2 Corinthians 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Gʼuiˬsha ha kʼaˉ laˇ ve pa taw, kanˉ chi ve hta‸ ngaˬ hui gʼa ve yoˬ. Hkʼe te leh, ngaˬ hui nyi ma maˇ luˬ,

2Ngaˬ hui lehˬ, faˉ taˍ ve awˬ ceuˬ leh ya‸ taw tuˬ ve awˬ ceuˬ teˇ hpaˍ hta‸ baˬ taˉ ve yoˬ. Heˍ ve maˇ kʼoˆ, Gʼuiˬsha ve tawˇ hkawˇ hta‸ yuˬ hpfuhˆ ve teˇ ceuˬ maˇ kʼoˆ, ngaˬ hui maˇ te. Ya‸ hkʼaˇ, hteˇ ve cawˇ ve teˇ ceuˬ hta‸ hkʼa tawˍ lehˆ hpeu‸ maˍ piˇ ve awˬ hkʼaw lo, Gʼuiˬsha mehˆ gʼuˇ suhˍ chaw hkʼa peu-eˬ ve shiˍ puiˉ ve nyi ma hta‸ cawˇ tuˬ ngaˬ hui te ve yoˬ.

3Ngaˬ hui maˍ chehˇ ve ha lehˬ ve bon hkawˇ lehˬ beh taˍ ve kʼo, luˬ kʼai sheˆ kʼai ve chaw hui awˬ pon ceh tiˉ beh taˍ ve yoˬ.

4Gʼuiˬsha ve awˬ ho‸ awˬ han hpeh‸ ve Hkri‸ ve awˬ me‸ awˬ hponˇ hta‸ caˉ da‸ ve ha lehˬ ve bon hkawˇ awˬ gʼeuˆ lehˬ, maˇ yonˍ ve chaw hui awˬ hkʼaw lo maˇ gʼa ba tuˬ, chi miˬguiˬ ve gʼuiˬsha lehˬ yawˇ hui ve nyi ma hta‸ naˆ ho‸ piˇ lawˬ ve yoˬ.

5Awˬ lawn kʼo, ngaˬ hui lehˬ ngaˬ hui awˬ to awˬ lawn bon maˍ ve maˇ heˆ. Yeˍsuˆ Hkri‸ lehˬ Jawˇmawˇ hpeh‸ ve awˬ lawn leh, ngaˬ hui Yeˍsuˆ awˬ pon nawˬ hui ve awˬ ceˬ hpeh‸ ve awˬ lawn ngaˬ hui bon maˍ ve yoˬ.

6Naˆ ho‸ ve awˬ hkʼaw lo awˬ gʼeuˆ ba tawˆ la tuˬ yoˬ teh‸ kʼoˆ ve Gʼuiˬsha lehˬ, ngaˬ hui ve nyi ma awˬ hkʼaw lo awˬ gʼeuˆ ba laˇ peuˬ. Chi hta‸ pa taw, Hkri‸ ve mehˆ hpfuhˇ awˬ hkʼaw lo cawˬ ve Gʼuiˬsha ve awˬ me‸ awˬ hponˇ hta‸ shu gʼa shiˍ tuˬ, ngaˬ hui awˬ gʼeuˆ ba piˇ chehˇ ve yoˬ.

7Ya‸ hkʼaˇ, uiˍ jaˇ da‸ jaˇ ve kanˇ paˆ chi lehˬ, ngaˬ hui lo tawˆ la ve maˇ heˆ. Gʼuiˬ sha geh lo tawˆ la ve yoˬ teh‸, hpeu‸ maw piˇ tuˬ awˬ pon, awˬ hpfuhˇ hkʼaˆ jaˇ ve mawˇ chi lehˬ, je‸ mu‸ hkʼu awˬ hkʼaw lo ngaˬ hui cawˬ taˍ ve yoˬ.

8Ngaˬ hui lehˬ, teˇ hpawˇ le le lo nyiˉ tiˍ taˍ laˇ ve hta‸ gʼa hkanˍ ve htawˇ, hoˆ tiˍ taˍ laˇ ve maˇ heˆ. Dawˇ maˇ tawˆ ve htawˇ, dawˇ tui‸ gaˇ tui‸ htaˇ hkʼa gaˬ maˇ heˆ.

9Fawˉ mehˍ laˇ ve hta‸ gʼa hkanˍ ve htawˇ, ga laˇ paˍ maˇ cawˬ ve maˇ heˆ. Shu dawˆ baˬ laˇ ve htawˇ, luˬ kʼai htaˇ hkʼa gaˬ maˇ heˆ.

