2 Corinthians 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Awˬ viˉ awˬ nyi teˇ hpaˍ-oˬ, Maˍkeˍdawˇniˆ mvuhˇmiˬ awˬ hkʼaw lo cawˬ ve Hkri‸ yaˇ awˬ moˍ teˇ hpaˍ hta‸ Gʼuiˬsha awˬ bon hkʼaˬ hkʼe na‸ piˇ ve awˬ lawn ngaˬ hui nawˬ hui hta‸ shiˍ piˇ lawˬ gaˇ ve yoˬ.

2Tu‸ ve hkanˍ ve maˇ maˇ yawˇ hui hta‸ lawˇ nyi ve htawˇ, yawˇ hui ha lehˬ jaˇ ve teˇ ceuˬ leh, haˍ gʼawˇ jaˇ ve teˇ ceuˬ awˬ hkʼaw lo, biˇ sheˆ htaˇ hkʼa gaˬ yawˇ hui mawˇ jeˬ maˇ maˇ tanˇ piˇ ve yoˬ.

3Awˬ lawn kʼo, yawˇ hui puiˉ ve hpeh‸ ve hkʼe tanˇ piˇ peuˬ. Puiˉ ve hpeh‸ ve hkʼe tanˇ piˇ ve awˬ hkʼoˆ ka‸, yawˇ hui hkʼaˇ yawˇ hui ha lehˬ ha kʼa kʼaw‸ tanˇ piˇ sheˍ ve hta‸ ngaˬ hui shaˉ hkiˆ hkanˍ ve yoˬ.

4Hkri‸ yaˇ teˇ hpaˍ hta‸ ga piˇ ve awˬ bon chi teˇ ceuˬ gʼa te tuˬ, a hkaw-anˬ pe‸ laˇ-oˆ teh‸, yawˇ hui ngaˬ hui hta‸ gʼaˇ hte‸ lawˬ hkawˉ ve yoˬ.

5Ngaˬ hui dawˇ law ve a‸ kehˉ ka‸ yawˇ hui te ve yoˬ. Awˬ lawn kʼo, Gʼuiˬsha ve a loˍ cawˇ ve hkʼe, yawˇ hui lehˬ awˉ lawˉ htaˇ Jawˇmawˇ Yeˍsuˆ hta‸ ka‸ ngaˬ hui hta‸ ka‸ a shu yawˇ awˬ to tanˇ ve yoˬ.

6Hkʼe te leh, Tiˇtuˆ lehˬ nawˬ hui awˬ hkʼaw lo awˉ lawˉ tanˬ te ve hkʼa shuˍ shuˍ, awˬ bon uiˍ ve kanˉ chi hta‸ te peuˬ tuˬ ngaˬ hui yawˇ hta‸ awˬ gʼaˇ piˇ ve yoˬ.

7Nawˬ hui lehˬ, teˇ ceuˬ le le awˬ hkʼaw lo, yonˍ ve maˇ kʼoˆ, tawˇ yaw ve maˇ kʼoˆ, cuˇ yiˍ maˇ kʼoˆ, gʼaˇ hte‸ coˇ caˇ ve maˇ kʼoˆ, nawˬ hui ngaˬ hui hta‸ ha‸ ve maˇ kʼoˆ nawˬ hui gʼaˇ hte‸ te taˍ ve hkʼe, awˬ bon uiˍ ve kanˉ chi teˇ maˬ hta‸ htawˇ gʼaˇ hte‸ te-o.

8Ngaˬ chi hkʼe kʼoˆ ve lehˬ, tawˇ piˇ ve hkʼe ngaˬ kʼoˆ ve maˇ heˆ. Shu coˇ caˇ ve awˬ lawn hta‸ ngaˬ kʼoˆ htaˇ, nawˬ hui ha‸ pehnˇ ve teˇ ceuˬ awˬ tehˬ awˬ na cawˬ ve hta‸ hkʼa tawˍ lehˆ tawˆ la tuˬ ngaˬ kʼoˆ ve yoˬ.

