Ecclesiastes 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Cuˇ yiˍ cawˬ ve chaw ceh tiˉ, cawˇ ve awˬ ceuˬ hta‸ shiˍ hpeh‸ ve yoˬ. Cuˇ yiˍ teˇ ceuˬ yawˇ hta‸ ha lehˬ la piˇ leh, dawˇ haˍ ve mehˆ hpfuhˇ hta‸ mehˉ kʼai piˇ ve yoˬ.

2Jawˇmawˇ kʼoˆ ve hkʼe te-o. Gʼuiˬsha hta‸ hkʼa sha sha-ehˬ ka ti‸ taˇ te.

3Jawˇmawˇ lehˬ yawˇ te gaˇ ve hkʼe te hpeh‸ ve yoˬ. Chi hta‸ pa taw, yawˇ geh tawˆ kʼai-o. Kawˆ tuˬ uiˍ ve chehˇ kuiˬ chi hkʼe ve hkʼaw taˇ ca chehˇ taˍ.

4Jawˇmawˇ lehˬ kanˇ paˆ hta‸ yehˇ leh kanˉ te ve yoˬ. Yawˇ te ve kanˉ hta‸ chaw teˇ gʼaˇ ka‸ tawˍ taˍ maˇ gʼa.

5Nawˬ lehˬ yawˇ ve tawˇ hta‸ na yuˬ chehˇ ve kʼo, gawˬ lehˍ gʼa chehˇ ve yoˬ. Chi hkʼe te tuˬ cuˇ yiˍ cawˬ paˍ teˇ gʼaˇ shiˍ taˍ ve yoˬ.

6Kanˉ te tuˬ da‸ ve cawˇ ve awˬ yanˇ cawˬ ve yoˬ. Ya‸ hkʼaˇ, ngaˬ hui shiˍ maˇ gaˬ.

7Laˬ tuˬ ve aw yanˇ hkʼaw hkʼaˬ hkʼe hpeh‸ la tuˬ ve hta‸ ngaˬ hui teˇ gʼaˇ ka‸ maˇ shiˍ. A shu ngaˬ hui hta‸ kʼoˆ maˍ laˇ gʼa le.

8A shu teˇ gʼaˇ maˇ gʼa suh-e tuˬ te gʼa le. Maˇ heˆ kʼo, yawˇ suh tuˬ ve awˬ nyi hta‸ a shu teˇ gʼaˇ yuˬ jiˆ hpeh‸ le. Chi lehˬ ponˬ maˇ hpeh‸ ve ngaˬ hui gʼa bawˆ da‸ tuˬ ve ma‸ lonˉ hpeh‸ ve yoˬ. Chi ve hta‸ ngaˬ hui heˍ ponˬ maˇ gʼa.

9Miˬguiˬ hkʼoˆ lo hpeh‸ la chehˇ ve awˬ ceuˬ teˇ hpaˍ hta‸ ngaˬ dawˇ nyi htaˇ, chi hkʼe gʼa mawˬ ve yoˬ. Chaw teˇ hpaˍ hpaˍ kanˇ paˆ cawˬ leh teˇ hpaˍ hpaˍ yawˇ hui awˬ hawˉ lo gʼa hkanˍ chehˇ taˍ ve yoˬ.

10Haiˬ ve chaw teˇ hpaˍ suh leh shu yawˇ hui hta‸ tuˍ piˇ ve yoˬ. Yawˇ hui tuˍ hpfuh lo kʼaw‸ la chehˇ ve teˇ yanˇ, haiˬ ve chaw oˇ ve hpaˇ te taˉ ve kanˉ hta‸ chiˇ mvuh piˇ chehˇ ve yoˬ. Chi lehˬ te‸ chiˉ awˬ bon maˇ cawˬ.

11Aˬ hto‸ ma pa taw chaw yaˇ teˇ hpaˍ hkʼa sha sha-ehˬ venˇbaˆ te chehˇ ve le. Awˬ lawn kʼo, Gʼuiˬsha lehˬ yawˇ hui te ya‸ chehˇ ve venˇbaˆ hta‸ la‸ haˉ maˇ ciˍ yanˍ piˇ ve pa taw yoˬ.

