2 Corinthians 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Ngaˬ Pawˇlu‸ awˬ to lehˬ, Hkri‸ ve nyi ma nuˇ nehˬ ve teˇ ceuˬ leh, yawˇ ve nyi ma da‸ ve teˇ ceuˬ awˬ hkʼaw lo nawˬ hui hta‸ lawˬ hkawˉ ve yoˬ. Ngaˬ hui hta‸ mehˆ hpfuhˇ tawˍ da‸ ve teˇ yanˇ nyi ma nuˇ nehˬ lehˍ taˍ leh, ngaˬ hui geh maˇ chehˇ ve teˇ yanˇ nyi ma ha‸ hanˉ ve yoˬ teh‸ nawˬ hui kʼoˆ ve chaw teˇ gʼaˇ lehˬ ngaˬ yoˬ.

2Ngaˬ lehˬ, miˬguiˬ yaˇ te ve hkʼe te ve chaw hpeh‸ ve teh‸ shawˍ ve chaw teˇ hpaˍ hta‸ ngaˬ nyi ma ha‸ hanˉ ve teˇ ceuˬ te maˍ piˇ tuˬ ngaˬ dawˇ taˍ ve yoˬ. Ngaˬ nawˬ hui geh gaˬ la ve teˇ yanˇ, chi taw taw nyi ma ha‸ hanˉ ve teˇ ceuˬ ngaˬ maˇ gʼa te maˍ laˇ tuˬ ngaˬ nawˬ hui hta‸ lawˬ hkawˉ ve yoˬ.

3Awˬ lawn kʼo, ngaˬ hui miˬguiˬ hkʼoˆ lo chehˇ ve htawˇ, miˬguiˬ hta‸ caˉ da‸ ve ma‸ bawˆ ve teˇ ceuˬ hta‸ ngaˬ hui te ve maˇ heˆ.

4Ngaˬ hui ma‸ bawˆ ve la‸ caˉ teˇ hpaˍ lehˬ, miˬguiˬ hta‸ caˉ da‸ ve la‸ caˉ hpeh‸ ve maˇ heˆ. Ta‸ teˇ hpaˍ hta‸ te luˬ tuˬ awˬ pon, Gʼuiˬsha ve kanˇ paˆ cawˬ ve la‸ caˉ teˇ hpaˍ hpeh‸ ve yoˬ.

5Tawˇ gʼawˬ da‸ ve awˬ ceuˬ teˇ hpaˍ hta‸ maˇ kʼoˆ, Gʼuiˬsha hta‸ maˇ gʼa shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ hta‸ maˇ kʼoˆ, ngaˬ hui yuˬ baˬ hpaˆ baˬ ve yoˬ. Dawˇ hkʼaˇ teˇ maˬ le le hta‸ ngaˬ hui hpeh yuˬ leh, Hkri‸ hta‸ na yuˬ piˇ lawˬ ve yoˬ.

6Nawˬ hui na yuˬ ve teˇ ceuˬ biˇ la peuˬ hkʼaw‸ nawˉ, maˇ na yuˬ ve chaw hkʼa peu-eˬ hta‸ ciˍ yanˍ piˇ tuˬ ngaˬ hui gu taˍ hehnˇ taˍ peuˬ.

7Nawˬ hui mehˆ gʼuˇ suhˍ cawˬ taˍ ve teˇ hpaˍ hta‸ hkʼa deh‸ nyi sheˍ. A shu yawˇ awˬ to Hkri‸ ve chaw hpeh‸ ve yoˬ teh‸ chaw teˇ gʼaˇ gʼaˇ shawˍ taˍ ve kʼo, yawˇ Hkri‸ ve chaw hpeh‸ ve hkʼe ngaˬ hui htawˇ hpeh‸ ve hta‸ dawˇ nawˇ cawˇ ve yoˬ.

8Nawˬ hui hta‸ uiˍ la yeˬ la piˇ tuˬ awˬ pon Jawˇmawˇ Yeˍsuˆ ngaˬ hui hta‸ aˉ yaˇ pe‸ laˇ ve yoˬ. Nawˬ hui hta‸ te luˬ tuˬ awˬ pon pe‸ laˇ ve maˇ heˆ. Hkʼe te leh, aˉ yaˇ chi awˬ lawn ngaˬ nyi ma uiˍ ve awˬ hkʼaw lo hkʼa cawˇ cawˇ kʼoˆ maˇ ve htawˇ, ngaˬ gʼa ya‸ taw tuˬ ve maˇ heˆ.

9Ngaˬ li‸ chi hkʼe bvuh‸ laˇ ve lehˬ, nawˬ hui hta‸ kawˆ tuˬ ngaˬ te gaˇ ve maˇ heˆ.

