Song of Solomon 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Awˬ hkiˇ awˬ naˬ da‸ jaˇ ve yaˇ miˇ haˉ-oˬ, hkuiˉ nuˆ tcuhˉ taˍ ve nawˬ ve hkui sheh hkʼaˬ ma nyi sha jaˇ ve le. Nawˬ ve pfuhˬ tehˉ kʼu lehˬ, puiˉ jaˇ ve la‸ shaˉ maˇ te taˍ ve awˬ han hkʼe hpeh‸ ve yoˬ.

2Nawˬ ve caw‸ cehˍ nyi lehˬ, a pehˉ meuˇ gʼuiˬ hkʼa biˇ keu taˍ ve kawˆ hkʼe hpeh‸ ve yoˬ. Nawˬ ve gʼoˇ peˬ htawˇ shiˍ ya‸ veˆ hpoˆ taˍ ve hkʼe hpeh‸ ve yoˬ.

3Nawˬ ve cuˉ teˇ hpaˍ lehˬ, hkuiˉ zuhˬ yaˇ cehˬ kʼa hkʼe hpeh‸ ve yoˬ.

4Nawˬ ve kʼawˍ peˍ lehˬ, haw ciˬ yuˬ te taˍ ve ta‸ yehˬ hkʼe hpeh‸ ve yoˬ. Nawˬ ve mehˆ shiˍ teˇ hpaˍ lehˬ, Heˍsaˍbonˍ venˇ taˍ meu‸ hpe‸ lo cawˬ ve iˉ kaˆ gʼuiˬ po ehˉ hkʼe hpeh‸ ve yoˬ. Nawˬ ve naˍ hkʼawˇ lehˬ, Daˍmaˍsehˆ venˇ hta‸ ha‸ shaˉ piˇ chehˇ ve Leˍbaˍnonˍ ta‸ yehˬ hkʼe nyi sha jaˇ ve yoˬ.

5Nawˬ ve oˉ kʼoˍ lehˬ, Kaˍmeˍlaˆ hkʼaw hkʼe mvuh jaˇ ve yoˬ. Hkʼa deh‸ puiˍ shawˍ taˍ ve nawˬ ve uˉ hkeh mvuh lehˬ nyi naˆ meuˉ-ehˍ cawˬ leh, jawˇmawˇ hta‸ hpeh yuˬ gʼa ngaw ngaw cawˬ ve yoˬ.

6Ngaˬ ve yaˇ miˇ haˉ-oˬ, nawˬ lehˬ hkʼa ma awˬ hkiˇ awˬ naˬ da‸ jaˇ ve le. Nawˬ ngaˬ hta‸ piˇ laˇ ve ha lehˬ tuˬ htawˇ hkʼaˬ ma da‸ jaˇ ve le.

7Nawˬ lehˬ, tcuhˉ pui cehˬ hkʼa shuˍ mvuh leh, nawˬ ve cuˉ teˇ hpaˍ lehˬ, tcuhˉ pui shiˍ hkʼe hpeh‸ ve yoˬ.

8Ngaˬ lehˬ tcuhˉ pui cehˬ hkʼoˆ taˆ-e leh awˬ shiˍ ca shaˉ yuˬ tuˬ yoˬ. Nawˬ ve cuˉ lehˬ ngaˬ awˬ pon a pehˉ meuˇ kʼoˍ hkʼe hpeh‸ leh, nawˬ shaˉ gʼawˬ ve awˬ pe‸ lehˬ, a pfuhˉ caˉ shiˍ awˬ pe‸ hawnˉ jaˇ ve yoˬ. Nawˬ ve maw‸ kʼaw htawˇ da‸ jaˇ ve a pehˉ meuˇ gʼuiˬ awˬ pe‸ hawnˉ jaˇ ve yoˬ.

9Ngaˬ ve chaw haˉ paˍ ve meuˇ guiˬ leh ciˬ hkʼoˆ lo a pehˉ meuˇ gʼuiˬ ya‸ la piˇ-oˆ.

10Ngaˬ lehˬ, ngaˬ ve chaw haˉ paˍ hta‸ caˉ da‸ chehˇ leh, yawˇ ngaˬ hta‸ nyi ma cawˇ chehˇ ve yoˬ.

11Chaw haˉ paˍ-oˬ, laˬ-o‸. Ya‸ puiˉ ngaˬ huiˉ maˬ a pehˉ meuˇ hko hkʼaw ca haˉ-e veuˬ.

12Ngaˬ hui mvuhˇ shawˉ teˇ na‸ tuˬ leh, a pehˉ meuˇ awˬ veˆ veˆ la peuˬ leh naˍ, ca toˇ nyi-a veuˬ. Oˇ kaˬ lo ngaˬ nawˬ hta‸ ha‸ laˇ tuˬ yoˬ.

13Oˇ kaˬ lo suhˉ veˆ teˇ hpaˍ awˬ pe‸ hawnˉ jaˇ leh, nyi sha ve iˉ shiˍ teˇ hpaˍ yehˬmiˉhpe‸ lo cawˬ taˍ ve yoˬ. Ngaˬ ha‸ ve chaw haˉ paˍ awˬ pon, iˉ shiˍ awˬ piˍ leh awˬ suhˉ teˇ hpaˍ hta‸ ngaˬ ha‸ shaˉ taˍ ve yoˬ.

← Chapter 6 Jump to: Chapter 8 →