Song of Solomon 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Ngaˬ heuˆ tuˬ ve yaˇ miˇ haˉ-oˬ, ngaˬ ve hko hkʼaw lo ngaˬ gaˬ la taˍ peuˬ. Ngaˬ ve muˇraˍ leh lawˇbanˍ hta‸ ngaˬ shaw hpoˆ taˍ leh, pehˇ gʼuiˬ, nuˇ cuˉ gʼuiˬ leh a pehˉ meuˇ gʼuiˬ hta‸ dawˬ chehˇ ve yoˬ. Chaw haˉ paˍ teˇ hpaˍ-oˬ, hkʼa bvuhˆ caˇ leh hkʼa bvuhˆ dawˬ-o‸.

2Ngaˬ lehˬ zuh‸ muiˉ kʼa chehˇ ve htawˇ, ngaˬ ve nyi ma nawˇ chehˇ taˍ ve yoˬ. Zuh‸ maˆ ve awˬ hkʼaw lo, ngaˬ ve chaw haˉ paˍ yehˬ miˉ ca htawˆ la ve yoˬ. Ngaˬ heuˆ tuˬ ve yaˇ miˇ haˉ, ngaˬ ve aˉ pui kʼaˍ ehˉ-oˬ, ngaˬ hta‸ yehˬ miˉ a ciˉ hpaw laˇ-oˆ. Awˬ lawn kʼo, ngaˬ ve oˉ kʼoˍ leh uˉ hkeh mvuh teˇ hpaˍ ciˍ gʼuiˬ nehˆ kʼai peuˬ.

3Ngaˬ veu‸ kʼaˇ kʼehˆ baˬ taˍ peuˬ. Teˇ pawˆ gʼa kʼaw‸ gʼawˆ veuˬ tuˬ ve laˇ. Ngaˬ ve hkui sheh hta‸ htawˇ hkʼa deh‸ tsuhˇ taˍ peuˬ. Teˇ pawˆ gʼa kʼaw‸ cha‸ chiˆ piˇ tuˬ ve laˇ.

4Ngaˬ ve chaw haˉ paˍ lehˬ yehˬ miˉ hta‸ coˇ caˇ leh hpaw chehˇ ve yoˬ. Ngaˬ yawˇ hta‸ ha kʼaˉ ve nyi ma cawˬ la ve yoˬ.

5Hkʼe te leh, ngaˬ yehˬ miˉ tu hpaw piˇ ve yoˬ. Ngaˬ ve la‸ sheh leh la‸ naw teˇ hpaˍ hta‸ muˇraˍ shehˍ taˍ ve yoˬ.

6Ngaˬ ve chaw haˉ paˍ awˬ pon ngaˬ yehˬ miˉ hpaw piˇ ve yoˬ. Ya‸ hkʼaˇ, yawˇ tawˆ kʼai peuˬ. Yawˇ tawˇ yaw laˇ ve awˬ hkawˇ hta‸ ngaˬ kaˇ gaˇ jaˇ ve yoˬ. Ngaˬ yawˇ hta‸ gʼa‸ ca ve htawˇ ca maˇ mawˬ. Ngaˬ yawˇ hta‸ kuˬ nyi ve htawˇ, te‸ chiˉ hkawˇ maˇ gʼa kaˇ.

7Venˇ shaw shehˍ hpaˇ teˇ hpaˍ ngaˬ hta‸ mawˬ leh dawˆ hpehˇ laˇ ve yoˬ. Lanˇ venˇ hta‸ shaw shehˍ hpaˇ teˇ hpaˍ ngaˬ ve uˉ nyiˉ hta‸ tzuh‸ suhˍ laˇ ve yoˬ.

8Yeˍruˆsaˍlehnˍ yaˇ miˇ teˇ hpaˍ-oˬ, nawˬ hui hta‸ lawˬ hkawˉ ve yoˬ. Nawˬ hui ngaˬ ve chaw haˉ paˍ hta‸ gʼa mawˬ ve kʼo, ngaˬ yawˇ hta‸ dawˇ law chehˇ ve yoˬ, teh‸ a ciˉ hto piˇ-oˆ.

9Shu a‸ kehˉ awˬ hkiˇ awˬ naˬ da‸ ve yaˇ miˇ haˉ-oˬ, nawˬ ve chaw haˉ paˍ awˬ ho‸ awˬ han hkʼaˬ hkʼe cawˬ ve ngaˬ hui hta‸ a ciˉ hto maˍ laˇ-oˆ. Nawˬ hta‸ ngaˬ hui gʼa kʼaw‸ hto laˇ tuˬ, nawˬ ve chaw haˉ paˍ hkʼaˬ hkʼe taw da‸ ve le.

10Ngaˬ ve chaw haˉ paˍ lehˬ, awˬ hkiˇ awˬ naˬ da‸ jaˇ leh awˬ gʼaˇ awˬ shaˉ uiˍ ve yoˬ. Chaw teˇ meunˍ gʼaˇ hkʼaw lo, yawˇ hkʼe ve chaw teˇ gʼaˇ ceh cawˬ ve yoˬ.

11Yawˇ ve mehˆ hpfuhˇ lehˬ, shi hkʼa shuˍ awˬ gʼeuˆ ba ve yoˬ. Yawˇ ve uˉ hkeh mvuh kʼaw‸ lehˍ cawˬ leh, aˉ naˆ kʼaˍ hkʼe naˆ tawˉ lehˍ cawˬ ve yoˬ. Oˇ ve lehˬ, shi a‸ kehˉ awˬ hpfuhˇ hkʼaˆ jaˇ ve yoˬ.

12Yawˇ ve mehˆ shiˍ lehˬ nuˇ cuˉ gʼuiˬ hkʼaw tsuhˇ peuˬ leh, iˉkaˆ lawˬ pfuhˍ lo chehˇ taˍ ve aˉ pui kʼaˍ hkʼe hpeh‸ ve yoˬ.

13Yawˇ ve mehˆ hpfuhˇ lehˬ awˬ pe‸ hawnˉ ve hko hkʼe hpeh‸ leh, yawˇ ve meuˇ guiˬ lehˬ muˇraˍ shehˆ taˍ ve shiˍ ya‸ veˆ hkʼe hpeh‸ ve yoˬ.

14Yawˇ ve la‸ sheh nyi sha leh, shehnˉ shiˍ yuˬ te taˍ ve la‸ kawˬ tcuhˉ taˍ ve yoˬ. Yawˇ ve awˬ to lehˬ, awˬ gʼeuˆ ba ve haw ciˬ hkʼe hpeh‸ leh, shehnˉ shiˍ teˇ hpaˍ nehˉ taˍ ve yoˬ.

15Yawˇ ve hkui sheh lehˬ, shi hkʼoˆ teh taˍ ve haˉ pui hkuiˉ daw hkʼe hpeh‸ ve yoˬ. Yawˇ ve awˬ ho‸ awˬ han lehˬ da‸ jaˇ ve htawˇ cehˬ hkʼa biˇ cawˬ ve Leˍbaˍnonˍ hkʼaw hkʼe hpeh‸ ve yoˬ.

16Yawˇ ve maw‸ kʼaw lehˬ chaw jaˇ leh, yawˇ hta‸ ngaˬ nyi ma cawˇ jaˇ ve yoˬ. Yeˍruˆsaˍlehnˍ yaˇ miˇ teˇ hpaˍ-oˬ, chi ve lehˬ ngaˬ ve chaw haˉ paˍ ve awˬ ho‸ awˬ han hpeh‸ ve yoˬ.

← Chapter 4 Jump to: Chapter 6 →