Song of Solomon 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Ngaˬ lehˬ Shaˍronˍ lawˬ hkʼo‸ hkʼaw cawˬ ve suhˉ veˆ awˬ hteunˍ hpeh‸ leh, miˬ tawˬ kuiˬ lo cawˬ ve shiˍ ya‸ veˆ hpeh‸ ve yoˬ.

2Nawˬ lehˬ aˉ chuˇ buiˇ awˬ kaˍ lo cawˬ ve shiˍ ya‸ veˆ hpeh‸ leh, yaˇ miˇ teˇ hpaˍ awˬ hkʼaw lo ngaˬ ha‸ jaˇ ve yaˇ miˇ haˉ hpeh‸ ve yoˬ.

3Nawˬ lehˬ suhˆ cehˬ teˇ hpaˍ awˬ kaˍ lo cawˬ ve a pfuhˉ caˉ cehˬ hpeh‸ leh, chaw haˉ paˍ teˇ hpaˍ awˬ hkʼaw lo ngaˬ ha‸ jaˇ ve teˇ gʼaˇ hpeh‸ ve yoˬ. Ngaˬ lehˬ yawˇ ve aˉ gʼuiˬ ha hawˉ lo mui taˍ gaˇ ve yoˬ. Yawˇ ve awˬ shiˍ htawˇ mehˬ jaˇ ve yoˬ.

4Yawˇ ngaˬ hta‸ hti caˇ hti dawˬ kuiˬ bawehˇ hkʼaw shiˍ kʼai laˇ leh, yawˇ ngaˬ hta‸ hkʼaˬ ma ha‸ ve, chaw hkʼa peu-eˬ gʼa mawˬ ve yoˬ.

5Ngaˬ awˬ gʼaˇ kʼaw‸ cawˬ la tuˬ, a pehˉ meuˇ shiˍ caˍ laˇ leh ngaˬ ha lehˬ la tuˬ a pfuhˉ caˉ shiˍ caˍ laˇ-oˆ. Awˬ lawn kʼo, ngaˬ awˬ gʼaˇ nuˇ jaˇ chehˇ ve yoˬ.

6Yawˇ ve la‸ mehˍ paˉ la‸ sheh ngaˬ ve oˉ kʼoˍ hawˉ lo teh taˍ leh, yawˇ ve la‸ sha paˉ la‸ sheh ngaˬ hta‸ shoˆ laˇ chehˇ ve yoˬ.

7Yeˍruˆsaˍlehnˍ yaˇ miˇ teˇ hpaˍ-oˬ, ngaˬ huiˉ maˬ ha‸ da‸ chehˇ ve hta‸ te sho‸ sha‸ laˇ tuˬ ve maˇ heˆ teh‸ hkuiˉ zuhˬ hta‸ cuˇ leh ka ti‸ te laˇ-oˆ.

8Ngaˬ ve chaw haˉ paˍ ve awˬ hkawˇ hta‸ ngaˬ gʼa kaˇ ve yoˬ. Yawˇ lehˬ hkʼaw hkʼoˆ lo ngaˬ geh gʼuiˇ laˬ chehˇ ve yoˬ.

9Ngaˬ ve chaw haˉ paˍ lehˬ, hkuiˉ zuhˬ hkʼe hpeh‸ ve yoˬ. Yawˇ lehˬ yehˬ baˬ lo huˉ taˍ leh, yehˬ miˉ ehˉ hkʼaw jaˆ nyi chehˇ ve yoˬ. Yawˇ ngaˬ hta‸ tawˇ yaw laˇ ve yoˬ.

10Ngaˬ ve yaˇ miˇ haˉ-oˬ, laˬ-o‸. Ngaˬ geh kʼai-a veuˬ.

11Mvuhˇ kaˆ ve awˬ yanˇ peuˬ kʼai peuˬ. Mvuhˇ yeˬ htawˇ maˇ kʼaw‸ laˬ-o.

12Hkʼaˬ ti chi ti lo suhˉ veˆ veˆ chehˇ taˍ peuˬ. Chi beu‸ kʼa muiˬ hkawˇ kʼa ve awˬ yanˇ hpeh‸ ve yoˬ. Ti mi hkʼaw lo aˉ pui kʼaˍ teˇ hpaˍ htawˇ kuˬ chehˇ taˍ peuˬ.

13Maˉ nawˆ shiˍ htawˇ meh la chehˇ taˍ peuˬ. A pehˉ meuˇ awˬ veˆ htawˇ hawnˉ heuˍ lehˍ hpeh‸ la peuˬ. Ngaˬ ve yaˇ miˇ haˉ-oˬ, laˬ-o‸. Ngaˬ geh kʼai-a veuˬ.

14Nawˬ lehˬ haˉ hpawˇ hkʼaw lo va‸ chehˇ taˍ ve aˉ pui kʼaˍ hkʼa shuˍ hpeh‸ ve yoˬ. Nawˬ ve ha‸ lu diˬve mehˆ hpfuhˇ ngaˬ hta‸ maw laˇ leh, nawˬ ve tawˇ hkawˇ ngaˬ hta‸ kaˇ tcuh laˇ-oˆ.

15Awˬ veˆ veˆ chehˇ ve a pehˉ meuˇ te hta‸ heh hpuiˇ maˇ gʼa te luˬ sheˍ gʼuˇ suhˍ, yawˇ hui hta‸ haˆ haˆ hpeh yuˬ-o‸.

16Ngaˬ ve chaw haˉ paˍ lehˬ ngaˬ ve hpeh‸ leh, ngaˬ lehˬ yawˇ ve hpeh‸ ve yoˬ. Yawˇ lehˬ ceˇ caˬ teˇ hpaˍ hta‸ shiˍ ya‸ de hkʼaw lo hawˉ chehˇ ve yoˬ.

17Ngaˬ ve chaw haˉ paˍ-oˬ, mvuhˇ maˇ htiˇ sheˍ htaˇ, hkuiˉ zuhˬ hkʼa shuˍ ngaˬ geh lo gʼuiˇ kʼaw‸ la-o.

← Chapter 1 Jump to: Chapter 3 →