2 Corinthians 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Cuˇ yiˍ maˇ cawˬ ve tawˇ hkawˇ ngaˬ a ciˉ bvuh‸ laˇ ve hta‸ nawˬ hui yeunˇ hkanˍ tuˬ ngaˬ dawˇ law ve yoˬ. Awˬ tehˬ awˬ na nawˬ hui a ciˉ yeunˇ hkanˍ laˇ sheˍ.

2Gʼuiˬsha nawˬ hui hta‸ sheˉ lai ve hkʼe, ngaˬ htawˇ nawˬ hui hta‸ sheˉ lai ve yoˬ. Awˬ lawn kʼo, nawˬ hui lehˬ da‸ kehˬ ve yaˇ miˇ haˉ hkʼa shuˍ shuˍ hpeh‸ leh, Hkri‸ hta‸ chiˇ a‸ piˇ tuˬ awˬ pon ngaˬ nawˬ hui hta‸ awˬ hpawˇ teˇ gʼaˇ tiˉ hta‸ caˉ da‸ piˇ peuˬ.

3Ya‸ hkʼaˇ, vuiˬ lehˬ heˍ ve awˬ hkʼaw lo Eˇva‸ hta‸ beˬ yuˬ ve hkʼe, nawˬ hui ve dawˇ hkʼaˇ luˬ kʼai leh, Hkri‸ hta‸ da‸ ve kehˬ ve awˬ hkʼaw lo ha‸ ve teˇ ceuˬ mehˉ kʼai puiˉ-aˆ teh‸ ngaˬ dawˇ haˍ ve yoˬ.

4Awˬ lawn kʼo, chaw teˇ gʼaˇ gʼaˇ nawˬ hui geh laˬ leh, ngaˬ maˍ ve Yeˍsuˆ teˇ gʼaˇ awˬ lawn hta‸ maˇ maˍ leh awˬ kaˍ awˬ nu Yeˍsuˆ teˇ gʼaˇ awˬ lawn maˍ ve maˇ kʼoˆ, nawˬ hui gʼa peuˬ ve awˬ ha maˇ heˆ leh awˬ kaˍ awˬ nu awˬ ha hta‸ gʼa ve maˇ kʼoˆ, nawˬ hui ha‸ yuˬ peuˬ ve ha lehˬ ve bon hkawˇ maˇ heˆ leh awˬ kaˍ awˬ nu ve bon hkawˇ hta‸ ha‸ yuˬ ve maˇ kʼoˆ, nawˬ hui hkʼa deh‸ yeunˇ hkanˍ ve law.

5Ngaˬ lehˬ, uiˍ ve mvuh ve tcuh yaˇ oˇ ve teˇ hpaˍ awˬ hawˉ lo a ciˉ ka‸ maˇ chehˇ ve teh‸ ngaˬ dawˇ ve yoˬ.

6Tawˇ yaw ve awˬ hkʼaw lo ngaˬ maˇ puiˉ ve htawˇ, cuˇ yiˍ hpawˇ ngaˬ puiˉ ve yoˬ. Ngaˬ chi hkʼe puiˉ ve yoˬ teh‸, teˇ ceuˬ le le awˬ hkʼaw lo ngaˬ nawˬ hui hta‸ hkʼa tawˍ lehˆ hpeu‸ maˍ laˇ peuˬ.

7Nawˬ hui hta‸ chiˇ uiˍ piˇ tuˬ, ngaˬ awˬ to hta‸ nehˬ piˇ lawˬ leh, awˬ hpfuhˇ maˇ yuˬ ve awˬ hkʼaw lo Gʼuiˬsha ve ha lehˬ ve bon hkawˇ nawˬ hui hta‸ maˍ laˇ ve pa taw, ngaˬ venˇbaˆ te ve leh laˇ.

8Ngaˬ nawˬ hui awˬ pon kanˉ te hpeh‸ tuˬ, awˬ kaˍ awˬ nu Hkri‸ yaˇ awˬ moˍ teˇ hpaˍ geh hpu hta‸ ngaˬ ha‸ yuˬ ve lehˬ, yawˇ hui ve mawˇ hta‸ hiˉ yuˬ ve hkʼe yoˬ.

