2 Corinthians 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Hkʼe te leh, ha‸ ve chaw teˇ hpaˍ-oˬ, ngaˬ hui lehˬ ka ti‸ tawˇ hkawˇ chi teˇ hpaˍ hta‸ gʼa taˍ ve pa taw, ngaˬ hui ve awˬ to leh nyi ma hta‸ cha‸ chiˆ tuˬ te ve teˇ ceuˬ le le hta‸ tsuhˇ baˬ leh, Gʼuiˬsha hta‸ kawˆ leh yawˆ yan ve awˬ hkʼaw lo, da‸ ve kehˬ ve teˇ ceuˬ hta‸ biˇ la piˇ-a veuˬ.

2Nyi ma awˬ hkʼaw lo ngaˬ hui hta‸ ha‸ yuˬ laˇ-oˆ. Ngaˬ hui lehˬ, chaw teˇ gʼaˇ hta‸ ka‸ maˇ te ya‸, teˇ gʼaˇ hta‸ ka‸ luˬ kʼai sheˆ kʼai tuˬ maˇ te leh, teˇ gʼaˇ hta‸ ka‸ heˍ caˇ ve maˇ te.

3Ngaˬ nawˬ hui awˬ hkʼoˆ hta‸ venˇbaˆ taˍ leh chi hkʼe kʼoˆ ve maˇ heˆ. Awˬ lawn kʼo, suh kʼo teˇ geh suh tuˬ, te‸ kʼo teˇ geh te‸ tuˬ, ngaˬ hui ve nyi ma hkʼaw lo nawˬ hui hta‸ ha‸ ve yoˬ teh‸, ponˬ laˬ htaˇ ka‸ ngaˬ chi hkʼe kʼoˆ taˍ ve yoˬ.

4Nawˬ hui hta‸ ngaˬ hkʼa deh‸ yonˍ ve yoˬ. Nawˬ hui hta‸ pa taw, ngaˬ nyi ma uiˍ kuiˬ maˇ maˇ cawˬ ve yoˬ. Dawˇ sha gaˇ sha ve awˬ ceuˬ htawˇ ngaˬ hkʼa biˇ cawˬ ve yoˬ. Ngaˬ hui tu‸ ve hkanˍ ve hta‸ hpuˇ da‸ ve awˬ hkʼaw lo, ca kʼoˆ maˇ peuˬ htaˇ hkʼa gaˬ ngaˬ ha lehˬ tuˬ cawˬ maˇ jaˇ ve yoˬ.

5Awˬ lawn kʼo, Maˍkeˍdawˇniˆ mvuhˇmiˬ lo ngaˬ hui gaˬ la ve teˇ yanˇ, ngaˬ hui ve awˬ to gʼaˇ jehˇ kuiˬ a ciˉ ka‸ maˇ cawˬ. Teˇ ceuˬ le le awˬ hkʼaw lo tu‸ ve hkanˍ ve hta‸ ngaˬ hui gʼa hkanˍ ve yoˬ. Awˬ baˬ hpawˇ lo bawˆ da‸ tuˬ cawˬ leh, awˬ hkʼaw hpawˇ lo kawˆ tuˬ cawˬ ve yoˬ.

6Ya‸ hkʼaˇ, nyi ma luˬ ve chaw teˇ hpaˍ hta‸ dawˇ sha piˇ shehˍ hpaˇ Gʼuiˬsha lehˬ, Tiˇtuˆ gaˬ la ve awˬ hkʼaw lo ngaˬ hui hta‸ dawˇ sha la piˇ ve yoˬ.

7Tiˇtuˆ gaˬ la ve pa taw ceh tiˉ dawˇ sha la ve maˇ heˆ. Tiˇtuˆ lehˬ, nawˬ hui geh gʼa veu laˇ ve dawˇ sha ve teˇ ceuˬ hta‸ pa taw ngaˬ hui dawˇ sha la ve yoˬ. Hkʼaˬ hkʼe le teh‸ kʼoˆ kʼo, nawˬ hui ngaˬ hta‸ dawˇ law chehˇ ve teˇ ceuˬ, dawˇ haˍ jaˇ ve teˇ ceuˬ leh, ngaˬ awˬ pon nyi ma pfuhˇ ve teˇ ceuˬ hta‸ pa taw, ngaˬ leuˉ leh ha lehˬ jaˇ ve yoˬ.

8Awˉ lawˉ htaˇ ngaˬ bvuh‸ laˇ ve li‸ nawˬ hui hta‸ dawˇ haˍ piˇ lawˬ ve pa taw, oˇ htaˇ ngaˬ hpeh‸ bawˬ ve htawˇ, chi beu‸ ngaˬ maˇ kʼaw‸ hpeh‸ bawˬ. Awˬ lawn kʼo, li‸ oˇ ve lehˬ nawˬ hui hta‸ teˇ hkui ceh tiˉ dawˇ haˍ piˇ lawˬ ve hta‸ ngaˬ gʼa mawˬ ve yoˬ.

