Pilato vu.

2Yi ’ba asu su eri ruaa kini, Ama isu agu ’dirini suru amani ojaria onzi, azini eri oga ’bani musoro feko Kaisari dri si, azini kini i ngulupiri Kristo opi’i.

3Pilato zi eri kini, Mi Opi ’ba Yahudini ya? Eri omvi e’yo eri tia, ’yo ra kini, Mi ’yo ’di.

4Pilato ’yo ’ba ’wara kuhaniru ’diyi pi ma tia ’ba ongulumuru be, kini, Ma isuni ezata agu ’diri ndepiri ku.

5Te yi ’ba e’yo ’yo drinia okposi aga ra, kini, Eri osa ’ba ale ’ba imbazu angu Yudiaari ma alia dria, engazu Galilia ecazu kpere angu ’doria.

6Te Pilato ka eri ’dini, eri zi agu ’diri ’ba Galilini ya.

7Eri ka ni ra eri ’ba Herodeni nyaleniri, eri pe tini Herode vu; isu o’du nde ’dasi Herode ma ngulupi Yerusalemua indi.

8Herode ka Yesuni ndre ra, eri ovu ayikosi tu, a’disiku o’du kakau eri le eri ndre, erini e’yo erini erilerisi; eri ega i asia i nga tali erini ’yeleri ndre.

9Eri ozi eri e’yo kakausi; te Yesu omvini e’yo eri tia ku.

10’Ba ’wara kuhaniru ’diyi pi ’ba azita sipi ’diyi be oso pa, asu suzu ruania okposi.

11Herode pi asikari erini ’diyi be inza eri dri, yi onzi eri indi; yi su mania bongo dipi ndrindriri, nga di eri ti pe mvizu Pilato vu ndo.

12O’du nderisi Herode pi Pilato be eci yi agyiru, te ndra okorisi yi ngu yi onzi onzi.

13Pilato nga ’ba ’wara kuhaniru ’diyi pi omve tualu, ’ba ’ba dri cepi ’diyi pie, ’ba be dria,

14nga ’yo yi tia, Emi eji agu ’diri ma vu kile ’ba ’ba asi ojapi onzirile; te mi ndre, mani eri ma e’yo liria emi drilia, ma isu e’yo emini asu suzu ruania ’diyi ma azi aluni eri ndepini yo;

15Herode isuni vini ku indi, a’disiku epe tini ama vu vile. Te mi ndre, eri ’yeni e’yo onzi dri fupi erini drazu ani rari ku.

16Ka’dini ma eri co imbataru raka, ma nga eri tru ndo.

17Te omu ma alia eri ma tru ’ba aruru alu yi dri.

18Te yi otre o’duko urusi dria tualu, ’yozu kini, Mi ji agu ’diri ’dale, mi tru ama dri Barabani’i!

19’Ba ndra Baraba nderi aruru erini omba ’bale aku nde ma aliarisi, azini erini ’ba fulerisi.

20Pilato nga ’yo yi be dika, erini lezu Yesuni truzu;

21te yi nga otre uru okposi kini, Mi di eri pati ruaa! Mi di eri pati ruaa!

22Eri ’yo yi tia pale nansi, A’disi? E’yo onzi erini ’yeleri a’di e’yoni ya? Ma isuni e’yo eri ma alia dri fupi erini drazu ani rari ku; e’yo ’disi ma nga eri co imbataru raka, ma nga eri tru ndo.

23Te yi ’ba otre e’yo be drinia wowo o’duko urusi, ’yozu kini ma di eri pati ruaa. Otreza yini nde di eri ra.

24Pilato li e’yo kini ma ’ye i yini zilerile.

25Eri nga agu nde yini ’bale arujoa omba ’bazasi azini ’ba fuzasiri tru ra, ’ba taka yini a’ileri; te eri fe Yesuni, yini ’yezu eri be yi asini lelerile.

26Yini eri jiria, yi nga ’ba azini runi Simoni, ’ba Kureniari, bi erini engaria amvua, yi nga pati alaza ’ba eri ma ombetia, jizu Yesu ma vutisi.

27’Ba ongulumuru kakau ’diyi, oku lulu ogapi awu wupi erisi ’diyi be, nga eri ma vuti bi.

28Te Yesu oja i yi vu, nga ’yo fa, Emi ezoanzi Yerusalemua ’diyi la, emi owu masi ku, te emi owu bani emi ngulupisi emi anzipi be.

29Te mi ndre, o’duni nga eca yini ’yozu kini, ’Ba ondoru ’diyi pi yi drilebaru, opojo anzi tipi ku ’diyi pie, ba odekuani ndrule ku ’diyi pie!

30O’du ndesi yi nga ’ba ’yo oni ambo ’diyi ma tia, Emi o’de ama dria; azini oni were ’diyi ma tia, Emi a’bu ama dri ci.

31Te yi ka e’yo ’diyi ’ye pati ibiru ma ruaa ’dini, a’duni nga bani i ’ye pati ’wiza ma ruaani ya?

32Yi ji ’ba azini iri, e’yo onzi ’yepi ’diyi, dizu eri be.

33Yi ka eca pari omvele ’Ba Dri Falaniria, yi di eri pati alaza ma ruaa ’daa, ’ba e’yo onzi ’yepi ’diyi be, alu dri ndiria, aziniri dri ejiria.

34Yesu ’yo ra, Ata, mi ku e’yo onzi yini ra; yini e’yo yini ’yeleri nile kurisi. Yi nga odrisi ’be bongo erini nyazu yi eselia.

35’Ba kakau nga pa oso ndrezu; te ’ba ’ba dri cepi ’diyi nga eri ma dri inza kini, Eri opa ndra ’ba azini ’diyi ra; ’ba ’diri ka ovu Kristo Munguni, erini peleri’i, ma pa i ngulupi’i!

36Asikari ede eri ogutasi indi, yini emuria patiefi ma su drazaruri feria eri dri,

37yi ’yo ra, Mi ka ovu Opi ’ba Yahudini, mi pa mi ngulupi!

38E’yo siza eri driliari ovu ’dini, ’BA ’DIRI OPI YAHUDINIRI’I.

39’Ba e’yo onzi ’yepi, dile pati alaza ruaa ’diyi ma azi alu o’da eri kini, Mi Kristo’i yo ya? Mi pa mi ngulupi ama be indi!

40Te aziniri nga e’yo omvi, nga ega eri dria, ’yo ra, Mi runi Mungu ku, de mi vini e’yo liza nde ma alia alu indi ya?

41Te amaruni, yi li e’yo amani, ’yeke; te ama isu panga i sipi azi onzi amani beri’i; te agu ’diri ’yeni e’yo onzi aluni ku.

42Eri ’yo indi, Yesu, mi ega e’yo mani mini firia suru miniria fo!

43Eri ’yo tinia, Ma ’yo mi tia ada, Andru mi nga ovu ma be Paradisia.

44Curu’do eri ovu kile etu aziale, angu nga bi inicici oro dri dria kpere etu oromi,

45de etu dini ku; bongo hekalu ma ale alizuri nga i ale asi iri.

46Yesu oyu o’duko urusi, kini, Ata, ma ku ma orindi tani mbazu mi dria! Ka e’yo ’diri ’yo ’bo, eri ku i avani fuzu ra.

47Ambo asikari turu alu ma driliari ka e’yo i ’yepiri ndre ra, eri inzi Mungu, kini, Agu ’diri eri ’ba kililiruni ada!

48’Ba ongulumuru dria yi okupi tualu e’yo amboru ’diri ndrezu ’diyi ka e’yo yi ’yepi ’diyi ndre ra, yi ri mvi agati diza be.

49Te ’ba dria eri nipi ’diyi oso pare, oku eri vuti bipi engapi Galilia ’diyi be, e’yo ’diyi ndrezu.

50Isu agu azini indi, runi Yusufu’i, eri ’ba e’yo amapi ’diyi ma azi, eri ’ba onyiru ’ba kililiruni indi,

51suni ndra i ti e’yo yini lileri kani e’yo yini ’yeleri ma alia ku, eri enga aku Yahudini Arimatearuria, eri indi suru Munguni ma mile gapiri’i.

52Agu ’diri mu Pilato vu, Yesu ma avu a’izu.

53Eri nga avuni e’du va, nga eri ombe bongo emverusi, ’ba eri gule yini gale oni alia, pari yini ’ba avu sazu alenia nga kuria.

54O’du ’diri eri O’du afa Edezuri, o’du sabatoni eri ’ye e’do e’do.

55Oku emupi eri be engazu Galilia ’diyi bi vutini, yi ndre gule, azini geri avuni sazuri ra;

56yi mvi, nga ajinguru pi ede odu arikariruri be. O’du sabatonisi yi li ande kile azitani ’yolerile.

← Chapter 22 Jump to: Chapter 24 →