2 Corinthians 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Ngaˬ hui Gʼuiˬsha geh teˇ geh kanˉ te ve awˬ hkʼaw lo, nawˬ hui yawˇ ve awˬ bon hta‸ ha‸ yuˬ ve teˇ ceuˬ hkʼe leˇ maˇ gʼa hpeh‸ la tuˬ, ngaˬ hui nawˬ hui hta‸ lawˬ hkawˉ ve yoˬ.

2Awˬ lawn kʼo, yawˇ kʼoˆ taˍ ve, Cawˇ ve awˬ yanˇ awˬ hkʼaw lo ngaˬ nawˬ ve hkawˇ hta‸ na yuˬ ve yoˬ. Htaiˍ hkʼaw‸ ve awˬ nyi awˬ hkʼaw lo ngaˬ nawˬ hta‸ ga laˇ ve yoˬ. teh‸ kʼoˆ ve yoˬ. Chi beu‸ lehˬ cawˇ ve awˬ yanˇ hpeh‸ ve yoˬ. Ya‸ nyi lehˬ htaiˍ hkʼaw‸ ve awˬ nyi hpeh‸ ve yoˬ.

3Ngaˬ hui kanˉ te ve hta‸ shu venˇbaˆ taˍ maˇ hpeh‸ tuˬ, chaw teˇ gʼaˇ ka‸ hkui htiˇ poˬ tuˬ ve hta‸ ngaˬ hui a ciˉ ka‸ maˇ te.

4Ngaˬ hui lehˬ, awˬ tehˬ awˬ na Gʼuiˬsha ve kanˉ te paˍ hpeh‸ ve hta‸ shu shiˍ hpeh‸ tuˬ, teˇ ceuˬ le le awˬ hkʼaw lo ngaˬ hui te ve yoˬ. Gʼaˇ hte‸ yeunˇ hkanˍ ve, tu‸ ve hkanˍ ve, dawˇ tui‸ gaˇ tui‸ ve, haˍ jaˇ ve,

5dawˆ laˇ jaw‸ laˇ ve, htawnˍ hkʼaw keu laˇ ve, shu duiˆ-ehˍ shaˇ-ehˍ te ve, kanˉ te hkeu‸ ve, maˇ gʼa zuh‸ ve leh, meu‸ ve kaˆ ve, chi teˇ hpaˍ hta‸ gʼa hkanˍ ve awˬ hkʼaw lo ngaˬ hui te ve yoˬ.

6Da‸ kehˬ ve nyi ma cawˬ ve, shiˍ puiˉ ve, dawˇ zuhˬ gaˇ zuhˬ ve, shu awˬ pon da‸ ve hta‸ te ve, da‸ ve kehˬ ve Awˬ ha hpu hta‸ cuˇ ve, awˬ tehˬ awˬ na ha‸ ve, hteˇ lehˍ cawˇ lehˍ maˍ piˇ ve,

7Gʼuiˬsha ve kanˇ paˆ hta‸ cuˇ ve, hteˇ ve cawˇ ve la‸ caˉ teˇ hpaˍ hta‸ la‸ sha paˉ la‸ mehˍ paˉ vawˆ taˍ ve awˬ hkʼaw lo,

8awˬ me‸ awˬ hponˇ gʼa ve maˇ kʼoˆ, shu maˇ shawˍ maˇ caˆ te laˇ ve maˇ kʼoˆ, shu chiˇ mvuh laˇ ve maˇ kʼoˆ, shu hkʼaiˉ laˇ ve maˇ kʼoˆ, ngaˬ hui te ve yoˬ. Shu hta‸ heˍ yuˬ beˬ yuˬ ve chaw hkʼe, shu ngaˬ hui hta‸ shawˍ laˇ ve htawˇ, hteˇ lehˍ cawˇ lehˍ ngaˬ hui te ve yoˬ.

9Ngaˬ hui hta‸ shu maˇ shiˍ ve chaw hkʼe hpeh‸ ve htawˇ, shu hkʼa peu-eˬ shiˍ ve chaw hpeh‸ ve yoˬ. Suh paˇ neˇ ve chaw hkʼe hpeh‸ ve htawˇ, te‸ chehˇ ve chaw hpeh‸ ve yoˬ. Ciˍ yanˍ ve hta‸ gʼa hkanˍ ve chaw hkʼe hpeh‸ ve htawˇ, tiˇ pehˍ laˇ ve hta‸ maˇ gʼa hkanˍ.

