Ecclesiastes 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Ha lehˬ ha kʼa tanˇ piˇ-oˆ. Awˬ hkʼaw‸ nawˉ kʼo nawˬ awˬ bon kʼaw‸ gʼa tuˬ yoˬ.

2Nawˬ ve la‸ sheh chaw maˇ maˇ hta‸ pehˬ piˇ-oˆ. Awˬ lawn kʼo, nawˬ ka‸ awˬ hkʼaw‸ nawˉ loˍ cawˇ ve awˬ yanˇ gaˬ la tuˬ yoˬ.

3Suhˆ cehˬ teˇ ceuˬ hkʼaˬ hpawˇ lo paiˍ ve maˇ kʼoˆ yawˇ paiˍ kuiˬ lo cawˬ chehˇ taˍ ve yoˬ. Moˬ hoˆ la ve teˇ yanˇ mvuhˇ yeˬ ya‸ la ve yoˬ.

4Mvuhˇ da‸ ve awˬ yanˇ hta‸ ceh nawˬ law chehˇ ve kʼo, nawˬ te‸ chiˉ gʼa ti gʼa gʼeu‸ taˉ tuˬ ve ma heˆ.

5Mvuhˇ haw te toˇ ve ya‸ kʼaw hta‸ maˇ kʼoˆ, awˬ e gʼoˇ peˬ hkʼaw ve yaˇ ehˉ hkʼaˬ hkʼe a sha‸ te‸ la ve hta‸ maˇ kʼoˆ, nawˬ shiˍ maˇ hpeh‸ ve hkʼe, Gʼuiˬsha te taˍve kanˉ teˇ hpaˍ hta‸ nawˬ shiˍ maˇ hpeh‸.

6Mvuhˇ shawˉ mvuhˇ hpeu‸ gʼaˇ hte‸ ti keu-o. Awˬ lawn kʼo, nawˬ hkʼa ti taˍ ve awˬ yawˇ teˇ yawˇ le le yeˬ la tuˬ yoˬ, teh‸ nawˬ kʼoˆ maˇ hpeh‸.

7A sha‸ te‸ chehˇ ve teˇ ceuˬ lehˬ anˇ tuˬ uiˍ jaˇ ve awˬ ceuˬ yoˬ.

8Nawˬ a sha‸ gʼa te‸ chehˇ ve awˬ hkʼaw‸ awˬ yanˇ teˇ hpaˍ awˬ pon, Gʼuiˬsha hta‸ chiˇ mvuh-o. Nawˬ a sha‸ gʼa te‸ maw jaˇ ve htawˇ, nawˬ tuˍ hpfuh hkʼaw gʼa zuh‸ taˍ tuˬ ve awˬ yanˇ leuˉ leh maw jaˇ tuˬ ve hta‸ dawˇ nawˇ taˍ-o‸. Awˬ gʼuˇ suhˍ hpawˇ dawˇ law leh chiˇ nyi tcuhˉ taˍ tuˬ ve awˬ ceuˬ te‸ chiˉ maˇ cawˬ.

9Yaˇ nehˬ teˇ hpaˍ-oˬ, yaˇ nehˬ gʼa hpeh‸ ve awˬ yanˇ lehˬ da‸ jaˇ ve yoˬ. Ha lehˬ ha kʼa te chehˇ-oˆ. A shu yawˇ te gaˇ ve a loˍ awˬ hkʼaˇ suh te kʼai-o. Ya‸ hkʼaˇ, Gʼuiˬsha lehˬ nawˬ te taˍ ve kanˉ hta‸ keunˍ da‸ ve hkʼe suhˉ jehˬ laˇ tuˬ ve hta‸ dawˇ nawˇ taˍ-o‸.

10Nawˬ hui hta‸ dawˇ haˍ tuˬ te laˇ chehˇ ve awˬ ceuˬ leh, naˬ tuˬ te laˇ chehˇ ve awˬ ceuˬ teˇ hpaˍ hta‸ yuˬ baˬ-o‸. Awˬ lawn kʼo, nawˬ hui lehˬ hkʼaˬ htaˆ ka‸ yaˇ nehˬ ceh tiˉ gʼa hpeh‸ chehˇ tuˬ ve maˇ heˆ.

← Chapter 10 Jump to: Chapter 12 →