2 Corinthians 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Hkri‸ yaˇ teˇ hpaˍ hta‸ ga piˇ ve kanˉ awˬ lawn ngaˬ nawˬ hui hta‸ li‸ bvuh‸ laˇ tuˬ maˇ loˍ.

2Awˬ lawn kʼo, nawˬ hui lehˬ shu hta‸ ga piˇ gaˇ ve nyi ma cawˬ ve hta‸ ngaˬ shiˍ ve yoˬ. Nawˬ hui shu hta‸ ga piˇ gaˇ ve nyi ma cawˬ ve awˬ lawn ngaˬ Maˍkeˍdawˇniˆ chaw hui hta‸ hto piˇ leh nawˬ hui hta‸ ngaˬ chiˇ mvuh ve yoˬ. Aˍhkaˍyaˆ chaw teˇ hpaˍ lehˬ, aˉ nyi hkʼaw‸ htaˇ ka‸ gu taˍ hehnˇ taˍ peuˬ teh‸, yawˇ hui hta‸ ngaˬ kʼoˆ piˇ ve yoˬ. Nawˬ hui gʼaˇ hte‸ te ve teˇ ceuˬ lehˬ, yawˇ hui maˇ-awˍ ve hta‸ nawˍ piˇ peuˬ.

3Ya‸ hkʼaˇ, nawˬ hui awˬ lawn ngaˬ chiˇ mvuh ve lehˬ, kanˉ chi awˬ hkʼaw hkʼe leˇ maˇ gʼa hpeh‸ leh, ngaˬ kʼoˆ ve hkʼe nawˬ hui hkʼa deh‸ gu taˍ hehnˇ taˍ tuˬ, awˬ viˉ awˬ nyi chi teˇ hpaˍ hta‸ ngaˬ peu laˇ ve yoˬ.

4Maˇ heˆ kʼo, Maˍkeˍdawˇniˆ chaw teˇ hpaˍ hpaˍ ngaˬ geh teˇ geh laˬ leh, nawˬ hui maˇ gu maˇ hehnˇ taˍ ve hta‸ gʼa mawˬ ve teˇ yanˇ, nawˬ hui gʼa ya‸ taw ve ceh tiˉ maˇ heˆ. Ngaˬ hui htawˇ, nawˬ hui hta‸ yonˍ ve pa taw gʼa ya‸ taw tuˬ yoˬ.

5Chi hta‸ pa taw, awˉ lawˉ htaˇ ka‸ kʼoˆ taˍ ve awˬ bon uiˍ ve kanˉ chi teˇ maˬ hta‸ hkʼa deh‸ te peuˬ taˍ laˇ tuˬ, awˬ viˉ awˬ nyi teˇ hpaˍ hta‸ ngaˬ awˬ gʼuˇ suhˍ nawˬ hui geh peu kʼai cawˇ ve yoˬ teh‸ ngaˬ dawˇ leh, yawˇ hui hta‸ awˬ gʼaˇ piˇ ve yoˬ. Tanˇ tuˬ chi piˇ ve teˇ yanˇ, nawˬ hui hta‸ nyiˉ te ve teˇ ceuˬ maˇ gʼa hpeh‸ leh, ha lehˬ ha kʼa tanˇ piˇ tuˬ ve hta‸ ngaˬ heuˆ gaˇ ve yoˬ.

6Awˬ lawn chi ve lehˬ chi hkʼe yoˬ. A ciˉ ceh tiˉ sheˍ ve chaw lehˬ, a ciˉ ceh tiˉ gʼa gʼeu‸ tuˬ yoˬ. Maˇ chaweh sheˍ ve chaw lehˬ, maˇ chaweh gʼa gʼeu‸ tuˬ yoˬ.

7Chaw teˇ gʼaˇ le le, a shu yawˇ ve nyi ma hkʼaw dawˇ taˍ ve hkʼe tanˇ piˇ-oˆ. Dawˇ haˍ leh te ve maˇ kʼoˆ, gʼa te ve hta‸ pa taw te ve maˇ kʼoˆ, taˇ hpeh‸ piˇ. Awˬ lawn kʼo, ha lehˬ ha kʼa tanˇ piˇ ve chaw hta‸ Gʼuiˬsha ha‸ ve yoˬ.

