Ecclesiastes 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Awˬ lawn chi teˇ hpaˍ hta‸ ngaˬ gʼaˇ hte‸ dawˇ nyi chehˇ ve teˇ yanˇ, Gʼuiˬsha lehˬ cuˇ yiˍ cawˬ ve chaw leh hteˇ ve cawˇ ve chaw hui ve dawˇ hkʼaˇ hkʼa peu-eˬ hta‸ uˉ peunˍ chehˇ ve hta‸ ngaˬ shiˍ la ve yoˬ. Awˬ gʼuˇ suhˍ hpawˇ hkʼaˬ hkʼe hpeh‸ la tuˬ ve hta‸ chaw teˇ gʼaˇ ka‸ maˇ shiˍ.

2Chi hta‸ pa taw, te‸ chiˉ peun da‸ kuiˬ maˇ cawˬ. Hteˇ ve cawˇ ve chaw leh maˇ hteˇ maˇ cawˇ ve chaw, da‸ ve chaw leh maˇ da‸ve chaw, bon hpawˇ awˬ gʼaˇ cawˬ ve chaw leh maˇ cawˬve chaw, Gʼuiˬsha hta‸ oˉ kʼoˍ pui ve chaw leh maˇ pui ve chaw, chaw chi hkʼa peu-eˬ hkʼa shuˍ hpeh‸ ve yoˬ. Da‸ ve chaw lehˬ, venˇbaˆ yaˇ a‸ kehˉ da‸ leuˉ ve maˇ heˆ. Hkanˍ taˍ ve chaw htawˇ, maˇ hkanˍ ve chaw a‸ kehˉ da‸ leuˉ ve maˇ heˆ.

3Chaw hkʼa peu-eˬ hkʼa shuˍ hpeh‸ ve yoˬ. Chi ve htawˇ ya‸ jaˇ ve yoˬ, teh‸ ngaˬ dawˇ ve yoˬ. Chi hta‸ pa taw, chaw yaˇ teˇ hpaˍ ve nyi ma hkʼaw lo haiˬ ve awˬ ceuˬ hkʼa biˇ cawˬ taˍ ve yoˬ. Dawˇ law kuiˬ maˇ cawˬ. Suh ve teˇ ceuˬ ceh tiˉ cawˬ taˍ ve yoˬ.

4Ya‸ hkʼaˇ, te‸ chehˇ ve chaw hui awˬ pon dawˇ law kuiˬ cawˬ taˍ ve yoˬ. Suh taˍ ve laˇ caˬ shiˉ a‸ kehˉ te‸ chehˇ ve hpuiˇ lehˬ da‸ leuˉ ve yoˬ.

5Te‸ chehˇ ve chaw lehˬ, yawˇ gʼa suh tuˬ ve hta‸ shiˍ taˍ ve yoˬ. Ya‸ hkʼaˇ, suh peuˬ ve chaw lehˬ te‸ chiˉ maˇ shiˍ. Yawˇ hui awˬ pon te‸ chiˉ la‸ shawnˍ maˇ kʼaw‸ cawˬ. Yawˇ hui hta‸ shu leunˇ kʼai ve yoˬ.

6Yawˇ hui ve ha‸ puiˉ ve, canˇ puiˉ ve leh sheˉ lai puiˉ ve nyi ma hkʼa peu-eˬ, yawˇ hui geh suh-e ve yoˬ. Yawˇ hui lehˬ miˬguiˬ chi hta‸ maˇ kʼaw‸ caˉ da‸-o.

7Ha lehˬ ha kʼa te leh, a shu yawˇ ve caˇ tuˬ hta‸ caˇ chehˇ dawˬ chehˇ-oˆ. Chi hkʼe te ve hta‸ Gʼuiˬsha nyi ma cawˇ ve yoˬ.

8Hkʼaˬ htaˆ ka‸ ha lehˬ dawˇ sha ve nyi ma cawˬ piˇ-oˆ.

9Miˬguiˬ hkʼoˆ lo Gʼuiˬsha nawˬ hta‸ te‸ chehˇ tcuh laˇ taˍ ve awˬ yanˇ hkʼaw, nawˬ ha‸ ve yaˇ miˇ geh ha lehˬ ha kʼa te chehˇ-oˆ. Awˬ lawn kʼo, nawˬ miˇ ma lehˬ Gʼuiˬsha pe‸ laˇ ve da‸ jaˇ ve la‸ shawnˍ hpeh‸ ve yoˬ.

