Luke 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Eli mudri drini towi Tiberio Kaisarini suru nyazurisi, de isu Pontio Pilatoni gavenaru Yudia ma drilia, de Herodeni opiru Galilia, eri ma adri Filiponi de opiru angu Ituriari pi ma drilia Trakoniti be, de Lusaniani opiru Abilenea,

2de Anasi pi Kaifa be yini kuhani amboru ma azi ngaria, e’yo Munguni eca Yohana Zakaria mvi vu roko dria;

3eri mu angu Yoridani ma ageiaria dria, baputizi asi ojazani e’yo onzi wuzu aniri ma e’yo oluzu.

4Kile e’yo nabi Isayani sile buku ma aliarile, O’duko ’ba oyupi roko driarini: Emi ede geri Opini, emi ’ba leti erini kililiru.

5E’buti kinakina nga ga nyakusi tre tre, yi nga oni izuru ’diyi pi osi oni were ’diyi be dria ele, angu ovupi goligoliru ’diyi nga eca kililiru, otukutu otukutu ’diyi nga eca seresere;

6’ba rua ari be ’diyi dria nga pata Munguni ndre.

7Eri ’yo ’ba ongulumuru tia ani, yini muria baputizi biria eri vu, Emi anzi uriohuluni! A’di ece emi dri apazu adra emupirisini ya?

8E’yo ’disi emi ma ’ya ani efi yi sipi asi ojaza be ’diyi, azini emi ma ’ba ’yo emi asia kini, A’bi amani eri Iburahimu’i, ’dini ku; te ma ’yo emi tia kini, Mungu eco oniefi ’diyi engazaru Iburahimu dri anziru ra.

9Te curu’do ogara ’ba i pati oja vu i ogogo ’bo; te ’ba yi adri pati dria efi ’yapi onyiru ku ’diyi ga va, ’bezu acia,

10’Ba ongulumuru zi eri tia kini, Ka’dini ama nga a’di ’ye ya?

11Eri omvi e’yo yi tia, ’Ba ovupi koti iri beri ma fe aluri ’ba koti kokoruri dri; ’ba ovupi nyaka beri ma ’ye ’dinile indi.

12’Ba musoro okupi ’diyi nga di eca eri vu baputizi bizu, nga ’yo eri tia kini, ’Ba ’ba Imbapiri, ama nga a’di ’ye ya?

13Eri ’yo yi tia, Emi ma oku musoro aga yini azile emi tiarile ku.

14Asikari nga zi eri tia alu indi, ikini, Te ama’i, ama di nga a’di ’ye ya? Eri ’yo yi tia, Emi ma opa afa ’bani okposi ku, emi ma su asu ’ba ’ruaa inzosi ku, oya emini ma fu dri emi Ina milia.

15’Bani e’yo teria azini ’ba driani e’yo egaria yi asia e’yo Yohananisi kini, kani eri Kristo’i ’yani,

16Yohana nga e’yo omvi ’yo vi tia dria, Ma’iruni, ma baputizi fe emi dri yisi; te ’ba ma agapi Okposiri eri emu ’ai, mani dri fuzu enyiriko eri ma paari ma baka ayuzu kuri’i; eri nga emi dri baputizi fe i Orindi Alatararu pisi aci beni,

17Eri kobi erini be eri dria, akuma erini ’bazu alaru, anyani okuzu ero erini alia; te eri nga anya drileko ve aci i inyupi kurisi.

18Eri olu e’yo bari ’ba ma tia, yi asi omizu e’yo azini kakausi.

19Te eri ega opi Herode ma dria, erini Herodiasi i adripi ma oku bilerisi, azini e’yo dria erini ’yele onzirisi;

20te Herode nga e’yo ’di o’ba e’yo ’diyi dria ma dria ’dini, eri ombe Yohanani arujoani.

21Eri nga di eca ’dini, ’ba dria ka baputizi bira, Yesu indi ka baputizi bi ’bo, isu erini ziria, ’bu zi i mgboru,

22Orindi Alatararu si va eri dria, e’da rua be kile a’balau ruale, o’duko enga ’bua kini, Mi Mvi mani lele turi’i; ma ovu ayikosi tu e’yo minisi.

23Yesu ma ngulupi ma eli ka ca kali na ’bo, eri ’ba di ’ba imba ndo; ’ba ega eri ovu Yusufu mvi’i, mvi Elini,

24Matatini, Levini, Melikini, Yanaini, Yusufuni,

25Matatiani, Amosini, Nahumini, Esilini, Nagaini,

26Maatini, Matatiani, Semeini, Yosekini, Yodani,

27Yoanani, Resani, Zerubabelini, Sealitielini, Nerini,

28Melikini, Adini, Kosamuni, Elimadamuni, Erini,

29Yesuni, Eliezerini, Yorimuni, Matatini, Levini,

30Simeonini, Yudasini, Yusufuni, Yonamuni, Eliakimuni,

31Meleani, Menani, Matatani, Natanini, Daudini,

32Yeseni, Obedini, Boazini, Salimonini, Nasonini,

33Aminadabuni, Arinini, Hezironini, Perezini, Yudani,

34Yakoboni, Isakani, Iburahimuni, Terani, Nahorini,

35Serugini, Reuni, Pelegini, Eberini, Selani,

36Kainanini, Arifakisadini, Semini, Noani, Lamekini,

37Metuselani, Enokani, Yaredini, Malalelini, Kainanini,

38Enosini Setini, Adamuni, Munguni.

← Chapter 2 Jump to: Chapter 4 →