10Yeˍsuˆ ve te‸ ve teˇ ceuˬ lehˬ, ngaˬ hui ve awˬ to awˬ hkʼaw lo hkʼa tawˍ lehˆ tawˆ la hpeh‸ tuˬ, Yeˍsuˆ ve suh ve teˇ ceuˬ hta‸ ngaˬ hui ve awˬ to awˬ hkʼaw lo hkʼaˬ htaˆ ka‸ pfuhˇ taˍ ve yoˬ.

11Awˬ lawn kʼo, Yeˍsuˆ ve te‸ ve teˇ ceuˬ lehˬ, ngaˬ hui ve suh puiˉ ve awˬ to awˬ hkʼaw lo hkʼa tawˍ lehˆ tawˆ la hpeh‸ tuˬ, ngaˬ hui te‸ chehˇ ve teˇ yanˇ, Yeˍsuˆ awˬ pon suh tuˬ hkʼaˬ htaˆ ka‸ chiˇ a‸ piˇ ve hta‸ ngaˬ hui gʼa hkanˍ ve yoˬ.

12Hkʼe te leh, ngaˬ hui awˬ hkʼaw lo suh ve teˇ ceuˬ kanˉ te chehˇ ve yoˬ. Ya‸ hkʼaˇ, nawˬ hui awˬ hkʼaw lo lehˬ, te‸ ve teˇ ceuˬ kanˉ te chehˇ ve yoˬ.

13Ngaˬ hui yonˍ ve hta‸ pa taw ngaˬ hui kʼoˆ taˍ ve yoˬ teh‸, Li‸ hpu hkʼaw bvuh‸ taˍ ve hkʼa shuˍ shuˍ, ngaˬ hui htawˇ yonˍ ve nyi ma cawˬ ve pa taw, yonˍ ve awˬ hkʼaw lo ngaˬ hui kʼoˆ ve yoˬ.

14Jawˇmawˇ Yeˍsuˆ hta‸ kʼaw‸ te‸ tu la piˇ shehˍ hpaˇ lehˬ, ngaˬ hui hta‸ htawˇ Yeˍsuˆ geh teˇ geh kʼaw‸ te‸ tu la piˇ lawˬ leh, nawˬ hui geh teˇ geh yawˇ mehˆ gʼuˇ suhˍ lo ngaˬ hui hta‸ chehˇ tcuh laˇ tuˬ yoˬ teh‸ ngaˬ hui shiˍ ve yoˬ.

15Chi hkʼa peu-eˬ lehˬ, nawˬ hui awˬ pon hpeh‸ ve yoˬ. Awˬ lawn kʼo, Gʼuiˬsha ve awˬ bon shaˬ te shaˬ maˇ la ve hkʼe, shu yawˇ hta‸ shaˬ te shaˬ chiˇ mvuh ve awˬ hkʼaw lo yawˇ awˬ me‸ awˬ hponˇ gʼa tuˬ yoˬ.

16Hkʼe te leh, ngaˬ hui nyi ma maˇ luˬ. Ngaˬ hui lehˬ, awˬ suhˍ awˬ shaˍ hpawˇ luˬ kʼai chehˇ ve htawˇ, co ha hpawˇ lehˬ teˇ nyi peuˬ teˇ nyi awˬ suhˉ kʼaw‸ hpeh‸ la chehˇ ve yoˬ.

17Chi beu‸ gʼa hkanˍ chehˇ ve i jaˇ lawˬ jaˇ ve tu‸ ve hkanˍ ve teˇ ceuˬ lehˬ, ca tehˆ nyi maˇ gʼa ve uiˍ jaˇ biˇ jaˇ ve co co taiˍ taiˍ awˬ me‸ awˬ hponˇ ngaˬ hui awˬ pon te laˇ chehˇ ve yoˬ.

18Awˬ lawn kʼo, mawˬ hpeh‸ ve awˬ ceuˬ teˇ hpaˍ hta‸ ngaˬ hui nyi ve maˇ heˆ. Maˇ mawˬ hpeh‸ ve awˬ ceuˬ teˇ hpaˍ hta‸ ngaˬ hui nyi ve yoˬ. Mawˬ hpeh‸ ve awˬ ceuˬ teˇ hpaˍ lehˬ, teˇ hkui tiˉ cawˬ ve yoˬ. Ya‸ hkʼaˇ, maˇ mawˬ hpeh‸ ve awˬ ceuˬ teˇ hpaˍ lehˬ, co co taiˍ taiˍ cawˬ chehˇ ve yoˬ

← Chapter 3 Jump to: Chapter 5 →