10Awˬ lawn kʼo, Yawˇ ve li‸ teˇ hpaˍ lehˬ kanˇ paˆ uiˍ leh hehnˇ jaˇ ve htawˇ, yawˇ awˬ to chehˇ taˍ ve teˇ yanˇ, awˬ gʼaˇ nuˇ leh, yawˇ kʼoˆ ve teˇ hpaˍ te‸ chiˉ awˬ bon maˇ cawˬ teh‸ chaw teˇ hpaˍ hpaˍ ngaˬ ve awˬ lawn chi hkʼe kʼoˆ chehˇ ve yoˬ.

11Ngaˬ hui nawˬ hui geh maˇ chehˇ ve teˇ yanˇ, ngaˬ hui nawˬ hui hta‸ li‸ bvuh‸ laˇ ve hkʼa shuˍ shuˍ, ngaˬ hui nawˬ hui geh chehˇ taˍ ve teˇ yanˇ htawˇ chi hkʼe te ve yoˬ teh‸, chaw oˇ ve teˇ hpaˍ hta‸ shiˍ piˇ-oˆ.

12A shu yawˇ awˬ to hta‸ chiˇ mvuh ve chaw teˇ hpaˍ ve awˬ moˍ awˬ hkʼaw lo lo‸-e tuˬ maˇ kʼoˆ, ngaˬ hui awˬ to yawˇ hui hta‸ tehˆ da‸ tuˬ maˇ kʼoˆ, ngaˬ hui te maˇ haˆ. Yawˇ hui lehˬ, a shu yawˇ awˬ to teˇ gʼaˇ leh teˇ gʼaˇ tehˆ da‸ leh, teˇ gʼaˇ leh teˇ gʼaˇ shuˍ da‸ ve hta‸ nyi ve pa taw, yawˇ hui cuˇ yiˍ maˇ cawˬ ve chaw hpeh‸ ve yoˬ.

13Ngaˬ hui lehˬ, nyi ma uiˍ ve awˬ hkʼaw lo kʼoˆ ponˬ kʼoˆ leuˉ ve teˇ ceuˬ maˇ te. Ya‸ hkʼaˇ, Gʼuiˬsha ngaˬ hui hta‸ kanˉ te kuiˬ pehˬ laˇ ve hkʼe ceh ngaˬ hui te tuˬ yoˬ. Ngaˬ hui htawˇ, yawˇ ngaˬ hui hta‸ pehˬ laˇ ve kanˉ te kuiˬ awˬ hkʼaw lo lo‸-e taˍ ve yoˬ.

14Nawˬ hui lehˬ, Gʼuiˬsha ngaˬ hui hta‸ pehˬ laˇ ve kanˉ te kuiˬ awˬ hkʼaw lo lo‸-e taˍ ve pa taw, yawˇ pe‸ laˇ ve kanˉ te kuiˬ hta‸ ngaˬ hui te ponˬ te leuˉ ve maˇ heˆ. Awˬ lawn kʼo, Hkri‸ ve ha lehˬ ve bon hkawˇ nawˬ hui geh hkʼa gaˬ awˉ lawˉ ca maˍ la ve lehˬ ngaˬ hui yoˬ.

15Shu te taˍ ve kanˉ hta‸ ngaˬ hui te ve hkʼe te leh, nyi ma uiˍ ve awˬ hkʼaw lo gʼaˇ hte‸ ca kʼoˆ ve maˇ heˆ. Nawˬ hui ve yonˍ ve teˇ ceuˬ uiˍ la maˇ la ve hkʼe, nawˬ hui hta‸ pa taw Gʼuiˬsha ngaˬ hui hta‸ pehˬ laˇ taˍ ve kanˉ te kuiˬ htawˇ leuˉ leh uiˍ la kʼehˬ la tuˬ ve hta‸ ngaˬ hui dawˇ law ve yoˬ.

16Chi hkʼe te ve kʼo, nawˬ hui ve chehˇ kuiˬ coˇ paˉ lo hkʼa gaˬ ngaˬ hui ha lehˬ ve bon hkawˇ gʼa maˍ piˇ tuˬ yoˬ. Awˬ lawn kʼo, shu kanˉ te kuiˬ lo shu te taˍ ve kanˉ hta‸ nyi ma uiˍ ve awˬ hkʼaw lo ngaˬ hui ca kʼoˆ tuˬ maˇ heˆ.

17Ya‸ hkʼaˇ, nyi ma uiˍ ve awˬ hkʼaw lo kʼoˆ ve chaw lehˬ, Jawˇmawˇ Gʼuiˬsha awˬ hkʼaw lo ceh tiˉ nyi ma uiˍ leh kʼoˆ loˬ.

18Awˬ lawn kʼo, a shu yawˇ awˬ to awˬ pon shaˉ hkiˆ hkanˍ ve chaw hta‸ Gʼuiˬsha nyi hkʼaˇ suh ve maˇ heˆ. Yawˇ awˬ pon Jawˇmawˇ Gʼuiˬsha shaˉ hkiˆ hkanˍ ve chaw hta‸ ceh tiˉ Gʼuiˬsha nyi hkʼaˇ suh ve yoˬ.

← Chapter 9 Jump to: Chapter 11 →