Ecclesiastes 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Nawˬ bon yehˬ lo kʼai ve teˇ yanˉ shaˍ ti‸ hkʼa deh‸ taˍ-o‸. Henˇ yuˬ tuˬ awˬ pon kʼai-o. Oˇ hkʼe te ve lehˬ, cawˇ maˇ cawˇ ve hta‸ fuiˍ da‸ pehˬ da‸ maˇ gʼa ve chaw luˬ paˍ hui ve tuˉ tanˇ tuˬ a‸ kehˉ da‸ leuˉ ve yoˬ.

2Nawˬ tawˇ maˇ yaw sheˍ htaˇ hkʼa deh‸ dawˇ nyi-o. Gʼuiˬsha hta‸ hkʼa sha sha-ehˬ ka ti‸ taˇ te. Awˬ lawn kʼo, yawˇ lehˬ mvuhˇ naw ma hkʼoˆ chehˇ taˍ leh, nawˬ lehˬmiˬguiˬ hkʼoˆ chehˇ taˍ ve yoˬ. Chi hta‸ pa taw, nawˬ kʼoˆ keunˍ kʼoˆ cawˇ ve tawˇ a‸ kehˉ leuˉ leh taˇ kʼoˆ.

3Nawˬ shaˬ dawˇ haˍ dawˇ hkiˉ ve kʼo shaˬ maˇ da‸ ve zuh‸ maˆ hta‸ nawˬ gʼa mawˬ tuˬ yoˬ. Nawˬ tawˇ shaˬ yaw ve kʼo shaˬ yaw ya‸ maˇ tuˬ yoˬ.

4Nawˬ Gʼuiˬsha hta‸ ka ti‸ teˇ ceuˬ ceuˬ te taˍ ve kʼo, ka ti‸ oˇ ve hta‸ hkʼa deh‸ vawˆ taˍ leh, biˇ la tuˬ haˆ haˆ te-o. Awˬ lawn kʼo, Gʼuiˬsha lehˬ chaw luˬ paˍ hta‸ nyi ma maˇ cawˇ.

5Ka ti‸ maˇ te ve chaw lehˬ, ka ti‸ te taˍ leh maˇ gʼa‸ te ve chaw a‸ kehˉ da‸ leuˉ ve yoˬ.

6Nawˬ yaw ve tawˇ lehˬ, nawˬ hta‸ venˇbaˆ awˬ hkʼaw lo taˇ ce lo‸-e piˇ. Nawˬ ka ti‸ te peuˬ hkʼaw‸ nawˉ, te maˇ gʼa taˬ law, teh‸ Gʼuiˬsha ve paw hkuˇ hta‸ taˇ ca kʼaw‸ kʼoˆ piˇ. Aˬ hto‸ ma pa taw Gʼuiˬsha nawˬ hta‸ nyi ma zuhˆ tuˬ ca te ve le. Aˬ hto‸ ma pa taw, nawˬ te taˍ ve kanˉ yawˇ hta‸ te luˬ tcuh ve le.

7Nawˬ zuh‸ maˆ hkʼaˬ ma maˆ chehˇ ve maˇ kʼoˆ, tawˇ hkʼaˬ ma yaw leh awˬ bon maˇ cawˬ ve kanˉ hkʼaˬ ma te chehˇ ve maˇ kʼoˆ, Gʼuiˬsha hta‸ nawˬ gʼa kawˆ ve yoˬ.

8Mvuhˇmiˬ hta‸ uˉ peunˍchehˇ ve jawˇmawˇ teˇ hpaˍ, haˍ yaˇ gawˇ yaˇ hta‸ fawˉ mehˍ leh maˇ hteˇ maˇ cawˇ ve hkʼaw suhˉ jehˬ piˇ ve hta‸ nawˬ gʼa mawˬ ve kʼo taˇ anˇ. Awˬ lawn kʼo, yawˇ hui lehˬ yawˇ hui a‸ kehˉ uiˍ ve jawˇmawˇ awˬ hawˉ lo kanˉ te chehˇ leh, yawˇ hui hkʼa peu-eˬ a‸ kehˉ uiˍ ve Jawˇmawˇ htawˇ cawˬ sheˍ ve yoˬ.

9Jawˇmawˇ lonˉ awˬ to htawˇ, awˬ shiˍ awˬ nu teˇ hpaˍ hta‸ gʼaˇ va chehˇ ve yoˬ.

10Hpu hta‸ ha‸ ve chaw lehˬ, hkʼaˬ htaˆ ka‸ nyi hkʼaˇ maˇ suh puiˉ. Paw sha la gaˇ ve chaw lehˬ, yawˇ hkʼa heuˆ gaˇ ve awˬ ceuˬ hkʼa peu-eˬ hta‸ gʼa tuˬ ve maˇ heˆ. Chi ve lehˬ, te‸ chiˉ awˬ bon maˇ cawˬ.

11Nawˬ shaˬ paw sha kʼo shaˬ tawˆ-e kuiˬ maˇ ve yoˬ. Chi hta‸ pa taw, paw sha ve teˇ ceuˬ aˬ hto‸ ma awˬ bon cawˬ le.

12Kanˉ te hkeu‸ ve chaw teˇ gʼaˇ lehˬ, caˇ law‸ ve maˇ kʼoˆ, caˇ maˇ law‸ ve maˇ kʼoˆ, zuh‸ mehˬ puiˉ jaˇ ve yoˬ. Ya‸ hkʼaˇ, paw sha ve chaw lehˬ, zuh‸ maˇ mehˬ. Hkʼa htaˆ ka‸ dawˇ haˍ dawˇ hkiˉ chehˇ puiˉ ve yoˬ.

13Miˬguiˬ hkʼoˆ hpeh‸ bawˬ law‸ law‸ ve awˬ ceuˬ teˇ ceuˬ hta‸ ngaˬ gʼa kʼaw‸ mawˬ ve yoˬ. Chaw yaˇ teˇ hpaˍ lehˬ, loˍ la htaˇ yehˇ tuˬ awˬ pon hpu hta‸ ha‸ shaˉ taˍ ve yoˬ.

14Ya‸ hkʼaˇ, yawˇ hui kanˉ te ya‸ ve pa taw hkʼa peu-eˬ shonˇ kʼai leh, a shu yawˇ ve yaˇ hta‸ piˇ taˉ tuˬ hpu teˇ peh‸ maˇ kʼaw‸ cawˬ.

15Miˬguiˬ chi hkʼoˆ ngaˬ hui lo‸ la htaˇ te‸ chiˉ maˇ yuˬ laˬve hkʼe, ngaˬ hui kʼaw‸ tawˆ kʼai htaˇ htawˇ, oˇ hkʼe hpeh‸ tuˬ yoˬ. Ngaˬ hui kanˉ gʼaˇ hte‸ te chehˇ ve htawˇ, ngaˬ hui te‸ chiˉ yuˬ kʼai maˇ gʼa.

16Chi hkʼe hpeh‸ ve lehˬ dawˇ nyi tuˬ cawˬ ve yoˬ. Ngaˬ hui laˬ ve hkʼe gʼa kʼaw‸ kʼo‸-e tuˬ yoˬ. Ngaˬ hui kanˉ gʼaˇ hte‸ te leh mvuhˇ haw hta‸ gʼa‸ yuˬ chehˇ ve lehˬ, aˬ hto‸ ma awˬ bon cawˬ le.

17Ngaˬ hui lehˬ naˆ ho‸ ve, dawˇ tui‸ gaˇ tui‸ ve, dawˇ haˍ dawˇ hkiˉ ve, nyi ma zuhˆ ve, leh naˬ ve gawˬ ve chi teˇ hpaˍ hta‸ gʼa hkanˍ chehˇ ve yoˬ.

18Chi hta‸ pa taw, ngaˬ chi hkʼe dawˇ shiˍ la ve yoˬ. Chaw yaˇ te keunˍ te cawˇ ve kanˉ lehˬ, Gʼuiˬsha a sha‸ te‸ chehˇ tcuh laˇ ve awˬ yanˇ chi hkʼaw, a shu yawˇ ca gʼa taˍ ve mawˇ hta‸ yehˇ leh ha lehˬ ha kʼa caˇ chehˇ dawˬ chehˇ cawˇ ve yoˬ.

19Gʼuiˬsha lehˬ chaw teˇ gʼaˇ gʼaˇ hta‸ hpu shi mawˇ jeˬ maˇ maˇ cawˬ la piˇ taˍ ve kʼo, chaw oˇ ve lehˬ yawˇ te taˍ ve kanˉ awˬ hkʼaw lo ha lehˬ chehˇ cawˇ ve yoˬ. Chi lehˬ Gʼuiˬsha geh gʼa taˍ ve la‸ shawnˍ hpeh‸ ve yoˬ.

20Gʼuiˬsha yawˇ hta‸ ha lehˬ ha kʼa chehˇ tcuh piˇ taˍ peuˬ ve pa taw, a sha‸ hkʼaˬ ma ngeh jaˇ ve hta‸ yawˇ dawˇ hkiˉ tuˬ ve maˇ heˆ.

← Chapter 4 Jump to: Chapter 6 →