Song of Solomon 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Teˇ haˉ htaˇ, ngaˬ ha‸ ve chaw haˉ paˍ hta‸ zuh‸ hpui hkʼaw maˇ gʼa mawˬ. Ngaˬ yawˇ hta‸ gʼa‸ ca ve htawˇ ca maˇ mawˬ.

2Hkʼe te leh, venˇ hkʼaw lo ngaˬ yawˇ hta‸ gʼa‸ ca kʼai ve yoˬ. Ya‸ hkʼaˇ, ca maˇ mawˬ.

3Oˇ htaˇ, venˇ shaw shehˍ hpaˇ teˇ hpaˍ hta‸ ngaˬ hpuˇ da‸ ve yoˬ. Nawˬ hui ngaˬ ve chaw haˉ paˍ hta‸ maˇ mawˬ laˇ teh‸ yawˇ hui hta‸ na nyi ve yoˬ.

4Yawˇ hui hta‸ tawˇ yaw da‸ peuˬ hkʼaw‸ nawˉ, ngaˬ ve chaw haˉ paˍ hta‸ gʼa kʼaw‸ mawˬ ve yoˬ. Oˇ htaˇ, ngaˬ yawˇ hta‸ kʼuˉ taˍ leh ngaˬ e ve yehˬ lo shiˍ laˬ ve yoˬ.

5Yeˍruˆsaˍlehnˍ yaˇ miˇ teˇ hpaˍ-oˬ, ngaˬ huiˉ maˬ ha‸ da‸ chehˇ ve hta‸ te sho‸ sha‸ laˇ tuˬ ve maˇ heˆ teh‸ hkuiˉ zuhˬ teˇ hpaˍ hta‸ cuˇ leh ka ti‸ te laˇ-oˆ.

6Tanˇ kaˬ paˍ hui hawˇ chehˇ ve muˇraˍ leh sha hawnˉ hta‸ aˬ miˍ to‸ chehˇ ve hkʼa shuˍ, heh puiˉ hkʼaw lo tawˆ la chehˇ ve mvuhˇ hkʼawˇ oˇ ve aˬ hto‸ ma le.

7Nyi loˬ, oˇ ve lehˬ Sawˉla‸monˍ ve iˉ mvuhˇ lawˬ hpeh‸ ve yoˬ. Cheuˬ jaˇ ve Iˉsaˍreˍlaˆ ma‸ yaˇ hkaw‸ chi gʼaˇ iˉ mvuhˇ lawˬ oˇ ve hta‸ gʼa‸ shaw toˇ chehˇ ve yoˬ.

8Yawˇ hui lehˬ hkehnˬ puiˉ ve chaw hpeh‸ leh, ma‸ bawˆ cheuˬ jaˇ ve yoˬ. Canˇ paˍ teˇ hpaˍ mvuhˇ hpeu‸ htaˇ maˇ gʼa ca hkʼawˇ bawˆ la tuˬ, a shu yawˇ ve aˉhtaw pfuhˇ leh gʼa‸ shaw toˇ chehˇ ve yoˬ.

9Jawˇmawˇ Sawˉla‸monˍ lehˬ da‸ jaˇ ve suhˆ yuˬ te taˍ ve iˉ mvuhˇ lawˬ oˇ ve hta‸ ciˇ toˇ chehˇ ve yoˬ.

10Iˉ mvuhˇ lawˬ oˇ ve hta‸ hpu oˍ taˍ leh, oˇ ve awˬ hkʼoˆ lo shiˍ hkeh yuˬ te taˍ ve hpa beh taˍ ve yoˬ. Yawˇ ve mui hkʼawˇ hta‸ nyi naˆ meuˉ-ehˍ ve hpa yuˬ hkʼawˇ taˍ ve yoˬ. Awˬ ceuˬ chi teˇ hpaˍ hta‸ Yeˍruˆsaˍlehnˍ venˇ hkʼaw chehˇ ve yaˇ miˇ haˉ teˇ hpaˍ te taˍ ve yoˬ.

11Ziˉonˍ venˇ hkʼaw chehˇ ve yaˇ miˇ teˇ hpaˍ-oˬ, jawˇmawˇ Sawˉla‸monˍ hta‸ ca nyi la-o. Yawˇ ha lehˬ ha kʼa la‸ kʼawˍ toˆ ve teˇ nyi htaˇ, awˬ e piˇ taˍ ve shi uˉ tcuhˍ hkʼawˆ taˍ ve yoˬ.

← Chapter 2 Jump to: Chapter 4 →