9Awˬ lawn kʼo, ngaˬ hui ve Jawˇmawˇ Yeˍsuˆ Hkri‸ ve awˬ bon hta‸ nawˬ hui shiˍ taˍ ve yoˬ. Yawˇ lehˬ paw sha chehˇ ve htawˇ, nawˬ hui awˬ pon haˍ ve gʼawˇ ve hta‸ hkanˍ leh, haˍ ve gʼawˇ ve oˇ ve hta‸ yawˇ hkanˍ ve pa taw, nawˬ hui paw sha la ve yoˬ.

10Chi awˬ lawn ngaˬ hkʼaˬ hkʼe dawˇ ve nawˬ hui hta‸ kʼaoˍ maˍ laˇ shaˍ. Awˉ lawˉ htaˇ nawˬ hui te gaˇ leh te ve awˬ hkʼaw lo, aˉ nyi hkʼaw‸ nawˬ hui tanˬ te laˬ ve hkʼe chi beu‸ te peuˬ piˇ-oˆ. Chi lehˬ, nawˬ hui awˬ pon da‸ ve yoˬ.

11Hkʼe te leh, awˉ lawˉ htaˇ nawˬ hui te gaˇ ve nyi ma cawˬ ve hkʼa shuˍ shuˍ, nawˬ hui te puiˉ te hpeh‸ ve hkʼe te peuˬ piˇ-oˆ.

12Awˬ lawn kʼo, chaw teˇ gʼaˇ cawˬ maˇ cawˬ ve hta‸ Gʼuiˬsha nyi ve maˇ heˆ. Te gaˇ ve nyi ma cawˬ ve kʼo, yawˇ ha‸ yuˬ ve yoˬ.

13Kanˉ chi hta‸ te ve awˬ hkʼaw lo awˬ kaˍ awˬ nu chaw teˇ hpaˍ awˬ pon sha leh, nawˬ hui awˬ pon haˍ jaˇ tuˬ ngaˬ te gaˇ ve maˇ heˆ.

14Ya‸ hkʼaˇ, hkʼa shuˍ shuˍ hpeh‸ la tuˬ ngaˬ te gaˇ ve yoˬ. Chi beu‸ nawˬ hui awˬ leuˉ cawˬ ve awˬ hkʼaw lo yawˇ hui loˍ ve cuˆ ve hta‸ ga piˇ leh, awˬ hkʼaw‸ nawˉ nawˬ hui loˍ ve cuˆ ve teˇ yanˇ, yawˇ hui awˬ leuˉ cawˬ ve awˬ hkʼaw lo nawˬ hui hta‸ kʼaw‸ ga laˇ leh, hkʼa shuˍ shuˍ hpeh‸ la tuˬ yoˬ.

15Li‸ hpu hkʼaw bvuh‸ taˍ ve hkʼe, Maˇ chaweh gʼawˆ yuˬ ve chaw lehˬ awˬ leuˉ maˇ cawˬ leh, a ciˉ ceh tiˉ gʼawˆ yuˬ ve chaw lehˬ loˍ ve cuˆ ve maˇ cawˬ teh‸ bvuh‸ taˍ ve yoˬ.

16Nawˬ hui awˬ pon ngaˬ nyi ma pfuhˇ ve hkʼe, Tiˇtuˆ htawˇ nyi ma pfuhˇ la tuˬ Gʼuiˬsha te piˇ ve pa taw, Gʼuiˬsha ve awˬ bon hta‸ chiˇ mvuh ve yoˬ.

17Tiˇtuˆ lehˬ, ngaˬ hui awˬ gʼaˇ piˇ ve tawˇ hkawˇ hta‸ na yuˬ ve awˬ hkʼoˆ ka‸, yawˇ nyi ma pfuhˇ jaˇ ve pa taw, yawˇ hkʼaˇ yawˇ nawˬ hui geh laˬ ve yoˬ.

