Job 38

Lahu Bible Edited © Thailand Bible Society and Bible Society of Myanmar, 2010, 2020.

← Chapter 37 Jump to: Chapter 39 →

1Oˇ ve hkʼaw‸ nawˉ Gʼuiˬsha lehˬ, mvuhˇ haw mvuhˇ yeˬ lonˉ hkʼaw chehˇ taˍ leh Yawˇbaˆ hta‸ tawˇ yaw piˇ ve yoˬ.

2Te‸ chiˉ tcuhˉ kuiˬ maˇ cawˬ ve tawˇ hta‸ yaw leh, ngaˬ ve cuˇ yiˍ hta‸ na nyi chehˇ ve nawˬ lehˬ, a shu hpeh‸ ve le.

3Chi beu‸ hawˉ hkʼaˆ paˍ hkʼe tu huˉ taˍ leh, ngaˬ na nyi laˇ ve na nyi hkawˇ teˇ hpaˍ hta‸ kʼaw‸ yaw hkʼaw‸ laˇ-oˆ.

4Ngaˬ miˬguiˬ hta‸ te hpanˍ chehˇ ve teˇ yanˇ, nawˬ ka‸ oˇ kaˬ lo chehˇ taˍve laˇ. Nawˬ shiˍ jaˇ ve kʼo, awˬ lawn oˇ ve teˇ hpaˍ ngaˬ hta‸ kʼoˆ maˍ laˇ-oˆ.

5Miˬguiˬ oˇ ve hkʼaˬ hui cawˬ cawˇ ve hta‸ dawˇ cheˆ shehˍ hpaˇ a shu le. Tehˆ nyi tuˬ ve aˉ caˆ hkeh hta‸ a shu gʼawˬ hteˇ taˍ ve le. Chi hta‸ nawˬ kʼaw‸ yaw hkʼaw‸ laˇ hpeh‸-aw laˇ.

6Miˬguiˬ hta‸ kanˬ chiˇ taˍ ve yehˬ hkuiˉ daw hta‸ aˬ hto‸ ma yuˬ ti piˇ taˍ ve le. Miˬguiˬ ve awˬ hkuiˉpuiˍ hta‸ a shu teh taˍ ve le.

7Awˬ nyi oˇ ve teˇ nyi mvuhˇ shawˉ teˇ na‸ htaˇ, meu‸ keu shiˍ teˇ hpaˍ teˇ geh kʼa muiˬ hkawˇ kʼa leh, mvuhˇ naw yaˇ teˇ hpaˍ ha lehˬ ha kʼa kuˬ chehˇ ve yoˬ.

8Miˬguiˬ ve gʼoˇ peˬ hkʼaw pe‸ tawˆ la ve teˇ nyi, laˇ tsuhˇ gʼuiˬ hta‸ tawˍ taˍ piˇ tuˬ, a shu teˇ gʼaˇ taˍ meu‸ hpe‸ teˇ hpaˍ hta‸ ca hoˆ piˇ taˍ ve le.

9Laˇ tsuhˇ gʼuiˬ hta‸ moˬ yuˬ beh piˇ leh, naˆ ho‸ kuiˬ lo htiˆ keu piˇ taˍ ve lehˬ ngaˬ yoˬ.

10Ngaˬ lehˬ laˇ tsuhˇ gʼuiˬ hta‸ miˬ tcuhˉ tawˍ piˇ leh, hoˆ taˍ ve taˍ meu‸ hpe‸ awˬ baˬ hpawˇ lo teh taˍ ve yoˬ.

11Chi fui gaˬ la kʼo pehˇ-o. Chi ve awˬ nu nawˬ maˇ gʼa kʼai. Nawˬ ve awˬ gʼaˇ uiˍ ve gʼuiˬ baˇ teˇ hpaˍ choˬ kaˬ lo ceh gʼa jehˇ taˍ ve yoˬ, teh‸ ngaˬ laˇ tsuhˇ gʼuiˬ hta‸ kʼoˆ piˇ taˍ ve yoˬ.

12Yawˇbaˆ-oˬ, nawˬ a sha‸ te‸ chehˇ ve teˇ co-e, awˬ nyi teˇ nyi hpeh‸ tawˆ la tuˬ tawˇ piˇ jaw laˇ.

13Nawˬ lehˬ, miˬguiˬ hta‸ yuˬ tiˍ taˍ leh, chaw haiˬ teˇ hpaˍ hta‸ fui baˬ piˇ tuˬ tawˇ piˇ jaw laˇ.

