Ecclesiastes 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Tawˇ chi teˇ hpaˍ lehˬ Yeˍruˆsaˍlehnˍ venˇ hta‸ uˉ peunˍ chehˇ ve Daˍviˆ ve yaˇ cuˇ yiˍ cawˬ paˍ ve tawˇ hpeh‸ ve yoˬ.

2Te‸ chiˉ awˬ bon maˇ cawˬ. Te‸ chiˉ awˬ bon maˇ cawˬ, teh‸ cuˇ yiˍ cawˬ paˍ kʼoˆ ve yoˬ. A sha‸ te‸ ve teˇ ceuˬ te‸ chiˉ awˬ bon maˇ cawˬ.

3Chaw yaˇ lehˬ, kanˉ te hkeu‸ jaˇ ve htawˇ, yawˇ aˬ hto‸ ma awˬ bon gʼa le.

4Chaw yaˇ teˇ co peuˬ teˇ co mehˉ kʼai chehˇ ve yoˬ. Ya‸ hkʼaˇ, miˬguiˬ chi lehˬ hkʼaˬ htaˆ ka‸ hkʼa shuˍ hpeh‸ chehˇ ve yoˬ.

5Mvuhˇ nyi tawˆ la taˉ leh teˇ pawˆ kʼaw‸ lo‸-e ve yoˬ. Peuˬ hkʼaw‸ nawˉ teˇ pawˆ kʼaw‸ tawˆ la ve yoˬ.

6Mvuhˇ haw htawˇ, awˬ hawˉ awˬ na htawˇ kʼaw‸ nawˬ kʼaw‸ te meuˆ chehˇ ve yoˬ.

7Iˉ kaˆ lawˬ teˇ maˬ le le laˇ tsuhˇ gʼuiˬ lo ya‸-e ve yoˬ. Ya‸ hkʼaˇ, laˇ tsuhˇ gʼuiˬ lehˬ teˇ pawˆ ka‸ maˇ biˇ sheˆ. Iˉ kaˆ teˇ hpaˍ iˉ kaˆ lawˬ lo kʼaw‸ lo‸ la leh laˇ tsuhˇ gʼuiˬ lo teˇ pawˆ kʼaw‸ ya‸-e ve yoˬ.

8Awˬ ceuˬ hkʼa peu-eˬ ve lehˬ ca kʼoˆ maˇ gʼa htaˇ hkʼa gaˬ heuˬ jaˇ chehˇ ve yoˬ. Ngaˬ hui ve mehˆ shiˍ lehˬ, hkʼaˬ ma nyi ve htawˇ nyi maˇ bvuhˆ puiˉ. Ngaˬ hui ve naˍ paw htawˇ, hkʼaˬ ma gʼa kaˇ ve ka‸ kaˇ maˇ bvuhˆ puiˉ.

9Ponˬ laˬ htaˇ hpeh‸ la jaw taˉ peuˬ ve awˬ ceuˬ teˇ hpaˍ, teˇ pawˆ kʼaw‸ hpeh‸ la tuˬ sheˍ ve yoˬ. Miˬguiˬ chi awˬ hkʼo lo awˬ suhˉ kʼaw‸ hpeh‸ la ve awˬ ceuˬ teˇ ceuˬ ka‸ maˇ cawˬ.

10Nyi sheˍ. Choˬ kaˬ lo awˬ suhˉ teˇ ceuˬ kʼaw‸ hpeh‸ la chehˇ ve yoˬ, teh‸ yawˇ hui kʼoˆ ve yoˬ. Ya‸ hkʼaˇ maˇ heˆ. Awˬ ceuˬ oˇ ve ngaˬ hui maˇ paw la sheˍ htaˇ ka‸ hpeh‸ la jaw taˉ peuˬ ve yoˬ.

11Ponˬ laˬ htaˇ hpeh‸ la jaw taˉ peuˬ ve awˬ ceuˬ teˇ hpaˍ hta‸ chaw teˇ gʼaˇ ka‸ maˇ dawˇ nawˇ-o. Laˬ tuˬ ve awˬ yanˇ hkʼaw te‸ chehˇ tuˬ ve chaw teˇ hpaˍ lehˬ, ya‸ nyi hpeh‸ chehˇ ve awˬ ceuˬ teˇ hpaˍ hta‸ dawˇ nawˇ tuˬ ve maˇ heˆ.

12Ngaˬ cuˇ yiˍ cawˬ paˍ lehˬ, Yeˍruˆsaˍlehnˍ venˇ hkʼaw jawˇmawˇ te chehˇ ve yoˬ.

13Miˬguiˬ chi awˬ hkʼoˆ lo hkʼa hpeh‸ la chehˇ ve awˬ ceuˬ hkʼa peu-eˬ ve hta‸ ngaˬ hkʼa deh‸ gʼa‸ dawˇ nyi chehˇ ve yoˬ. Gʼuiˬsha lehˬ, ngaˬ hui awˬ hkʼoˆ lo dawˇ haˍ tuˬ awˬ ceuˬ gaˬ la piˇ taˍ ve yoˬ.

14Miˬguiˬ chi awˬ hkʼoˆ lo hkʼa hpeh‸ la chehˇ ve awˬ ceuˬ teˇ hpaˍ hta‸ ngaˬ gʼa mawˬ peuˬ. Awˬ ceuˬ oˇ ve hkʼa peu-eˬ te‸ chiˉ awˬ bon maˇ cawˬ. Mvuhˇ haw hta‸ gʼa‸ yuˬ chehˇ ve hkʼe ceh hpeh‸ ve yoˬ.

15Kʼaw‸ lehˍ hpeh‸ kʼai peuˬ ve awˬ ceuˬ hta‸ nawˬ yuˬ hteˇ maˇ gʼa. Maˇ cawˬ taˍ ve mawˇ hta‸ nawˬ gʼaw nyi maˇ gʼa.

16Ngaˬ lehˬ, chaw uiˍ teˇ gʼaˇ hpeh‸ la peuˬ. Ngaˬ awˬ gʼuˇ suhˍ Yeˍruˆsaˍlehnˍ venˇ hta‸ hkʼa uˉ peunˍ taˉ ve jawˇmawˇ teˇ hpaˍ a‸ kehˉ ngaˬ lehˬ cuˇ yiˍ uiˍ jaˇ ve yoˬ. Awˬ tehˬ awˬ na ve cuˇ yiˍ lehˬ, hkʼaˬ hkʼe ve awˬ ceuˬ hpeh‸ ve hta‸ ngaˬ shiˍ taˍ ve yoˬ, teh‸ ngaˬ awˬ to hta‸ kʼoˆ piˇ chehˇ ve yoˬ.

17Shiˍ puiˉ ve cuˇ yiˍ leh haiˬ ve awˬ ceuˬ hkʼaˬ hkʼe peun da‸ ve hta‸ henˇ yuˬ tuˬ, ngaˬ dawˇ cheˆ taˍpeuˬ. Ya‸ hkʼaˇ, ngaˬ chi hkʼe te nyi ve ka‸, mvuhˇ haw hta‸ gʼa‸ yuˬ chehˇ ve hkʼe ceh hpeh‸ ve hta‸ ngaˬ gʼa mawˬ ve yoˬ.

18Nawˬ cuˇ yiˍ shaˬ cawˬ ve kʼo, shaˬ nawˬ geh dawˇ haˍ tuˬ maˇ la ve yoˬ. Nawˬ shaˬ shiˍ maˇ ve kʼo, shaˬ nyi ma naˬ kuiˬ cawˬ maˇ la ve yoˬ.

Jump to: Chapter 2 →