9Ngaˬ nawˬ hui hta‸ dawˇ haˍ piˇ lawˬ ve pa taw ngaˬ ha lehˬ ve maˇ heˆ. Nawˬ hui venˇbaˆ hta‸ dawˇ hpfuhˆ htaˇ hkʼa gaˬ dawˇ haˍ ve pa taw ngaˬ ha lehˬ ve yoˬ. Ngaˬ hui hta‸ pa taw nawˬ hui awˬ bon teˇ ceuˬ ka‸ maˇ gʼa shonˇ kʼai tuˬ, Gʼuiˬsha hta‸ caˉ da‸ve dawˇ haˍ ve teˇ ceuˬ hta‸ nawˬ hui gʼa hkanˍ ve yoˬ.

10Awˬ lawn kʼo, Gʼuiˬsha hta‸ caˉ da‸ ve dawˇ haˍ ve teˇ ceuˬ lehˬ, htaiˍ hkʼaw‸ ve hta‸ gʼa htaˇ hkʼa gaˬ, venˇbaˆ dawˇ hpfuhˆ ve teˇ ceuˬ hta‸ te tawˆ la ve yoˬ. Oˇ hkʼe te ve kʼo, hpeh‸ bawˬ tuˬ maˇ cawˬ. Ya‸ hkʼaˇ, miˬguiˬ hta‸ caˉ da‸ ve dawˇ haˍ ve teˇ ceuˬ lehˬ, suh ve teˇ ceuˬ hta‸ te tawˆ la ve yoˬ.

11Gʼuiˬsha hta‸ caˉ da‸ ve dawˇ haˍ ve teˇ ceuˬ lehˬ, nawˬ hui awˬ hkʼaw lo hkʼaˬ hkʼe ve teˇ hpaˍ te tawˆla piˇ ve hta‸ dawˇ nyi sheˍ. Nawˬ hui coˇ caˇ ve nyi ma cawˬ la tuˬ maˇ kʼoˆ, a shu yawˇ awˬ to hteˇ ve awˬ lawn kʼaw‸ kʼoˆ tuˬ maˇ kʼoˆ, nyi ma zuhˆ tuˬ maˇ kʼoˆ, kawˆ ve nyi ma cawˬ tuˬ maˇ kʼoˆ, dawˇ law tuˬ maˇ kʼoˆ, nyi ma pfuhˇ tuˬ maˇ kʼoˆ, ciˍ yanˍ piˇ tuˬ maˇ kʼoˆ, chi teˇ hpaˍ nawˬ hui awˬ hkʼaw lo hkʼaˬ ma te tawˆ la ve le. Kanˉ chi hta‸ caˉ da‸ ve teˇ ceuˬ le le awˬ hkʼaw lo nawˬ hui venˇbaˆ maˇ cawˬ ve hta‸ hkʼa tawˍ lehˆ hpeu‸ maˍ laˇ peu.

12Hkʼe te leh, ngaˬ nawˬ hui hta‸ li‸ bvuh‸ laˇ ve lehˬ, te ya‸ shehˍ hpaˇ awˬ pon maˇ heˆ. Te ya‸ ve hta‸ gʼa hkanˍ ve chaw awˬ pon ka‸ maˇ heˆ. Nawˬ hui lehˬ, ngaˬ hui awˬ pon Gʼuiˬsha mehˆ gʼuˇ suhˍ hkʼaˬ ma coˇ caˇ ve nyi ma cawˬ ve hta‸ nawˬ hui gʼa mawˬ gʼa shiˍ tuˬ awˬ pon ngaˬ bvuh‸ laˇ ve yoˬ.

13Chi hta‸ pa taw ngaˬ hui dawˇ sha la peuˬ. Ngaˬ hui dawˇ sha gaˇ sha peuˬ ve awˬ hkʼoˆ ka‸, Tiˇtuˆ ha lehˬ ve hta‸ pa taw ngaˬ hui leuˉ leh ha lehˬ jaˇ ve yoˬ. Awˬ lawn kʼo, nawˬ hui hkʼa peu-eˬ yawˇ hta‸ nyi ma sha la piˇ peuˬ.

14Ngaˬ lehˬ, nawˬ hui awˬ lawn chiˇ mvuh ve hkawˇ yawˇ hta‸ kʼoˆ piˇ taˍ ve pa taw, ngaˬ gʼa ya‸ taw tuˬ maˇ heˆ. Ngaˬ hui lehˬ, hkʼa peu-eˬ awˬ hkʼaw lo nawˬ hui hta‸ hteˇ lehˍ kʼoˆ laˇ peuˬ ve hkʼa shuˍ shuˍ, Tiˇtuˆ mehˆ gʼuˇ suhˍ ngaˬ nawˬ hui awˬ lawn chiˇ mvuh ve hkawˇ yaw taˍ ve lehˬ hteˇ ve yoˬ.

15Nawˬ hui hkʼa peu-eˬ na yuˬ leh, kawˆ ve cheˇ ve awˬ hkʼaw lo yawˇ hta‸ ha‸ yuˬ ve hta‸ yawˇ dawˇ nawˇ ve teˇ yanˇ, yawˇ nawˬ hui hta‸ leuˉ leh ha‸ jaˇ ve yoˬ.

16Teˇ ceuˬ le le awˬ hkʼaw lo ngaˬ nawˬ hui hta‸ awˬ tehˬ awˬ na yonˍ ve hta‸ pa taw ngaˬ ha lehˬ ve yoˬ.

← Chapter 6 Jump to: Chapter 8 →