14Mvuhˇ law‸ kʼaw ve awˬ gʼeuˆ lehˬ, hkʼaw pui leh lawˬ hkʼo‸ teˇ hpaˍ hta‸ aˉ po‸ hkʼa shuˍ kʼaw‸ kʼaw‸ kʼeh kʼeh cawˬ la piˇ leh, je‸ hkʼoˆ lo cuˍ dawˆ keu taˍ ve hkʼe awˬ haiˇ cawˬ la piˇ ve yoˬ.

15Mvuhˇ law‸ kʼaw htaˇ ve awˬ gʼeuˆ lehˬ, haiˬ ve chaw teˇ hpaˍ hta‸ mehˆ hkehˇ piˇ lawˬ leh, haiˬ ve kanˉ hta‸ maˇ gʼa te tuˬ tawˍ taˍ piˇ ve yoˬ.

16Naˉ jaˇ ve laˇ tsuhˇ gʼuiˬ hkʼaw iˉ kaˆ gʼuiˬ tuˇ tawˆ la chehˇ kuiˬ lo nawˬ gaˬ jaw laˇ. Laˇ tsuhˇ gʼuiˬ hkʼoˆ lo nawˬ ya‸ kʼaw juˇ kʼai jaw laˇ.

17Suh mvuhˇmiˬ hta‸ shaw kuiˬ taˍ meu‸ hpe‸ lo, chaw teˇ gʼaˇ gʼaˇ nawˬ hta‸ shiˍ maˍ laˇ jaw laˇ.

18Miˬguiˬ chi hkʼaˬ hui cawˬ ve hta‸ nawˬ shiˍ-aw laˇ. Nawˬ shiˍ ve kʼo, ngaˬ hta‸ kʼaw‸ yaw hkʼaw‸ laˇ-oˆ.

19Awˬ gʼeuˆ hkʼaˬ lo tawˆ la ve hta‸ maˇ kʼoˆ, naˆ ho‸ ve awˬ hkuiˉ puiˍ aˬ hto‸ ma hpeh‸ ve hta‸ maˇ kʼoˆ, nawˬ shiˍ-aw laˇ.

20Yawˇ hui hkʼaˬ fui gʼa kʼai tuˬ ve hta‸ nawˬ kʼoˆ maˍ piˇ gʼa-aw laˇ. Maˇ heˆ kʼo, yawˇ hui hta‸ awˬ hkʼaw‸ nawˉ hpawˇ lo kʼaw‸ kʼo‸-e tcuh gʼa-aw laˇ.

21Nawˬ lehˬ, mawˇ la peuˬ leh miˬguiˬ hta‸ te hpanˍ htaˇ ka‸ oˇ kaˬ lo chehˇ taˍ ve pa taw, nawˬ awˬ tehˬ awˬ na oˇ hkʼe te gʼa tuˬ yoˬ hehˉ.

22Vaˇ meu-e leh vaˇ shiˍ teˇ hpaˍ hta‸ ngaˬ ha‸ shaˉ piˇ taˍ kuiˬ bawehˇ teˇ hpaˍ lo, nawˬ ca guiˇ gaˬ jaw laˇ.

23Oˇ ve teˇ hpaˍ hta‸ sho‸ sha‸ ve awˬ yanˇ leh, bawˆ da‸ chaw da‸ ve awˬ yanˇ awˬ pon ngaˬ hkʼa deh‸ gu teh taˍ ve yoˬ.

24Mvuhˇ nyi tanˬ tawˆ la kuiˬ lo nawˬ gaˬ jaw laˇ. Maˇ heˆ kʼo, mvuhˇ nyi tawˆ hpawˇ ve mvuhˇ haw tanˬ meuˆ tawˆ la kuiˬ lo nawˬ gaˬ jaw laˇ.

25Mvuhˇ yeˬ laˬ tuˬ aw pon a shu gʼuiˬ hkʼaˇ shawˍ piˇ taˍ ve le. Mvuhˇ haw mvuhˇ yeˬ lonˉ awˬ pon a shu ya‸ kʼaw gu piˇ taˍ ve le.

26Chaw teˇ gʼaˇ ka‸ maˇ chehˇ ve chehˇ kuiˬ lo a shu teˇ gʼaˇ mvuhˇ yeˬ laˬ piˇ lawˬ ve le.

27Mvuh‸ teˇ hpaˍ yeˬ tawˆ la gʼa tuˬ, goˇ jaˇ ve miˬguiˬ hta‸ a shu iˉ kaˆ pfuhˍ piˇ taˍ ve le.