9Ngaˬ nawˬ hui geh chehˇ leh teˇ ceuˬ ceuˬ loˍ ve teˇ yanˇ, nawˬ hui hta‸ ngaˬ sho‸ sha‸ tuˬ maˇ te. Awˬ lawn kʼo, Maˍkeˍdawˇniˆ mvuhˇmiˬ lo laˬ ve awˬ viˉ awˬ nyi teˇ hpaˍ lehˬ, ngaˬ hkʼa loˍ ve teˇ hpaˍ hta‸ pe‸ laˇ ve yoˬ. Hkʼe te leh, nawˬ hui hta‸ ngaˬ a ciˉ ka‸ maˇ gʼa sho‸ sha‸ tuˬ ngaˬ te taˍ leh, awˬ gʼuˇ suhˍ hpawˇ htawˇ ngaˬ te tuˬ yoˬ.

10Hkri‸ ve hteˇ ve cawˇ ve awˬ ceuˬ ngaˬ awˬ hkʼaw lo cawˬ ve hkʼe, ngaˬ chi hkʼe nyi ma uiˍ kuiˬ cawˬ leh kʼoˆ ve tawˇ hkawˇ hta‸, Aˍhkaˍyaˆ mvuhˇ miˬ awˬ hkʼaw lo chaw teˇ gʼaˇ ka‸ tawˍ taˍ maˇ gʼa.

11Aˬ hto‸ ma hta‸ pa taw le. Ngaˬ nawˬ hui hta‸ maˇ ha‸ ve pa taw laˇ. Ngaˬ nawˬ hui hta‸ ha‸ ve yoˬ teh‸ Gʼuiˬsha shiˍ taˍ ve yoˬ.

12Ponˬ la htaˇ ngaˬ te chehˇ ve hkʼe, awˬ gʼuˇ suhˍ hpawˇ htawˇ kʼaw‸ te kʼai tuˬ sheˍ ve yoˬ. Aˬ hto‸ ma hta‸ pa taw le teh‸ kʼoˆ kʼo, nyi ma uiˍ ve awˬ hkʼaw lo chaw teˇ hpaˍ hpaˍ lehˬ, ngaˬ hui hkʼa shuˍ shuˍ kanˉ te chehˇ ve yoˬ teh‸ maˇ gʼa kʼaw‸ kʼoˆ hpeh‸ tuˬ, ngaˬ chi hkʼe te ve yoˬ.

13Awˬ lawn kʼo, chi hkʼe ve chaw teˇ hpaˍ lehˬ, maˇ heˆ heˆ ve tcuh yaˇ teˇ hpaˍ hpeh‸ ve yoˬ. Yawˇ hui lehˬ, Hkri‸ ve tcuh yaˇ hpeh‸ ve hkʼe te leh, heˍ puiˉ ve kanˉ te shehˍ hpaˇ teˇ hpaˍ hpeh‸ ve yoˬ.

14Yawˇ hui chi hkʼe te ve lehˬ, anˇ tuˬ maˇ cawˬ. Awˬ lawn kʼo, Saˍtanˍ ka‸ awˬ gʼeuˆ ba ve mvuhˇ naw ma tcuh yaˇ hpeh‸ ve hkʼa shuˍ shuˍ te puiˉ ve yoˬ.

15Hkʼe te leh, yawˇ ve awˬ ceˬ teˇ hpaˍ htawˇ, hteˇ ve cawˇ ve awˬ ceˬ hpeh‸ ve hkʼe te ve kʼo, anˇ tuˬ uiˍ ve teˇ ceuˬ hpeh‸ ve maˇ heˆ, Yawˇ hui kanˉ te ve hkʼe, awˬ leh meuˇ gaˬ kʼo gʼa hkanˍ tuˬ yoˬ.

16Ngaˬ teˇ pawˆ kʼaw‸ kʼoˆ shaˍ. Ngaˬ cuˇ yiˍ maˇ cawˬ ve chaw hpeh‸ ve yoˬ teh‸ chaw teˇ gʼaˇ ka‸ taˇ dawˇ. Ya‸ hkʼaˇ, nawˬ hui chi hkʼe dawˇ ve ka‸, ngaˬ nyi ma uiˍ ve awˬ hkʼaw lo tawˇ a ciˉ yaw hpeh‸ tuˬ, cuˇ yiˍ maˇ cawˬ ve chaw teˇ gʼaˇ hkʼe ngaˬ hta‸ ha‸ yuˬ laˇ sheˍ.

17(Ngaˬ chi hkʼe kʼoˆ ve lehˬ, Jawˇmawˇ Yeˍsuˆ ngaˬ hta‸ kʼoˆ tcuh laˇ leh kʼoˆ ve maˇ heˆ. Cuˇ yiˍ maˇ cawˬ ve chaw hkʼe, nyi ma ha‸ hanˉ ve awˬ hkʼaw lo ngaˬ nyi ma uiˍ chaweh te leh kʼoˆ ve yoˬ.