10Dawˇ haˍ ve chaw hkʼe hpeh‸ ve htawˇ, hkʼaˬ htaˆ ka‸ ha lehˬ chehˇ ve yoˬ. Haˍ gʼawˇ ve chaw hkʼe hpeh‸ ve htawˇ, chaw maˇ maˇ hta‸ paw sha la piˇ ve yoˬ. Te‸ chiˉ maˇ cawˬ ve chaw hkʼe hpeh‸ ve htawˇ, teˇ ceuˬ le le cawˬ ve chaw hpeh‸ ve yoˬ.

11Kawˇrenˍhtuˆ chaw teˇ hpaˍ-oˬ, ngaˬ hui nawˬ hui hta‸ te‸ chiˉ ka‸ maˇ faˉ taˍ leh, hkʼa tawˍ lehˆ hto laˇ ve yoˬ. Ngaˬ hui ve nyi ma awˬ hkʼaw lo nawˬ hui hkʼa peu-eˬ hta‸ ha‸ ve teˇ ceuˬ uiˍ jaˇ ve yoˬ.

12Ngaˬ hui ve nyi ma awˬ hkʼaw lo nawˬ hui hta‸ ha‸ ve teˇ ceuˬ i ve maˇ heˆ. Ya‸ hkʼaˇ, nawˬ hui ngaˬ hui hta‸ ha‸ ve teˇ ceuˬ i jaˇ ve yoˬ.

13Nawˬ hui htawˇ ngaˬ hui hta‸ kʼaw‸ ha‸ laˇ-oˆ. Chi hkʼe kʼoˆ ve lehˬ, a shu yawˇ ve yaˇ teˇ hpaˍ hta‸ kʼoˆ piˇ ve hkʼe ngaˬ kʼoˆ ve yoˬ.

14Maˇ yonˍ ve chaw teˇ hpaˍ hta‸ taˇ caˉ da‸, taˇ pawnˇ da‸. Awˬ lawn kʼo, hteˇ ve cawˇ ve teˇ ceuˬ lehˬ, maˇ hteˇ maˇ cawˇ ve teˇ ceuˬ hta‸ hkʼaˬ hkʼe te caˉ da‸ hpeh‸ tuˬ le. Awˬ gʼeuˆ lehˬ, naˆ ho‸ ve hta‸ hkʼaˬ hkʼe te awˬ chawˇ te da‸ hpeh‸ tuˬ le.

15Hkri‸ lehˬ Beˍleˍlaˆ hta‸ hkʼaˬ hkʼe te cawˇ da‸ hawˍ da‸ hpeh‸ tuˬ le. Yonˍ ve chaw lehˬ, maˇ yonˍ ve chaw geh hkʼaˬ hkʼe te leh nyi ma teˇ shiˍ tiˉ taˍ hpeh‸ tuˬ le.

16Gʼuiˬsha ve bon yehˬ lonˉ lehˬ, shaˉ ho‸ shaˉ nanˉ teˇ hpaˍ hta‸ hkʼaˬ hkʼe te cawˇ da‸ hpeh‸ tuˬ le. Awˬ lawn kʼo, ngaˬ hui lehˬ te‸ chehˇ ve Gʼuiˬsha ve bon yehˬ lonˉ hpeh‸ ve yoˬ. Gʼuiˬsha chi hkʼe kʼoˆ taˍ ve, Ngaˬ yawˇ hui awˬ hkʼaw lo chehˇ leh, yawˇ hui geh ngaˬ te toˇ tuˬ yoˬ. Ngaˬ lehˬ yawˇ hui ve Gʼuiˬsha hpeh‸ leh, yawˇ hui htawˇ ngaˬ ve chaw hpeh‸ tuˬ yoˬ.

17Hkʼe te leh, yawˇ hui awˬ hkʼaw lo tawˆ la leh yawˇ hui hta‸ hpaˆ da‸ chehˇ taˍ-o‸ teh‸ Jawˇmawˇ Gʼuiˬsha kʼoˆ ve yoˬ. Cha‸ chiˆ ve teˇ ceuˬ hta‸ taˇ htawˇ, Maˇ htawˇ ve kʼo, ngaˬ nawˬ hui hta‸ ha‸ yuˬ laˇ tuˬ yoˬ.

18Ngaˬ lehˬ nawˬ hui ve awˬ pa hpeh‸ leh, nawˬ hui htawˇ ngaˬ ve yaˇ paˍ yaˇ miˇ teˇ hpaˍ hpeh‸ tuˬ yoˬ teh‸, kanˇ paˆ hkʼa biˇ cawˬ ve Jawˇmawˇ Gʼuiˬsha kʼoˆ ve yoˬ.

← Chapter 5 Jump to: Chapter 7 →