2 Corinthians 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Miˬguiˬ hkʼoˆ lo ngaˬ hui chehˇ taˍ ve aˉ po kʼo chi luˬ kʼai ve kʼo, la‸ sheh maˇ te ve, mvuhˇ naw ma hkʼoˆ lo co co taiˍ taiˍ cawˬ ve, Gʼuiˬsha te taˍ ve yehˬ teˇ yehˬ cawˬ ve yoˬ teh‸ ngaˬ hui shiˍ ve yoˬ.

2Awˬ lawn kʼo, aˉ po kʼo chi ve awˬ hkʼaw lo ngaˬ hui hkʼanˇ chehˇ leh, mvuhˇ naw ma hkʼoˆ lo cawˬ ve ngaˬ hui ve yehˬ hta‸ veu‸ deh gaˇ jaˇ ve yoˬ.

3Oˇ hkʼe gʼa veu‸ deh ve kʼo, awˬ kʼu nyi gʼa chehˇ tuˬ maˇ heˆ.

4Aˉ po kʼo chi awˬ hkʼaw lo ngaˬ hui chehˇ taˍ sheˍ ve teˇ yanˇ, hawˇ ve mawˇ pfuhˇ leh hkʼanˇ chehˇ ve yoˬ. Veu‸ kʼaˇ maˇ veu‸ deh gaˇ leh hkʼanˇ chehˇ ve maˇ heˆ. Suh puiˉ ve awˬ ceuˬ hta‸ te‸ ve awˬ ceuˬ gʼa hehˆ dawˬ tuˬ, veu‸ kʼaˇ hta‸ ngaˬ hui veu‸ deh gaˇ ve yoˬ.

5Chi hkʼe hpeh‸ la tuˬ awˬ pon, ngaˬ hui hta‸ gu laˇ shehˍ hpaˇ lehˬ, Gʼuiˬsha yoˬ. Awˬ hkʼaw‸ nawˉ ngaˬ hui awˬ bon chi hta‸ gʼa tuˬ yoˬ teh‸ shiˍ hpeh‸ tuˬ, yawˇ lehˬ chi beu‸ ka‸ Awˬ ha hpu pe‸ laˇ taˍ peuˬ.

6Hkʼe te leh, ngaˬ hui hkʼaˬ htaˆ ka‸ nyi ma yeˬ ve yoˬ. Ngaˬ hui lehˬ, awˬ to awˬ hkʼaw lo chehˇ taˍ ve teˇ yanˇ, Jawˇmawˇ Yeˍsuˆ hta‸ hpaˆ da‸ chehˇ ve yoˬ teh‸ ngaˬ hui shiˍ ve yoˬ.

7Awˬ lawn kʼo, ngaˬ hui te kʼai chehˇ ve lehˬ mehˆ shiˍ mawˬ ve hta‸ pa taw maˇ heˆ, yonˍ ve hta‸ pa taw yoˬ.

8Ngaˬ hui nyi ma yeˬ ve awˬ hkʼaw lo, awˬ to chi hta‸ hpaˆ da‸ taˉ leh Jawˇmawˇ Yeˍsuˆ geh leuˉ leh chehˇ gaˇ ve yoˬ.

9Hkʼe te leh, ngaˬ hui awˬ to awˬ hkʼaw lo chehˇ taˍ ve maˇ kʼoˆ, awˬ to hta‸ hpaˆ da‸ chehˇ ve maˇ kʼoˆ, Jawˇmawˇ Gʼuiˬ sha nyi ma cawˇ ve chaw hpeh‸ tuˬ ngaˬ hui coˇ caˇ leh te chehˇ ve yoˬ.

10Awˬ lawn kʼo, ngaˬ hui teˇ gʼaˇ le le, a shu yawˇ awˬ to awˬ hkʼaw lo chehˇ htaˇ te ve hkʼe, da‸ ve maˇ kʼoˆ, maˇ da‸ ve maˇ kʼoˆ, gʼa tuˬ awˬ pon, ngaˬ hui hkʼa peu-eˬ Hkri‸ ve suhˉ jehˬ kuiˬ kʼaw jaw gʼuˇ suhˍ lo gʼa gaˬ tuˬ yoˬ.

11Hkʼe te leh, Jawˇmawˇ Gʼuiˬsha hta‸ kawˆ ve teˇ ceuˬ hta‸ ngaˬ hui shiˍ ve pa taw, chaw yaˇ teˇ hpaˍ hta‸ gʼaˇ hte‸ maˍ piˇ chehˇ ve yoˬ. Ngaˬ hui hkʼaˬ hkʼe ve chaw hpeh‸ ve hta‸ Gʼuiˬsha hkʼa tawˍ lehˆ shiˍ leh, nawˬ hui htawˇ nyi ma awˬ hkʼaw lo shiˍ chehˇ ve yoˬ teh‸ ngaˬ hui dawˇ ve yoˬ.