18Ha lehˬ ve bon hkawˇ maˍ piˇ puiˉ ve hta‸ pa taw, Hkri‸ yaˇ awˬ moˍ hkʼa peu-eˬ chiˇ mvuh chehˇ ve awˬ viˉ awˬ nyi teˇ gʼaˇ hta‸ htawˇ, yawˇ geh teˇ geh ngaˬ hui kʼai tcuh ve yoˬ.

19Awˬ viˉ awˬ nyi oˇ ve teˇ gʼaˇ lehˬ, awˬ bon uiˍ ve kanˉ chi hta‸ ga te tuˬ, Hkri‸ yaˇ awˬ moˍ teˇ hpaˍ yawˇ hta‸ leuˆ yuˬ leh, ngaˬ hui geh teˇ geh kʼai tcuh ve yoˬ. Kanˉ chi hta‸ te ve lehˬ, Jawˇmawˇ Yeˍsuˆ ve awˬ me‸ awˬ hponˇ tawˆ la leh, shu hta‸ ga piˇ gaˇ ve nyi ma hkʼa tawˍ lehˆ tawˆ la tuˬ te ve yoˬ.

20Ngaˬ hui lehˬ, maˇ jaˇ ve tanˇ tuˬ chi teˇ hpaˍ hta‸ shaw leh pehˬ piˇ ve kanˉ hta‸ te ve awˬ hkʼaw lo, shu venˇbaˆ maˇ gʼa taˍ laˇ tuˬ ngaˬ hui shaˍ ti‸ taˍ ve yoˬ.

21Awˬ lawn kʼo, Jawˇmawˇ Yeˍsuˆ mehˆ gʼuˇ suhˍ ceh tiˉ maˇ heˆ, chaw yaˇ mehˆ gʼuˇ suhˍ htawˇ keunˍ ve cawˇ ve hta‸ te tuˬ ngaˬ hui dawˇ taˍ leh te ve yoˬ.

22Yawˇ huiˉ maˬ geh teˇ geh awˬ kaˍ awˬ nu awˬ viˉ awˬ nyi teˇ gʼaˇ hta‸ htawˇ ngaˬ hui kʼai tcuh ve yoˬ. Awˬ viˉ awˬ nyi chi teˇ gʼaˇ hta‸ laiˉ ceuˬ awˬ hkʼaw lo laiˉ pawˆ lawˇ nyi peuˬ leh, yawˇ nyi ma pfuhˇ jaˇ ve chaw teˇ gʼaˇ hpeh‸ ve hta‸ gʼa shiˍ ve yoˬ. Yawˇ nawˬ hui hta‸ yonˍ jaˇ ve pa taw, chi beu‸ leuˉ leh nyi ma pfuhˇ jaˇ ve yoˬ.

23Tiˇtuˆ awˬ lawn lehˬ chi hkʼe yoˬ. Yawˇ ngaˬ ve awˬ chawˇ hpeh‸ leh, nawˬ hui awˬ pon ngaˬ geh teˇ geh kanˉ te shehˍ hpaˇ hpeh‸ ve yoˬ. Awˬ viˉ awˬ nyi chi nyiˇ gʼaˇ lehˬ, Hkri‸ yaˇ awˬ moˍ teˇ hpaˍ peu laˇ ve chaw hpeh‸ leh, Hkri‸ ve awˬ me‸ awˬ hponˇ tawˆ la piˇ shehˍ hpaˇ hpeh‸ ve yoˬ.

24Hkʼe te leh, nawˬ hui ha‸ pehnˇ ve nyi ma cawˬ leh, nawˬ hui awˬ lawn chaw chi teˇ hpaˍ hta‸ ngaˬ hui chiˇ mvuh ve hkawˇ yaw ve lehˬ cawˇ ve yoˬ teh‸ yawˇ hui shiˍ hpeh‸ tuˬ, Hkri‸ yaˇ awˬ moˍ teˇ hpaˍ mehˆ gʼuˇ suhˍ nawˬ hui hkʼa deh‸ te-o.

← Chapter 7 Jump to: Chapter 9 →