12Venˇbaˆ yaˇ teˇ gʼaˇ lehˬ teˇ ha pawˆ hkʼa gaˬ venˇbaˆ te peuˬ ve htawˇ, a sha‸ te‸ chehˇ sheˍ ve yoˬ.

13Yawˇ hui kʼoˆ ve, Gʼuiˬsha hta‸ kawˆ chehˇ ve kʼo, awˬ ceuˬ hkʼa peu-eˬ da‸ la tuˬ yoˬ. Ya‸ hkʼaˇ, haiˬ ve chaw lehˬ oˇ hkʼe hpeh‸ la tuˬ ve maˇ heˆ. Yawˇ hui a sha‸ te‸ ve lehˬ, aˉ gʼuiˬ ha hkʼa shuˍ hpeh‸ leh, a sha‸ maˇ gaˬ sheˍ ka‸ gʼa suh tuˬ yoˬ. Awˬ lawn kʼo, yawˇ hui Gʼuiˬsha hta‸ maˇ kawˆ ve pa taw yoˬ, teh‸ kʼoˆ chehˇ ve yoˬ.

14Yawˇ hui chi hkʼe kʼoˆ ve lehˬ, hkʼe leˇ hpeh‸ ve yoˬ. Miˬguiˬ hkʼoˆ lo hpeh‸ la chehˇ ve awˬ ceuˬ hta‸ nyi sheˍ. Teˇ paw ˆpawˆ hteˇ ve cawˇ ve chaw lehˬ, maˇ hteˇ maˇ cawˇ ve chaw awˬ tan ciˍ yanˍ ve hta‸ gʼa hkanˍ leh, maˇ hteˇ maˇ cawˇ ve chaw lehˬ, hteˇ ve cawˇ ve chaw gʼa keunˍ ve la‸ shawn hta‸ gʼa chehˇ ve yoˬ. Chi ve lehˬ te‸ chiˉ tcuhˉ kuiˬ maˇ cawˬ.

15Chi hta‸ pa taw, chaw yaˇ lehˬ hkʼaˬ htaˆ ka‸ ha lehˬ ha kʼa te chehˇ cawˇ ve yoˬ. Awˬ lawn kʼo, chaw yaˇ awˬ pon ha lehˬ ha kʼa hti caˇ hti dawˬ chehˇ ve a‸ kehˉ da‸ leuˉ ve awˬ ceuˬ maˇ cawˬ. Miˬguiˬ hkʼoˆ lo Gʼuiˬsha yawˇ hta‸ teh taˍ piˇ ve awˬ yanˇ hkʼaw, chaw yaˇ teˇ hpaˍ chi hkʼe te chehˇ cawˇ ve yoˬ, teh‸ ngaˬ dawˇ ve yoˬ.

16Ngaˬ cuˇ yiˍ cawˬ la tuˬ coˇ caˇ leh miˬguiˬ hkʼoˆ lo hpeh‸ la chehˇ ve awˬ ceuˬ hta‸ nyi chehˇ ve teˇ yanˇ, chaw yaˇ lehˬ mvuhˇ law‸ kʼaw mvuhˇ hpeu‸ hkʼaˬ htaˆ ka‸ nawˇ taˍ cawˇ ve hta‸ ngaˬ shiˍ la ve yoˬ.

17Gʼuiˬsha hkʼaˬ hkʼe te chehˇ ve hta‸ ngaˬ hui shiˍ maˇ hpeh‸ taˬ. Hkʼaˬ ma coˇ caˇ leh ca ve htawˇ, ca maˇ mawˬ taˬ. Cuˇ yiˍ cawˬ paˍ hui shiˍ ve yoˬ, teh‸ kʼoˆ ve htawˇ yawˇ hui shiˍ ve maˇ heˆ.

← Chapter 7 Jump to: Chapter 9 →