Song of Solomon 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Ngaˬ ha‸ ve yaˇ miˇ haˉ-oˬ, nawˬ lehˬ awˬ hkiˇ awˬ naˬ hkʼaˬ ma da‸ jaˇ ve le. Nawˬ ve uˉ nyiˉ yuˬ beh taˍ ve mehˆ shiˍ htawˇ hkʼaˬ ma kehˬ da‸ jaˇ ve le. Nawˬ ve uˉ hkeh mvuh lehˬ, Giˇlaˆ hkʼaw hkʼoˆ lo pawˆ ya‸ la chehˇ ve aˉ che‸ moˍ lonˉ hkʼe hpeh‸ ve yoˬ.

2Nawˬ ve ciˬ teˇ hpaˍ lehˬ, awˬ mvuh nuˆ peuˬ leh iˉ kaˆ hehˉ piˇ peuˬ ve yawˬ hkʼa shuˍ hpu da‸ jaˇ ve yoˬ. Ciˬ oˇ ve teˇ hpaˍ teˇ maˬ ka‸ maˇ hkʼeh‸ sheˍ. Nyi sha jaˇ ve yoˬ.

3Nawˬ ve meuˇ guiˬ lehˬ nyiˉ-ehˍ ve hpa caˆ hkʼe hpeh‸ leh, nawˬ tawˇ yaw ve teˇ yanˇ nyi sha jaˇ ve yoˬ. Nawˬ ve mehˆ hpfuhˇ htawˇ uˉ nyiˉ hawˉ lo awˬ gʼeuˆ ba chehˇ ve yoˬ.

4Nawˬ ve kʼawˍ peˍ lehˬ Daˍviˆ ve ta‸ yehˬ hkʼe gʼawˉ-ehˍ cawˬ leh htanˬ tuˬ teˇ hinˉ maˬ cawˬ ve kʼawˍ peˍ pfuhˇ caˆ hkʼe hpeh‸ ve yoˬ.

5Nawˬ ve cuˉ teˇ hpaˍ lehˬ shiˍ ya‸ de lo kʼaˆ caˇ chehˇ ve hkuiˉ zuhˬ yaˇ cehˬ kʼa hkʼe hpeh‸ ve yoˬ.

6Mvuhˇ maˇ htiˇ la sheˍ ve ceh ceh, ngaˬ lehˬ muˇraˍ hkʼaw leh sha hawnˉ hkʼaw pui hkʼoˆ chehˇ taˍ tuˬ yoˬ.

7Ngaˬ ha‸ ve yaˇ miˇ haˉ-oˬ, nawˬ lehˬ awˬ hkiˇ awˬ naˬ hkʼaˬ ma da‸ jaˇ ve le. Nawˬ awˬ to teˇ to hkʼa peu-eˬ, hkʼaˬ ma nyi sha jaˇ ve le.

8Ngaˬ heuˆ tuˬ ve yaˇ miˇ haˉ-oˬ, Leˍbaˍnonˍ hkʼaw hkʼoˆ lo ya‸ la leh ngaˬ geh laˬ-o‸. Laˇ caˬ shiˉ leh laˇ teˇ hpaˍ chehˇ kuiˬ, Aˍmaˍnaˍ hkʼaw, Seˍniˍraˆ hkʼaw leh, Heˍraˍmonˍ hkʼaw hkʼoˆ lo ya‸ la-o.

9Ngaˬ heuˆ tuˬ ve ngaˬ ve yaˇ miˇ haˉ-oˬ, nawˬ ve mehˆ shiˍ leh, nawˬ pfuhˇ taˍ ve shi caˆ lehˬ ngaˬ ve nyi ma shiˍ hta‸ hkʼawˇ yuˬ kʼai peuˬ.

10Ngaˬ heuˆ tuˬ ve yaˇ miˇ haˉ-oˬ, nawˬ hta‸ gʼa ha‸ ve teˇ ceuˬ lehˬ ha lehˬ tuˬ uiˍ jaˇ ve yoˬ. Nawˬ ha‸ laˇ ve teˇ ceuˬ lehˬ, a pehˉ meuˇ gʼuiˬ a‸ kehˉ mehˬ jaˇ ve yoˬ. Nawˬ ve naˍ manˇ hawnˉ htawˇ, awˬ nu ve naˍmanˇ hawnˉ a‸ kehˉ awˬ shaˉ hawnˉ jaˇ ve yoˬ.

11Ngaˬ ve yaˇ miˇ haˉ-oˬ, nawˬ ve meuˇ guiˬ lehˬ pehˇ gʼuiˬ hkʼa shuˍ hpeh‸ ve yoˬ. Nawˬ ve ha tehˍ htawˇ, ngaˬ awˬ pon pehˇ gʼuiˬ leh nuˇ cuˉ gʼuiˬ hkʼa shuˍ hpeh‸ ve yoˬ. Nawˬ ve veu‸ kʼaˇ lehˬ, Leˍbaˍnonˍ hkʼaw ve awˬ pe‸ hawnˉ jaˇ ve yoˬ.

12Ngaˬ heuˆ tuˬ ve yaˇ miˇ haˉ lehˬ faˉ taˍ ve hko, hkʼa deh‸ caw ko taˍ ve hko leh, awˬ nu ve chaw teˇ gʼaˇ ka‸ dawˬ maˇ hpeh‸ ve gʼuiˬ tuˇ hkʼe hpeh‸ ve yoˬ.

13Oˇ kaˬ lo suhˆ cehˬ ehˉ teˇ hpaˍ yeˬ chehˇ taˍ ve yoˬ. Suhˆ cehˬ oˇ ve teˇ hpaˍ lehˬ, iˉ shiˍ hko lonˉ hkʼe hpeh‸ leh, mehˬ jaˇ ve iˉ shiˍ teˇ hpaˍ naw‸ chehˇ taˍ ve yoˬ.

14Oˇ kaˬ lo muˉraˍ, lawˇbanˍ leh awˬ pe‸ hawnˉ ve awˬ nu ve suhˆ cehˬ hkʼa biˇ cawˬ ve yoˬ.

15Oˇ kaˬ lo tawˆ ve iˉ kaˆ lehˬ, Leˍbaˍnonˍ hkʼaw‸ hkʼoˆ lo tawˆ ve iˉ kaˆ hkʼa shuˍ, hko oˇ ve hta‸ iˉ kaˆ piˇ chehˇ ve yoˬ.

16Awˬ na hpawˇ ve mvuhˇ haw-oˬ, nawˇ la-o. Awˬ hawˉ hpawˇ ve mvuhˇ haw-oˬ, ngaˬ ve hko hpawˇ lo meuˆ laˬ leh, awˬ pe‸ hawnˉ heuˍ lehˍ cawˬ la piˇ-oˆ. Ngaˬ ha‸ ve chaw haˉ paˍ yawˇ ve hko hkʼaw laˬ leh, mehˬ jaˇ ve iˉ shiˍ hta‸ caˇ piˇ lawˬ-o‸.

← Chapter 3 Jump to: Chapter 5 →