Luke 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Eri nga eca ’dini, o’du nde ’dayi ma azisi, erini ’ba imbaria hekalua, erini e’yo bari oluria indi, ’ba ’wara kuhaniru ’diyi pi, ’ba azita sipi ’diyi pie, ’ba ’wara pie nga eca vunia,

2yi nga ’yo eri tia kini, Mi ’yo ama tia, mi e’yo ’diyi ’ye okpo ngorisi ya? A’di fe mi dri okpo ’dirini ya?

3Eri omvi e’yo, nga ’yo yi tia, Ma nga vini e’yo zi emi tia alu indi; emi ’yo ma tia,

4Baputizi Yohanani enga ’bua kani ’ba vu ya?

5Yi nga e’yo ozi yi eselia ceni ceni kini, Ama ka ’yo, ’Bua; eri nga ’yo ra, Emi a’ini di eri ku a’disi ya?

6Te ama ka ’yo, ’Ba vu; ’ba ongulumuru dria nga ama o’be onisi, yini a’ile kini Yohanani nabinirisi.

7Yi nga di e’yo omvi kini yi nini pari erini engazuri ku.

8Yesu ’yo yi tia indi, Ma alu indi, ma ngani okpo ngori mani e’yo ’diyi ’yezu aniri ma e’yo emi tia ku.

9Eri ’ba e’yo o’beza ’diri olu ’ba ma tia: Agu alu isi ndra zabibu pati amvu alia; eri fe eri ku ’ba ageini tepi ’diyi dri, nga mu ovu angu andinia ewu izu.

10Ewuni ecaria, eri pe ati’bo ma ti ’ba amvu agei tepi ’diyi vu, kini yi ma fe i dri zabibu eri kapi amvu ’diri ma alia ’diyi ma esele iniruri; te ’ba amvu agei tepi ’diyi co eri, dro eri mvizu dri be pirini.

11Eri nga di ati’bo aziniri ma ti pe; yi co eri alu indi, yi fe drinza eri dri, dro eri mvizu dri be pirini indi.

12Eri nga ati’bo azini nari ma ti pe; yi di ’ba ’diri ari be, ’be eri amve.

13Opi amvu e’ini nga ’yo, Ma nga ’ye ngoni ya? Ma nga mvi mani lele turi ti pe’i; kani yi nga eri inzi’i yani.

14Te ’ba amvu agei tepi ’diyi ka eri ndre ra, yi ’ba e’yo ozi yi eselia, kini, ’Ba ’diri eri karimvani; ama ma fu eri, afa awurusoruri nga ovu amani ani beni.

15Yi nga eri ’be amvu ma aliarisi amve, ’di eri kai ra. E’yo ’disi opi amvu e’ini nga yi vu a’di ’ye ya?

16Eri nga emu, nga ’ba amvu agei tepi ’diyi ma dri ja ra, nga amvu nderi fe ’ba azini dri. Yi ka eri ra, yi ’yo, Ma ovu ’dini ku fo!

17Te eri so mile yi ruaa, nga ’yo ra, Ka’dini e’yo ovupi sizaru ’diri eri a’di e’yoni ya: Oni ba jo sipi ’diyini gale siri, oni ’diri ofu ovuzu jo kalati ma oni driruri’i.

18’Ba dria alu alu e’depi oni ’dari ma driari nga i onyo nyiringiriki; te ’ba nde onini ’dezu driniari, eri nga eri ’i, ere irifurale.

19Etu nde ’disi ’ba azita sipi ’diyi pi nda geri yi dri ’bazu eri ruaa ’ba ’wara kuhaniru ’diyi be, te yi ru ’bani; yini nile eri ’yo e’yo o’beza ’dori yi ma e’yosirisi.

20Yi nga mile ’ba eri ma ruaa, nga ’ba ti pe eri ma e’yo ndazu oyokolosi, ’ba ’diyi nga yi e’da lokirisi ekile yi ’ba kililirule, yi ma nga e’yo eri tiliari obi ani, ’dini yi ma bi eri fezu kuzu azita azini okpo gavenani ma alia beni.