18Chaw laiˉ gʼaˇ lehˬ, awˬ suhˍ awˬ shaˍ hpawˇ awˬ lawn nyi ma uiˍ ve awˬ hkʼaw lo kʼoˆ ve hkʼe, ngaˬ htawˇ nyi ma uiˍ ve awˬ hkʼaw lo kʼoˆ tuˬ yoˬ.)

19Nawˬ hui cuˇ yiˍ cawˬ ve chaw hpeh‸ ve pa taw, cuˇ yiˍ maˇ cawˬ ve chaw hui hta‸ nawˬ hui ha lehˬ ha kʼa yeunˇ hkanˍ ve law.

20Awˬ lawn kʼo, chaw teˇ gʼaˇ gʼaˇ nawˬ hui hta‸ awˬ ceˬ te tcuh ve maˇ kʼoˆ, nawˬ hui hta‸ hiˉ caˇ ve maˇ kʼoˆ, nawˬ hui hta‸ heˍ caˇ ve maˇ kʼoˆ, a shu yawˇ awˬ to hta‸ chiˇ uiˍ chiˇ mvuh ve maˇ kʼoˆ, nawˬ hui ve mehˆ hpfuhˇ hta‸ hta ve maˇ kʼoˆ, nawˬ hui yeunˇ hkanˍ chehˇ ve yoˬ.

21Nawˬ hui hta‸ oˇ hkʼe te laˇ tuˬ ngaˬ hui awˬ gʼaˇ nuˇ ve yoˬ teh‸, ya‸ taw ve awˬ hkʼaw lo ngaˬ gʼa kʼoˆ ve yoˬ. Ya‸ hkʼaˇ, teˇ ceuˬ ceuˬ awˬ lawn hta‸ chaw teˇ gʼaˇ gʼaˇ nyi ma uiˍ ve awˬ hkʼaw lo kʼoˆ haˆ ve kʼo, ngaˬ htawˇ nyi ma uiˍ ve awˬ hkʼaw lo awˬ lawn oˇ ve hta‸ kʼoˆ haˆ ve yoˬ. (Ngaˬ chi hkʼe kʼoˆ ve lehˬ, cuˇ yiˍ maˇ cawˬ ve chaw hkʼe ngaˬ kʼoˆ ve yoˬ.)

22Yawˇ hui Heˍbrehˇ chaw hpeh‸ ve laˇ. Ngaˬ htawˇ hpeh‸ ve yoˬ. Yawˇ hui Iˉsaˍreˍlaˆ chaw hpeh‸ ve laˇ. Ngaˬ htawˇ hpeh‸ ve yoˬ. Yawˇ hui Aˍbraˍhanˍ ve awˬ ceuˬ awˬ hkʼaˇ hpeh‸ ve laˇ. Ngaˬ htawˇ hpeh‸ ve yoˬ.

23Yawˇ hui Hkri‸ ve awˬ ceˬ hpeh‸ ve laˇ. Yawˇ hui a‸ kehˉ leuˉ leh ngaˬ Hkri‸ ve awˬ ceˬ hpeh‸ ve yoˬ. (Ngaˬ chi hkʼe kʼoˆ ve lehˬ, chaw gʼuˇ hkʼe kʼoˆ chehˇ ve yoˬ.) Shu a‸ kehˉ leuˉ leh ngaˬ kanˉ te ve yoˬ. Shu a‸ kehˉ leuˉ leh ngaˬ htawnˍ hkʼaw gʼa chehˇ jaw ve yoˬ. Gʼaw maˇ peuˬ htaˇ hkʼa gaˬ dawˆ laˇ jaw‸ laˇ ve hta‸ ngaˬ gʼa hkanˍ jaw ve yoˬ. Suh paˇ neˇ ve ka‸ laiˉ pawˆ ngaˬ cawˬ jaw ve yoˬ.

24Yuˇda‸ chaw hui ngaˬ hta‸ shehˆ chi kʼawˇ hkʼe jaw‸ laˇ ve, ngaˇ pawˆ hkʼa gaˬ ngaˬ gʼa hkanˍ jaw peuˬ.

