Song of Solomon 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Chi ve lehˬ, jawˇmawˇ lonˉ Sawˉla‸monˍ bvuh‸ taˍ ve na sha jaˇ ve kʼa muiˬ hkawˇ hpeh‸ ve yoˬ.

2Ngaˬ hta‸ teˇ pawˆ peuˬ teˇ pawˆ boˆ nu laˇ-oˆ. Awˬ lawn kʼo, nawˬ ve ha‸ pehnˇ ve teˇ ceuˬ lehˬ, mehˬ jaˇ ve a pehˉ meuˇ gʼui‸ a‸ kehˉ da‸ jaˇ ve yoˬ.

3Nawˬ lehˬ awˬ pe‸ hawnˉ jaˇ leh, nawˬ ve awˬ meh htawˇ bvuhˬ jaˇ ve yoˬ. Yaˇ miˇ teˇ gʼaˇ ka‸ nawˬ hta‸ maˇ ha‸ leh chehˇ maˇ hpeh‸.

4Ngaˬ hta‸ ca shiˍ la-o. Ngaˬ huiˉ maˬ hkʼawˇ shiˍ da‸ hpaw-e veuˬ. Nawˬ ngaˬ ve jawˇmawˇ te leh, ngaˬ hta‸ nawˬ ve bawehˇ hkʼaw shiˍ kʼai laˇ-oˆ. Nawˬ choˬ kaˬ chehˇ taˍ ve pa taw, ngaˬ huiˉ maˬ a pehˉ meuˇ gʼuiˬ dawˬ leh, ha lehˬ ha kʼa te chehˇ-a veuˬ. Nawˬ hta‸ gʼa ha‸ ve teˇ ceuˬ hkʼaˬ ma da‸ jaˇ ve le.

5Ngaˬ lehˬ awˬ shaˍ naˆ ve htawˇ, awˬ hkiˇ awˬ naˬ da‸ chehˇ ve yoˬ. Yeˍruˆsaˍlehnˍ yaˇ miˇ teˇ hpaˍ-oˬ, ngaˬlehˬ heh puiˉ hkʼaw lo cawˬ ve aˉ po kʼo hkʼa shuˍ naˆ tawˉ-ehˍ hpeh‸ leh, Sawˉla‸monˍ ve hawˉ yehˬ hkʼaw ko taˍ ve hpa hkʼa shuˍ hpeh‸ ve yoˬ.

6Ngaˬ awˬ shaˍ naˆ ve pa taw taˇ nyi bawˬ laˇ. Awˬ lawn kʼo, mvuhˇ nyi ngaˬ hta‸ awˬ shaˍ naˆ tuˬ te laˇ ve yoˬ. Ngaˬ ve awˬ viˉ paˍ teˇ hpaˍ ngaˬ hta‸ nyi ma zuhˆ leh, ngaˬ hta‸ a pehˉ meuˇ hko hkʼaw kanˉ te tcuh laˇ ve yoˬ. Chi hta‸ pa taw, ngaˬ ve awˬ to hta‸ ha‸ shaˉ tuˬ ve awˬ yanˇ maˇ cawˬ.

7Ngaˬ ha‸ ve chaw haˉ paˍ-oˬ, ngaˬ hta‸ a ciˉ hto laˇ-oˆ. Nawˬ ve ceˇ caˬ teˇ hpaˍ hta‸ hkʼaˬ lo ca hawˉ tuˬ le. Mvuhˇ law‸ kʼaw tcuhˆ htaˇ, yawˇ hui hta‸ hkʼaˬ lo gʼaˇ shiˍ jehˇ piˇ tuˬ le. Awˬ nu ve yawˬ hawˉ paˍ hkʼa biˇ cawˬ ve yoˬ. Ngaˬ nawˬ hta‸ hkʼaˬ lo ca mawˬ tuˬ ve le.

8Shu a‸ kehˉ awˬ hkiˇ awˬ naˬ da‸ jaˇ ve yaˇ miˇ haˉ-oˬ, nawˬ chehˇ kuiˬ maˇ shiˍ leh laˇ. Nawˬ ve aˉ che‸ teˇ hpaˍ hta‸ gʼa‸ veu leh, yawˬ hawˉ paˍ hui ve aˉ po kʼo paˇ lo ca hawˉ-e loˬ.

9Hpaˍrawˇ ve iˉ mvuhˇ lawˬ hta‸ gʼawˬ toˇ chehˇ ve iˉ mvuhˇ awˬ paˍ lehˬ, iˉ mvuhˇ awˬ ma hta‸ mawˬ leh hkʼawˇ faˍ ve hkʼe, ngaˬ ve yaˇ miˇ haˉ-oˬ, hawˉ hkʼaˆ paˍ teˇ hpaˍ nawˬ hta‸ hkʼawˇ faˍ jaˇ ve yoˬ.

10Nawˬ ve mehˆ hpfuhˇ hkʼoˆ lo hpehˇ ya‸ taˍ ve uˉ hkeh mvuh hkʼaˬ ma nyi sha ve le. Uˉ hkeh mvuh lehˬ shehnˉ shiˍ hkʼe, nawˬ ve kʼawˍ peˍ hkʼoˆ lo ya‸ la taˍ ve yoˬ.

11Ngaˬ hui nawˬ awˬ pon shi caˆ leh hpu naˍ vawˇ teˇ hpaˍ te laˇ tuˬ yoˬ.

12Ngaˬ ve jawˇmawˇ zuh‸ hpui hkʼoˆ mui chehˇ ve teˇ yanˇ, ngaˬ ve naˍ manˇ hawnˉ awˬ pe‸ hawnˉ jaˇ ve yoˬ.

13Ngaˬ ve chaw haˉ paˍ lehˬ, ngaˬ ve nyi ma pui hkʼoˆ ngeh zuh‸ chehˇ ve teˇ yanˇ, muˉraˍ awˬ pe‸ hawnˉ jaˇ ve yoˬ.

14Ngaˬ ve chaw haˉ paˍ lehˬ, Enˍgaˍdiˆ hko hkʼaw lo veˆ chehˇ ve suhˉ veˆ hkʼa shuˍ hpeh‸ ve yoˬ.

15Ngaˬ ve yaˇ miˇ haˉ-oˬ, nawˬ lehˬ awˬ hkiˇ awˬ naˬ hkʼaˬ ma da‸ jaˇ ve le. Nawˬ ve mehˆ shiˍ htawˇ hkʼaˬ ma nyi sha jaˇ ve le.

16Ngaˬ ha‸ jaˇ ve chaw haˉ paˍ-oˬ, nawˬ lehˬ awˬ hkiˇ awˬ naˬ hkʼaˬ ma da‸ jaˇ leh hkʼaˬ ma nyi sha jaˇ ve le.

17Nawˉ lehˍ ve mvuh‸ chi teˇ hpaˍ lehˬ ngaˬ hui ve zuh‸ kuiˬ hpeh‸ leh, htawˇ cehˬ, yawnˉ cehˬ chi teˇ hpaˍ htawˇ ngaˬ hui ve yehˬ hpeh‸ ve yoˬ.

Jump to: Chapter 2 →