12Ngaˬ hui chi hkʼe kʼoˆ ve lehˬ, nawˬ hui mehˆ gʼuˇ suhˍ ngaˬ hui awˬ to hta‸ chiˇ mvuh ve maˇ heˆ. Ya‸ hkʼaˇ, chaw teˇ hpaˍ hpaˍ lehˬ nyi ma hkʼaw lo hkʼaˬ hkʼe hpeh‸ chehˇ ve hta‸ maˇ dawˇ nyi leh awˬ hta‸ hpawˇ ceh tiˉ nyi ma uiˍ chehˇ ve yoˬ. Chaw oˇ ve teˇ hpaˍ hta‸ nawˬ hui kʼaw‸ yaw hkʼaw‸ hpeh‸ tuˬ, ngaˬ hui hta‸ pa taw nawˬ hui nyi ma uiˍ hpeh‸ tuˬ ve awˬ hkʼaˇ maˍ laˇ ve yoˬ.

13Awˬ lawn kʼo, ngaˬ hui gʼuˇ ve kʼo, Gʼuiˬsha awˬ pon gʼuˇ ve yoˬ. Ngaˬ hui nyi ma biˇ ve kʼo, nawˬ hui awˬ pon biˇ ve yoˬ.

14Hkri‸ ve ha‸ pehnˇ ve teˇ ceuˬ lehˬ, ngaˬ hui hta‸ vawˆ taˍ leh shiˍ kʼai sheh kʼai chehˇ ve yoˬ. Awˬ lawn kʼo, chaw teˇ gʼaˇ lehˬ, chaw hkʼa peu-eˬ awˬ pon hkanˍ suh ve pa taw, chaw hkʼa peu-eˬ suh peuˬ teh‸ ngaˬ hui dawˇ cheˆ taˍ peuˬ.

15Yawˇ lehˬ, a sha‸ te‸ chehˇ ve chaw hui a shu yawˇ awˬ to awˬ pon maˇ kʼaw‸ te‸ leh, yawˇ hui awˬ pon hkanˍ suh leh kʼaw‸ te‸ tu la ve awˬ shehˍ hpaˇ teˇ gʼaˇ awˬ pon te‸ chehˇ tuˬ, chaw hkʼa peu-eˬ awˬ pon hkanˍ suh ve yoˬ.

16Hkʼe te leh, ya‸ nyi hkʼaw‸ nawˉ kʼo, chaw yaˇ hui shu hta‸ shawˍ taˍ ve hkʼe, ngaˬ hui lehˬ chaw teˇ gʼaˇ hta‸ ka‸ maˇ shawˍ taˍ. Ponˬ laˬ htaˇ ngaˬ hui Hkri‸ hta‸ chaw yaˇ hui shawˍ taˍ ve hkʼe ceh shawˍ taˍ chehˇ ve htawˇ, ya‸ nyi hkʼaw‸ nawˉ kʼo, yawˇ hta‸ oˇ hkʼe maˇ kʼaw‸ shawˍ taˍ.

17Hkʼe te leh, chaw teˇ gʼaˇ Hkri‸ awˬ hkʼaw lo chehˇ ve kʼo, yawˇ lehˬ chaw awˬ suhˉ hpeh‸ la peuˬ, Awˬ piˍ teˇ hpaˍ mehˉ kʼai peuˬ leh, hkʼa peu-eˬ awˬ suhˉ hpeh‸ la peuˬ.

18Awˬ ceuˬ chi hkʼa peu-eˬ lehˬ, Gʼuiˬsha lo tawˆ la ve yoˬ. Yawˇ lehˬ, Hkri‸ awˬ hkʼaw lo ngaˬ hui yawˇ hta‸ cawˇ da‸ hawˍ da‸ tuˬ te laˇ peuˬ. Chi hkʼoˆ ka‸ shu yawˇ hta‸ cawˇ da‸ hawˍ da‸ la tuˬ, yawˇ ngaˬ hui hta‸ te tcuh laˇ ve yoˬ.

19Yawˇ lehˬ Hkri‸ awˬ hkʼaw lo chehˇ leh, miˬguiˬ yaˇ yawˇ hta‸ cawˇ da‸ hawˍ da‸ la tuˬ te ve yoˬ. Yawˇ hui ve venˇbaˆ yawˇ hui awˬ hkʼoˆ hta‸ yawˇ maˇ taˍ. Shu yawˇ hta‸ cawˇ da‸ hawˍ da‸ tuˬ ve awˬ lawn maˍ piˇ tuˬ, yawˇ ngaˬ hui hta‸ te tcuh laˇ ve yoˬ.

20Hkʼe te leh, ngaˬ hui Hkri‸ ve awˬ tan te shehˍ hpaˇ hpeh‸ ve yoˬ. Gʼuiˬsha ngaˬ hui hta‸ cuˇ leh nawˬ hui hta‸ kuˬ yuˬ ve yoˬ. Gʼuiˬsha hta‸ cawˇ da‸ hawˍ da‸ loˬ teh‸, Hkri‸ ve awˬ tan te leh ngaˬ hui nawˬ hui hta‸ lawˬ hkawˉ ve yoˬ.

21Hkri‸ lehˬ, venˇbaˆ hta‸ maˇ shiˍ jaw htawˇ, yawˇ awˬ hkʼaw lo ngaˬ hui Gʼuiˬsha ve hteˇ ve cawˇ ve hpeh‸ la tuˬ, ngaˬ hui awˬ pon Gʼuiˬsha yawˇ hta‸ venˇbaˆ hpeh‸ la piˇ lawˬ ve yoˬ.

← Chapter 4 Jump to: Chapter 6 →