28Mvuhˇ yeˬ leh ciˍ gʼuiˬ lehˬ, awˬ pa cawˬ-aw laˇ.

29A ngeu diˬve awˬ e a shu le.

30A ngeu lehˬ iˉ kaˆ hta‸ haˉ pui shiˍ kʼaw‸ hpeh‸ la piˇ leh, laˇ tsuhˇ gʼuiˬ ve mehˆ hpfuhˇ hta‸ awˬ diˬ hpeh‸ la piˇ ve yoˬ.

31Nawˬ lehˬ, Hkiˇmaˆ meu‸ keu shiˍ lonˉ hta‸ hpeh tiˍ taˍ gʼa-aw laˇ. Maˇ heˆ kʼo, Kaˍtiˆlaˆ meu‸ keu shiˍ hta‸ hpeh taˍ ve aˉ hkeh hta‸ nawˬ hpui baˬ gʼa-aw laˇ.

32Nawˬ lehˬ, teˇ yanˇ peuˬ teˇ yanˇ meu‸ keu shiˍ teˇ hpaˍ hta‸ ya‸ kʼaw beˆ maˍ piˇ gʼa-aw laˇ. Aˍsaˆ meu‸ keu shiˍ lonˉ leh, meu‸ keu shiˍ ehˉ teˇ hpaˍ hta‸ awˬ hkʼaˇ beˆ maˍ piˇ gʼa-aw laˇ.

33Mvuhˇ naw ma hta‸ uˉ peunˍ tuˬ ve awˬ liˇ uˉ paˍ teˍ teˇ hpaˍ hta‸ nawˬ shiˍ-aw laˇ. Oˇ ve teˇ hpaˍ hta‸ yuˬ leh nawˬ miˬguiˬ hta‸ uˉ peunˍ tuˬ te gʼa-aw laˇ.

34Nawˬ hta‸ mvuhˇ yeˬ nehˆ la piˇ tuˬ, moˬ hta‸ nawˬ tawˇ piˇ gʼa-aw laˇ.

35Mvuhˇ tiˉ po-e‸ hta‸ nawˬ tawˇ piˇ leh awˬ gʼeuˆ ba tcuh ve teˇ yanˇ, yawˇ nawˬ geh laˬ leh, Nawˬ te tcuh laˇ ve hkʼe te tuˬ yoˬ, teh‸ nawˬ hta‸ kʼoˆ laˇ tuˬ laˇ.

36Niˍlaˆ iˉ kaˆ lawˬ uiˍ taˆ la tuˬ yoˬ, teh‸ a shu teˇ gʼaˇ iˉ kaˆ lawˬ hkʼaw chehˇ ve iˉ biˆ ngaˆ ehˉ hta‸ koˆ piˇ taˍ ve le. Maˇ heˆ kʼo, Mvuhˇ yeˬ laˬ tuˬ yoˬ, teh‸ a shu teˇ gʼaˇ gʼaˆ hpfuh kʼaˍ hta‸ kʼoˆ piˇ taˍ ve le.

37Cuˇ yiˍ cawˬ paˍ a shu teˇ gʼaˇ moˬ hta‸ gʼaw gʼa leh, je‸ meu-e hta‸ awˬ diˬ hpeh‸ la piˇ tuˬ,

38moˬ hta‸ teˇ paˉ suhˉ tcuh leh mvuhˇ yeˬ ya‸ la piˇ gʼa le.

39Nawˬ lehˬ laˇ caˬ shiˉ teˇ hpaˍ hta‸ caˇ tuˬ caˍ piˇ leh, meu‸ jehˇ chehˇ leh,

40haˉ kʼoˍ hkʼaw va‸ chehˇ zuh‸ chehˇ taˍ ve laˇ caˬ shiˉ ehˉ teˇ hpaˍ hta‸ nyi ma sha la piˇ chehˇ ve laˇ.

41Aˉ naˆ kʼaˍ teˇ hpaˍ awˍ meu‸ leh poˬ caw chehˇ htaˇ, a shu yawˇ hui hta‸ caˇ tuˬ caˍ piˇ ve le. Yawˇ hui ve awˬ yehˇ teˇ hpaˍ awˍ meu‸ leh ngaˬ hta‸ kuˬ ve teˇ yanˇ, a shu caˇ tuˬ caˍ piˇ ve le.

← Chapter 37 Jump to: Chapter 39 →

Recommended Reading

Commentary Job Commentaries → Devotional Job Devotional Guide → Get This Bible Lahu Bible Edited © Thailand Bible Society and Bible Society of Myanmar, , . Study Bible →