21Yi zi eri tia kini, ’Ba ’ba Imbapiri, ama ni ra mi adri e’yo adani olu’i azini imba’i, mi openi ’ba ku, te mi geri Munguniri ma e’yo imba adaru.

22Azita amaniri a’i musoro fezu Kaisari dri ra, kani ku?

23Te eri va lokiri yini ra, nga ’yo yi tia,

24Emi ece ma dri silingi’i. Wura pi e’yo siza driniari be, yi a’dini ya? Yi ’yo ra, Kaisarini.

25Eri ’yo yi tia, Ka’dini emi fe Kaisari dri afa Kaisarini ’diyi, azini Mungu dri afa Munguni ’diyi.

26Econi yini e’yo ’yoza ’diri obizaru ’ba milia ku; yi nga osu tu e’yo erini omvilerisi, nga ovu ciri.

27’Ba Sadukayoni ma azi emu eri vu, yi ’ba adripi ’yopi kini ’ba engani ’ba draza eselia ku ’diyi;

28yi zi eri tia kini, ’Ba ’ba Imbapiri, Mus’a si e’yo ama dri kini, Agu ma adri ka dra ra mva kokoru, ka oku ku ci, adri ma omvi oku nderi, ma oti anzi i adri ma pariani.

29Isu adripi aziri ndra indi; okori nga oku je, te dra anzi kokoru;

31nari pie yi nga eri omvi; ’dinile yi aziri dria, te odra anzi kokoru.

32Vutinia oku nde dra indi.

33Ka’dini o’du ’ba drazani engazurisi eri nga ovu a’di ma okuru ya? A’disiku yi aziri ale eri okuru.

34Yesu ’yo yi tia, Anzi ewu ’dorini yi oku je, yi mu agupia indi;

35te ’ba egale kini yi fu dri pari isuzu ewu ’dari pi ma alia engata ’ba draza ma eseliari be ’diyi jeni oku ku, muni agupia ku indi;

36te yi econi drazaru dika ku, yini ovule malaika be trotrorisi; yi anzi Munguni, yini ovule anzi engapi ’ba draza eselia ’diyi’irisi.

37Te Musa ma ngulupi ece e’yo ’ba drazani engazuri ra, pari erini e’yo pati jereruri ma e’yo sizuria, eri ka Opi ma ru omve Mungu Iburahimuni, Mungu Isakani, Mungu Yakoboniri’i.

38Te ovuni Mungu ’ba draza ’diyini ku, te ’ba ovupi idriru ’diyiniri’i; a’disiku ’ba dria ovu idriru erisi.

39’Ba azita sipi ’diyi ma azi nga e’yo omvi, ’yo ra, ’Ba ’ba Imbapiri, mi ’yo ’yeke.

40Te ’di ma vutia yi asi mbani e’yo azini zizu eri tia dika ku.

41Eri ’yo yi tia, Yi ’yo kini Kristoni Daudi mvi’i ngoni ngoni ya?

42De vini Daudi ma ngulupi ’yo buku Zaburini ma alia. Opi ’yo Opi mani ma tia, Mi ri ma dri ndiria,

43de nga ma ’bani ari’ba mini ovuzu afa mi pa ’bazu driniariru ku.

44Awa’dini, Daudi ka eri omve Opi’i, ka’dini eri mvi eriniru ngoni ngoni ya?

45’Ba driani e’yo eriria, eri ’yo ’ba erini imbale ’diyi ma tia,

46Emi te emi agei ’ba azita sipi ’diyi ma le’yosi, ’ba nde ’diyi le acizu kanzu izuru be yi ruaa, yi le ’ba ma zi yi ci ci cuua, yi le kiti dridrileru pari ’bani Yi okuzu ’diyia, yi le pari dridrileru omu nyazuria ’diyi indi,

47yi awuzi ma aku nya pirini, yi ’Mungu zi izu yi ma e’da ’ba milia benisi. ’Ba ’diyi nga e’yo liza ambo agapi rari isu yi dria ra.

← Chapter 19 Jump to: Chapter 21 →