25Shehˆ pawˆ hkʼa gaˬ gawˇ taˬ jaw‸ laˇ ve hta‸ ngaˬ gʼa hkanˍ leh, haˉ pui baˬ laˇ ve hta‸ ka‸ ngaˬ teˇ pawˆ gʼa hkanˍ jaw peuˬ. Shehˆ pawˆ hkʼa gaˬ haw lo‸ kʼoˍ luˬ kʼai ve hta‸ ngaˬ gʼa hkanˍ jaw peuˬ. Teˇ nyi teˇ haˉ laˇ tsuhˇ gʼuiˬ awˬ hkʼaw lo ngaˬ gʼa chehˇ jaw peuˬ.

26Laiˉ pawˆ ngaˬ ca te toˇ jaw peuˬ. Iˉ kaˆ lawˬ hta‸ hkanˍ ve awˬ hkʼaw lo kawˆ tuˬ cawˬ ve, Chaw hkʼawˇ hta‸ kawˆ tuˬ cawˬ ve, ngaˬ ve chaw ceuˬ hta‸ kawˆ tuˬ cawˬ ve, buiˇ shaˆ aˉ naˆ chaw hui hta‸ kawˆ tuˬ cawˬ ve, venˇ hkʼaˆ teˇ hpaˍ awˬ hkʼaw lo kawˆ tuˬ cawˬ ve, heh puiˉ hkʼaw lo kawˆ tuˬ cawˬ ve, laˇ tsuhˇ gʼuiˬ awˬ hkʼaw lo kawˆ tuˬ cawˬ ve, maˇ heˆ heˆ ve awˬ viˉ awˬ nyi teˇ hpaˍ hta‸ kawˆ tuˬ cawˬ ve, chi teˇ hpaˍ hta‸ htawˇ ngaˬ gʼa hpuˇ jaw peuˬ.

27Kanˉ te hkeu‸ leh heuˬ jaˇ ve, laiˉ pawˆ maˇ gʼa zuh‸ ve, awˍ meu‸ ve leh iˉ kaˆ shiˉ ve, laiˉ pawˆ caˇ tuˬ maˇ cawˬ ve, kaˆ ve leh veu‸ kʼaˇ maˇ cawˬ ve, chi teˇ hpaˍ hta‸ htawˇ ngaˬ gʼa hkanˍ jaw peuˬ.

28Awˬ ceuˬ chi ve teˇ hpaˍ hta‸ ngaˬ gʼa hkanˍ ve awˬ hkʼoˆ ka‸, Hkri‸ yaˇ awˬ moˍ hkʼa peu-eˬ awˬ pon dawˇ haˍ dawˇ hkiˉ ve teˇ hpaˍ htawˇ, teˇ nyi le le ngaˬ hta‸ nyiˉ tiˍ taˍ laˇ ve yoˬ.

29Chaw teˇ gʼaˇ gʼaˇ awˬ gʼaˇ nuˇ ve kʼo, ngaˬ htawˇ awˬ gʼaˇ maˇ nuˇ leh laˇ. Chaw teˇ gʼaˇ gʼaˇ ya‸ kʼai ve kʼo, ngaˬ maˇ hpeh‸ bawˬ leh laˇ.

30Ngaˬ nyi ma uiˍ ve awˬ hkʼaw lo tawˇ gʼa yaw ve kʼo, ngaˬ awˬ gʼaˇ nuˇ ve teˇ hpaˍ awˬ lawn ceh, nyi ma uiˍ ve awˬ hkʼaw lo tawˇ yaw tuˬ yoˬ.

31Ngaˬ heˍ ve maˇ heˆ teh‸, co co taiˍ taiˍ awˬ bon uiˍ shehˍ hpaˇ Jawˇmawˇ Yeˍsuˆ ve Awˬ pa Gʼuiˬsha shiˍ taˍ ve yoˬ.

32Daˍmaˍsehˆ venˇ awˬ hkʼaw lo ngaˬ hta‸ hpeh yuˬ tuˬ, hkunˉ hawˉ hkanˇ Aˍreˍtaˆ awˬ hawˉ ve mvuhˇmiˬ jawˇmawˇ lonˉ lehˬ, Daˍmaˍsehˆ venˇ hta‸ shaw tcuh taˍ ve yoˬ.

33Ya‸ hkʼaˇ, shu ngaˬ hta‸ hkʼaˉ puˍ lu awˬ hkʼaw keu leh, lanˇ venˇ yehˬ miˉ ehˉ awˬ hpe‸ lo ngaˬ hta‸ hpehˇ ya‸-e laˇ ve hta‸ pa taw, mvuhˇmiˬ jawˇmawˇ lonˉ ve la‸ sheh awˬ hkʼaw lo ngaˬ gʼa ponˬ ve yoˬ.

← Chapter 10 Jump to: Chapter 12 →