10Nawˬ hkʼa te ve kanˉ hta‸ gʼaˇ hte‸ coˇ caˇ leh te-o. Awˬ lawn kʼo, nawˬ kʼai chehˇ ve suh mvuhˇmiˬ hkʼaw kanˉ te ve, dawˇ nyi ve leh cuˇ yiˍ henˇ ve maˇ kʼaw‸ cawˬ.

11Miˬguiˬ chi hkʼoˆ lo gʼuiˇ gehˬ jaˇ ve chaw teˇ pawˆ le le la‸ shawnˍ gʼa ve maˇ heˆ. Ha‸ hanˉ jaˇ ve chaw teˇ pawˆ le le ma‸ bawˆ gʼaˇ ve maˇ heˆ. Cuˇ yiˍ cawˬ ve chaw hkʼaˬ htaˆ ka‸ caˇ law‸ dawˬ law‸ cawˬ leh paw sha chehˇ ve maˇheˆ. Dawˇ puiˉ keu‸ puiˉ ve chaw htawˇ hkʼaˬ htaˆ ka‸ chaw uiˍ chaw mvuh hpeh‸ la ve maˇ heˆ. Teˇ pawˆ pawˆ yawˇ hui ka‸ bon maˇ da‸ hpeh‸ puiˉ ve yoˬ.

12Nawˬ ve awˬ yanˇ hkʼaˬ htaˆ gaˬ la tuˬ ve hta‸ nawˬ maˇ shiˍ. Va hta‸ yaw ve ngaˆ leh, geu‸ hkʼaw geh ve ngaˇ hkʼe, maˇ dawˇ maˇ gaˇ ve awˬ yanˇ hkʼaw, ngaˬ hui htawˇ va htaw taˍ ve hta‸ yaw tuˬ yoˬ.

13Miˬguiˬ hkʼoˆ lo cuˇ yiˍ hta‸ chaw yaˇ hui hkʼaˬ hkʼe shawˍ taˍ chehˇ ve awˬ lawn hta‸ htawˇ, ngaˬ gʼa mawˬ ve yoˬ.

14Venˇ ehˉ teˇ venˇ cawˬ ve yoˬ. Oˇ kaˬ lo chaw ka‸ tcuhˇ tcuhˬ maˇ chehˇ maˇ. Awˬ gʼaˇ uiˍ ve jawˇmawˇ teˇ gʼaˇ,venˇ oˇ ve hta‸ ca hoˆ bawˆ la ve yoˬ.

15Venˇ oˇ ve hkʼaw haˍ gʼawˇ ve htawˇ cuˇ yiˍ cawˬ ve chaw teˇ gʼaˇ chehˇ taˍ ve yoˬ. Yawˇ lehˬ venˇ chi hta‸ pon piˇ tuˬ te gʼa ve yoˬ. Ya‸ hkʼaˇ, chaw teˇ gʼaˇ ka‸ yawˇ awˬ lawn ma dawˇ nyi.

16Cuˇ yiˍ teˇ ceuˬ lehˬ awˬ gʼaˇ awˬ shaˉ cawˬ ve a‸ kehˉ da‸ leuˉ ve yoˬ, teh‸ ngaˬ hkʼaˬ htaˆ ka‸ kʼoˆ chehˇ ve yoˬ. Ya‸ hkʼaˇ, haˍ ve gʼawˇ ve chaw oˇ ve lehˬ, cuˇ yiˍ cawˬ ve yoˬ, teh‸ chaw teˇ gʼaˇ ka‸ maˇ dawˇ. Yawˇ kʼoˆ ve tawˇ hta‸ chaw teˇ gʼaˇ ka‸ maˇ na yuˬ.

17Cuˇ yiˍ cawˬ paˍ teˇ gʼaˇ ta‸ iˉ gawˬ lehˍ kʼoˆ laˇ ve tawˇ lehˬ, chaw luˬ paˍ hui hpawnˬ da‸ chehˇ kuiˬ lo jawˇmawˇ teˇ gʼaˇ kuˬ heuˉ ve tawˇ a‸ kehˉ da‸ leuˉ ve yoˬ.

18Cuˇ yiˍ teˇ ceuˬ lehˬ la‸ caˉ a‸ kehˉ leuˉ leh awˬ bon te tawˆ la gʼa ve yoˬ. Ya‸ hkʼaˇ, kuiˇ kʼai peuˬ ve iˉ shiˍ lehˬ da‸ ve iˉ shiˍ teˇ hkʼawˍ lawˇ ve hta‸ te luˬ puiˉ ve yoˬ.

← Chapter 8 Jump to: Chapter 10 →