8Nawˬ hui lehˬ, hkʼaˬ htaˆ ka‸ teˇ ceuˬ le le cawˬ law‸ leh, da‸ ve kanˉ teˇ ceuˬ le le awˬ hkʼaw lo biˇ la tuˬ, Gʼuiˬsha lehˬ nawˬ hui hta‸ awˬ bon teˇ ceuˬ le le maˇ chaweh piˇ hpeh‸ ve yoˬ.

9Li‸ hpu hkʼaw bvuh‸ taˍ ve hkʼe, Yawˇ maˇ chaweh sheˍ peuˬ. Haˍ ve gʼawˇ ve chaw hui hta‸ yawˇ piˇ peuˬ. Yawˇ ve hteˇ ve cawˇ ve teˇ ceuˬ lehˬ, co co taiˍ taiˍ yeˬ chehˇ ve yoˬ.

10Awˬ yawˇ sheˍ shehˍ hpaˇ hta‸ awˬ yawˇ ka‸ caˇ tuˬ dawˬ tuˬ ka‸ piˇ shehˍ hpaˇ lehˬ, nawˬ hui hta‸ awˬ yawˇ piˇ leh maˇ la piˇ tuˬ yoˬ. Nawˬ hui ve hteˇ ve cawˇ ve awˬ shiˍ teˇ hpaˍ hta‸ htawˇ yawˇ maˇ la piˇ tuˬ yoˬ.

11Hkʼa peu-eˬ awˬ hkʼaw lo nawˬ hui maˇ chaweh piˇ hpeh‸ tuˬ, teˇ ceuˬ le le awˬ hkʼaw lo nawˬ hui paw sha la tuˬ yoˬ. Chi hkʼe te ve lehˬ, ngaˬ hui hta‸ pa taw shu Gʼuiˬsha hta‸ chiˇ mvuh tuˬ awˬ pon te ve yoˬ.

12Awˬ lawn kʼo, shu hta‸ ga piˇ ve kanˉ chi lehˬ, Hkri‸ yaˇ teˇ hpaˍ loˍ ve hkʼe hkʼa biˇ ga piˇ ve ceh tiˉ maˇ heˆ, shu Gʼuiˬsha ve awˬ bon hta‸ maˇ maˇ chiˇ mvuh tuˬ htawˇ te ve yoˬ.

13Shu hta‸ ga piˇ ve kanˉ chi awˬ hkʼaw lo, nawˬ hui hkʼaˬ hkʼe ve chaw hpeh‸ ve hta‸ yawˇ hui shiˍ ve yoˬ. Awˬ lawn kʼo, Hkri‸ ve ha lehˬ ve bon hkawˇ hta‸ nawˬ hui ha‸ yuˬ leh awˬ hkʼaˇ suh te kʼai ve pa taw maˇ kʼoˆ, yawˇ hui hta‸ ka‸, awˬ kaˍ awˬ nu chaw hkʼa peu-eˬ hta‸ ka‸ nawˬ hui maˇ chaweh tanˇ piˇ ve pa taw maˇ kʼoˆ, yawˇ hui lehˬ Gʼuiˬsha hta‸ chiˇ uiˍ chiˇ mvuh ve yoˬ.

14Gʼuiˬsha nawˬ hui hta‸ uiˍ jaˇ maˇ jaˇ ve awˬ bon na‸ laˇ ve pa taw, yawˇ hui lehˬ nawˬ hui hta‸ dawˇ nawˇ jaˇ leh, nawˬ hui awˬ pon bon lawˬ tuˬ yoˬ.

15Ca kʼoˆ maˇ peuˬ ve la‸ shawnˍ Gʼuiˬsha pe‸ laˇ ve pa taw, yawˇ hta‸ chiˇ mvuh-o.

← Chapter 8 Jump to: Chapter 10 →