Ecclesiastes 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Miˬguiˬ chi awˬ hkʼoˆ lo, chaw yaˇ teˇ hpaˍ hta‸ maˇ hteˇ maˇ cawˇ te piˇ chehˇ ve hta‸ ngaˬ gʼa mawˬ ve yoˬ.

2Gʼuiˬsha lehˬ chaw teˇ gʼaˇ gʼaˇ hta‸ hpu shi mawˇ jeˬ, awˬ me‸ awˬ hponˇ leh yawˇ hkʼa loˍ ve awˬ ceuˬ hkʼa peu-eˬ piˇ taˍ ve htawˇ, chaw oˇ ve hta‸ maˇ ha lehˬ tcuh piˇ. Awˬ nu ve chaw teˇ gʼaˇ hta‸ yawˇ awˬ tan ha lehˬ tcuh piˇ ve yoˬ. Chi ve lehˬ, te‸ chiˉ awˬ bon maˇ cawˬ ve awˬ hkʼoˆ, cawˇ ka‸ maˇ cawˇ.

3Chaw teˇ gʼaˇ lehˬ, yaˇ teˇ ha gʼaˇ cawˬ leh co zuhˬ ha zuhˬ cawˬ ve htawˇ, ha lehˬ ha kʼa maˇ gʼa chehˇ leh hpuiˇ suh va‸ suh ve hkʼe gʼa te suh-e ve kʼo, paw la htaˇ ka‸ suh-e ve yaˇ ehˉ lehˬ, yawˇ a‸ kehˉ da‸ leuˉ ve yoˬ.

4Yaˇ ehˉ oˇ ve lehˬ, awˬ bon maˇ da‸. Naˆ ho‸ ve hkʼaw mehˉ kʼai leh shu leunˇ kʼai ve yoˬ.

5Yawˇ lehˬ awˬ gʼeuˆ hta‸ maˇmawˬ jaw. A sha‸ te‸ ve teˇ ceuˬ hkʼaˬ hkʼe hpeh‸ ve hta‸ htawˇ yawˇ maˇ shiˍ.

6Ya‸ hkʼaˇ, yawˇ lehˬ miˬguiˬ hkʼoˆ nyiˇ hinˉ hkʼaw gʼa chehˇ leh te‸chiˉ ha lehˬ tuˬ maˇ cawˬ ve chaw a‸ kehˉ gawˬ lehˍ gʼaˇ gʼa jehˇ ve yoˬ. Ya‸ hkʼaˇ, awˬ leh meuˇ kʼo, yawˇ huiˉ maˬ nyiˇ gʼaˇ gʼaˇ teˇ kaˬ lo tiˉ gʼa kʼai tuˬ yoˬ.

7Chaw teˇ gʼaˇ lehˬ, gʼa caˇ gʼa dawˬ tuˬ kanˉ gʼaˇ hte‸ te ve yoˬ. Ya‸ hkʼaˇ yawˇ caˇ maˇ law‸.

8Cuˇ yiˍ cawˬ ve chaw lehˬ chaw luˬ paˍ a‸ kehˉ hkʼaˬ ma da‸ leuˉ ve le. Cuˇ yiˍ cawˬ ve haˍ yaˇ gʼawˇ yaˇ teˇ gʼaˇ lehˬ, hteˇ ve cawˇ ve hkʼaw a sha‸ te‸ chehˇ puiˉ ve yoˬ.

9Chi ve lehˬ, ti‸ chiˉ awˬ bon maˇ cawˬ. Mvuhˇ haw hta‸ gʼa‸ yuˬ chehˇ ve hkʼe ceh hpeh‸ ve yoˬ. A shu yawˇ cawˬ taˍ ve mawˇ hta‸ nyi hkʼaˇ suh chehˇ ve teˇ ceuˬ lehˬ, heuˆ gaˇ ve mawˇ hta‸ dawˇ law chehˇ ve a‸ kehˉ da‸ leuˉ ve yoˬ.

10Hkʼa hpeh‸ la ve awˬ ceuˬ hkʼa peu-eˬ lehˬ, aˬ sho-eˬ htaˇ ka‸ hpeh‸ la taˍ peuˬ ve yoˬ. Chaw teˇ gʼaˇ lehˬ, yawˇ a‸ kehˉ awˬ gʼaˇ awˬ shaˉ uiˍ ve chaw hta‸ tawˇ kʼaw‸ shaˬ da‸ maˇ hpeh‸ ve hta‸ ngaˬ hui hkʼa peu-eˬ shiˍ taˍ ve yoˬ.

11Nawˬ tawˇ shaˬ gʼawˬ da‸ kʼo shaˬ tcuhˉ kuiˬ maˇ cawˬ ve tawˇ yaw tawˆ la ve yoˬ. Chi hkʼe te ve pa taw, nawˬ awˬ pon aˬ hto‸ ma awˬ bon cawˬ le.

12Chaw yaˇ a sha‸ te‸ chehˇ ve ngeh jaˇ ve awˬ yanˇ chi hkʼaw, chaw yaˇ awˬ pon da‸ jaˇ ve awˬ ceuˬ hta‸ a shu shiˍ hpeh‸ le. Yawˇ suh kʼai peuˬ hkʼaw‸ nawˉ, miˬguiˬ hkʼoˆ lo hkʼaˬ hkʼe hpeh‸ la tuˬ ve hta‸ a shu shiˍ hpeh‸ le.

← Chapter 5 Jump to: Chapter 7 →