Ecclesiastes 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Suh peuˬ ve puiˉ ma teˇ hpaˍ lehˬ naˍ manˇ hawnˉ teˇ kaw hkʼa peu-eˬ ve hta‸ kuiˇ nuˬ kʼai piˇ gʼa ve yoˬ. A ciˉ ceh te ya‸ ve teˇ ceuˬ htawˇ uiˍ jaˇ ve cuˇ yiˍ hta‸ luˬ kʼai piˇ gʼa ve yoˬ.

2Cuˇ yiˍ cawˬ ve chaw lehˬ da‸ ve kanˉ hta‸ tiˉ te leh, chaw luˬ paˍ lehˬ haiˬ ve kanˉ hta‸ tiˉ te ve yoˬ.

3Chaw teˇ gʼaˇ ya‸ kʼaw te toˇ chehˇ ve hta‸ ceh nyi ve ka‸, yawˇ chaw luˬ paˍ hpeh‸ ve hta‸ hkʼa tawˍ lehˆ shiˍ hpeh‸ ve yoˬ.

4Nawˬ ve awˬ hoˉ awˬ naˬ teˇ gʼaˇ nawˬ hta‸ nyi ma zuhˆ ve kʼo, nawˬ kanˉ hkʼaw tawˆ-e gaˇ ve awˬ lawn yawˇ hta‸ taˇ kʼoˆ piˇ. Nawˬ te ya‸ jaˇ peuˬ ve htawˇ ta‸ iˉ gawˬ lehˍ chehˇ taˍ ve kʼo, yawˇ nawˬ hta‸ venˇbaˆ hpehˇ laˇ tuˬ yoˬ.

5Miˬguiˬ hkʼoˆ lo maˇ hteˇ maˇ cawˇ ve awˬ ceuˬ hta‸ ngaˬ gʼa kʼaw‸ mawˬ ve yoˬ. Chi ve lehˬ jawˇmawˇ leh uˉ peunˍ shehˍ hpaˇ teˇ hpaˍ hta‸ caˉ da‸ ve yoˬ.

6Yawˇ hui lehˬ chaw luˬ paˍ teˇ hpaˍ hta‸ aˉ yaˇ yuˬ uiˍ yuˬ mvuh piˇ leh, paw sha ve chaw hui hta‸ shawˍ baˬ taˍ ve yoˬ.

7Awˬ ceˬ paˍ teˇ hpaˍ iˉ mvuhˇ ciˇ toˇ chehˇ leh, awˬ me‸ awˬ hponˇ cawˬ ve chaw hui ya‸ kʼaw juˇ toˇ chehˇ ve hta‸ htawˇ ngaˬ gʼa mawˬ ve yoˬ.

8Nawˬ miˬ kʼoˍ duˇ taˍ ve kʼo, miˬ kʼoˍ hkʼaw ce lo‸-e tuˬ yoˬ. Nawˬ lanˇ venˇ hta‸ dawˆ paˆ leh lo‸-e ve kʼo vuiˬ htawˆ tuˬ yoˬ.

9Nawˬ haˉ pui duˇ tawˆ ve kʼo haˉ pui pu teˍ tuˬ yoˬ. Nawˬ suhˆ jeˆ ve kʼo ceˉ ceˇ htawˆ heuˆ la tuˬ yoˬ.

10Nawˬ ve ceˉ ceˇmaˇ tcuhˆ leh nawˬ maˇ kʼaw‸ gu shiˍ ve kʼo, nawˬ kanˉ te ve awˬ gʼaˇ peuˬ jaˇ tuˬ yoˬ. Teˇ na‸ ka‸ gu taˍ ve kʼo awˬ bon cawˬ maˇ ve yoˬ.

11Vuiˬ nawˬ hta‸ gʼa htawˆ peuˬ ve kʼo nawˬ shaˉ hkʼaˬ ma shiˍ ka‸ hkʼe leˇ yoˬ.

12Cuˇ yiˍ cawˬ ve chaw yaw ve tawˇ lehˬ yawˇ awˬ to hta‸ awˬ me‸ awˬ hponˇ kʼaw‸ cawˬ la piˇ ve yoˬ. Ya‸ hkʼaˇ, chaw luˬ paˍ yaw ve tawˇ lehˬ, yawˇ awˬ to hta‸ luˬ kʼai piˇ ve yoˬ.

13Chaw luˬ paˍ lehˬ awˬ hkuiˉ puiˍ te leh awˬ leh meuˇ hkʼa gaˬ cha‸ chiˆ ve tawˇ hta‸ ceh yaw puiˉ ve yoˬ.

14Laˬ tuˬ ve awˬ yanˇ hkʼaw hkʼaˬ hkʼe hpeh‸ la tuˬ ve hta‸ yawˇ shiˍ taˍ ve yoˬ, teh‸ kʼoˆ ve yoˬ. Ya‸ hkʼaˇ, hkʼaˬ hkʼe hpeh‸ la tuˬ ve hta‸ chaw teˇ gʼaˇ ka‸ ngaˬ hui hta‸ kʼoˆ maˍ laˇ maˇ gʼa.

15A shu yawˇ ve yehˬ lo kʼo‸-e tuˬ ya‸ kʼaw ca maˇ gʼa ve chaw luˬ paˍ lehˬ, hkeu‸ leh gʼaˇ heuˬ jaˇ tuˬ yoˬ.

16A sha‸ iˍ sheˍ ve jawˇmawˇ leh teˇ haˉ tanˇ hkuinˇ tzuhˬ bvuhˆ chehˇ ve a ma‸ lonˉ teˇ hpaˍ awˬ hawˉ lo gʼa chehˇ ve mvuhˇmiˬ yaˇ teˇ hpaˍ gʼa dawˇ haˍ jaˇ tuˬ yoˬ.

17Ya‸ hkʼaˇ, awˬ me‸ awˬ hponˇ cawˬ ve jawˇmawˇ leh awˬ yanˇ cawˇ cawˇ caˇ puiˉ dawˬ puiˉ ve a ma‸ lonˉ teˇ hpaˍ awˬ hawˉ lo gʼa chehˇ ve mvuhˇmiˬ yaˇ teˇ hpaˍ gʼa ha lehˬ tuˬ yoˬ.

18A shu yawˇ ve yehˬ hta‸ kʼaw‸ gu beh tuˬ bawˬ jaˇ ve chaw lehˬ, mvuhˇ yeˬ jaˆ teˍ ve hta‸ gʼa hkanˍ leh, maˇ maw maw yehˬ oˇ ve paiˍ tuˬ yoˬ.

19Hti caˇ hti dawˬ ve teˇ ceuˬ nawˬ hta‸ ha lehˬ la piˇ leh, a pehˉ meuˇ gʼuiˬ htawˇ nawˬ hta‸ ha lehˬ la piˇ ve yoˬ. Ya‸ hkʼaˇ, nawˬ hpu maˇ cawˬ ve kʼo, oˇ ve nyiˇ ceuˬ ceuˬ hta‸ gʼa maˇ hpeh‸.

20Baˬ kuiˬ lo jawˇmawˇ hta‸ taˇ hkʼawˇ deˇ. Nawˬ ve zuh‸ kuiˬ bawehˇ hkʼaw chehˇ taˍ leh paw sha ve chaw hta‸ taˇ hkʼawˇ deˇ. Nawˬ hkʼawˇ deˇ ve tawˇ oˇ ve teˇ hpaˍ ngaˆ ehˉ ca kʼaw‸ hto piˇ tuˬ yoˬ.

← Chapter 9 Jump to: Chapter 11 →