Ecclesiastes 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to:

1Nawˬ yaˇ nehˬ hpeh‸ chehˇ htaˇ, nawˬ hta‸ te hpanˍ shehˍ hpaˇ hta‸ dawˇ nawˇ-oˆ. Nawˬ chehˇ maˇ pi-awˍ ve haiˬ ve awˬ hkʼaw‸ awˬ yanˇ maˇ gaˬ la sheˍ htaˇ ka‸ Gʼuiˬsha hta‸ yawˆ yan-o.

2Nawˬ a sha‸ mawˇ la leh, mvuh nyi, ha pa, meu‸ keu shiˍ teˇ hpaˍ nawˬ awˬ pon awˬ gʼeuˆ nuˇ kʼai ve hkʼe hpeh‸ la htaˇ, nawˬ Gʼuiˬsha hta‸ kʼaw‸ dawˇ nawˇ tuˬ awˬ yanˇ maˇ kʼaw‸ cawˬ.

3Oˇ htaˇ nawˬ ve la‸ sheh cheˇ cheˇ veˆ veˆ hpeh‸ la leh, nawˬ ve hkui sheh htawˇ awˬ gʼaˇ nuˇ kʼai tuˬ yoˬ. Nawˬ ve ciˬ teˇ hpaˍ hkʼeh‸ peuˬ leh, nawˬ ve mehˆ shiˍ htawˇ awˬ gʼaˇ nuˇ kʼai tuˬ yoˬ.

4Nawˬ ve naˍ paw htawˇ pawˇ kʼai tuˬ yoˬ. Shu caˬ teˍ hkawˇ hta‸ maˇ kʼoˆ, shu kʼa muiˬ hkawˇ kʼa chehˇ ve awˬ hkawˇ hta‸ maˇ kʼoˆ, nawˬ kaˇ tuˬ ve maˇ heˆ. Ya‸ hkʼaˇ, mvuhˇ shawˉ teˇ na‸ ngaˆ kuˬ ve awˬ yanˇ htaˇ, nawˬ nawˇ la tuˬ yoˬ.

5Nawˬ lehˬ mvuh ve chehˇ kuiˬ hta‸ kawˆ jaˇ tuˬ yoˬ. Nawˬ ya‸ kʼaw te toˇ chehˇ htaˇ, kawˆ tuˬ dawˇ haˍ tuˬ cawˬ tuˬ yoˬ. Nawˬ ve uˉ hkeh mvuh hpu kʼai leh, yaˇ miˇ geh zuh‸ gaˇ ve nyi ma htawˇ mehˉ kʼai tuˬ yoˬ. Nawˬ lehˬ awˬ leh meuˇ ve gʼa jehˇ kuiˬ lo kʼai chehˇ ve yoˬ. Oˇ htaˇ ya‸ kʼaw hkʼoˆ lo kuˬ hawˬ paˆ hawˬ ve awˬ hkawˇ bvuhˬ tawˆ la tuˬ yoˬ.

6Yoˬ, nawˬ yaˇ nehˬ hpeh‸ chehˇ sheˍ htaˇ, nawˬ hta‸ te hpanˍ shehˍ hpaˇ hta‸ dawˇ nawˇ-oˆ. Awˬ lawn kʼo, hpu caˆ cheˆ kʼai leh shi kawˆ faiˇ hkoˇ kʼai tuˬ yoˬ. Nanˬbawˍ hkʼaw iˉ kaˆ nyiˉ chehˇ ve aˉ caˆ hkeh cheˆ kʼai leh je‸ mu‸ hkʼu hkoˇ kʼai tuˬ yoˬ.

7Oˇ htaˇ, nawˬ ve awˬ to je‸ lo gʼa kʼaw‸ kʼo‸-e leh, nawˬ ve co ha lehˬ Gʼuiˬsha geh gʼa kʼo‸-e tuˬ yoˬ.

8Te‸ chiˉ awˬ bon maˇ cawˬ. Te‸ chiˉ awˬ bon maˇ cawˬ, teh‸ cuˇ yiˍ cawˬ paˍ kʼoˆ ve yoˬ.

9Cuˇ yiˍ cawˬ paˍ lehˬ cuˇ yiˍ uiˍ jaˇ ve pa taw, yawˇ hkʼa shiˍ taˍ ve awˬ ceuˬ hkʼa peu-eˬ chaw yaˇ hui hta‸ maˍ piˇ tcuhˉ taˍ ve yoˬ. Yawˇ lehˬ tcuhˉ kuiˬ naˉ ve tawˇ teˇ hpaˍ hta‸ henˇ yuˬ leh, cawˇ maˇ cawˇ ve hta‸ hkʼa deh‸ shawˍ nyi tehˆ nyi chehˇ ve yoˬ.

10Cuˇ yiˍ cawˬ paˍ lehˬ, na sha ve tawˇ teˇ hpaˍ hta‸ gʼa‸ ca leh cawˇ ve tawˇ teˇ hpaˍ hta‸ bvuh‸ keu taˍ ve yoˬ.

11Cuˇ yiˍ cawˬ paˍ hui yaw ve tawˇ teˇ hpaˍ lehˬ, yawˬ hawˉ paˍ hui yehˇ ve suhˆ taˬ hkʼa shuˍ hpeh‸ ve yoˬ. Tawˇ oˇ ve teˇ hpaˍ lehˬ, ngaˬ hui ve yawˬ hawˉ shehˍ hpaˇ Gʼuiˬsha piˇ taˍ ve tawˇ hpeh‸ ve yoˬ.

12Ngaˬ yaˇ paˍ-oˬ, maˍ laˇ ve tawˇ teˇ hpaˍ hta‸ hkʼa deh‸ na yuˬ-o‸. Li‸ teˇ ceuˬ lehˬ ca bvuh‸ tawˆ leh maˇ peuˬ taˬ. Nawˬ gʼaw leh henˇ yuˬ maˇ ve kʼo, uˉ naw‸ nehˆ naˬ leh heuˬ ve tiˉ yoˬ.

13Awˬ leh meuˇ ve teˇ ceuˬ lehˬ chi hkʼe yoˬ. Gʼuiˬsha hta‸ kawˆ leh yawˇ ve awˬliˇtawˇhkawˇ teˇ hpaˍ hta‸ na yuˬ-o‸. Chi hkʼe te tuˬ, Gʼuiˬsha ngaˬ hui hta‸ te hpanˍ taˍ laˇ ve yoˬ.

14Gʼuiˬsha lehˬ ngaˬ hui te taˍ ve kanˉ hta‸ keunˍ da‸ ve hkʼe suhˉ jehˬ laˇ tuˬ ve yoˬ.

← Chapter 11 Jump to: