Song of Solomon 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Shu a‸ kehˉ awˬ hkiˇ awˬ naˬ da‸ ve yaˇ miˇ haˉ-oˬ, nawˬ ve chaw haˉ paˍ hkʼaˬ lo kʼai ve le. Yawˇ hkʼaˬ hpawˇ lo kʼai ve le. Ngaˬ hui ga hpoˆ ca laˇ tuˬ yoˬ.

2Ngaˬ ve chaw haˉ paˍ lehˬ awˬ pe‸ hawnˉ ve hko lo kʼai peuˬ ve yoˬ. Yawˇ lehˬ hko oˇ ve hkʼaw yawˬ ca hawˉ kʼai leh shiˍ ya‸ veˆ ca chehˆ kʼai taˍ ve yoˬ.

3Ngaˬ ve chaw haˉ paˍ lehˬ ngaˬ ve hpeh‸ leh, ngaˬ lehˬ yawˇ ve yoˬ. Yawˇ lehˬ shiˍ ya‸ de lo yawˬ hawˉ kʼai taˍ peuˬ ve yoˬ.

4Ngaˬ ve yaˇ miˇ haˉ-oˬ, nawˬ lehˬ Yeˍruˆsaˍlehnˍ venˇ hkʼe nyi sha leh, Tiˇraˍzaˍ venˇ hkʼe awˬ hkiˇ awˬ naˬ da‸ jaˇ ve yoˬ. Nawˬ lehˬ ngaˬ ve nyi ma shiˍ hta‸ hpeh yuˬ laˇ chehˇ ve yoˬ.

5Nawˬ ngaˬ hta‸ taˇ nyi tiˍ taˍ laˇ-oˆ. Awˬ lawn kʼo, nawˬ ve mehˆ shiˍ ngaˬ hta‸ hpeh yuˬ laˇ chehˇ ve hkʼe hpeh‸ ve yoˬ. Nawˬ ve uˉ hkeh mvuh lehˬ Giˇlaˆ hkʼaw hkʼoˆ lo pawˆ ya‸ la chehˇ ve aˉ che‸ moˍ lonˉ hkʼe hpeh‸ ve yoˬ.

6Nawˬ ve ciˬ teˇ hpaˍ lehˬ, iˉ kaˆ hehˉ piˇ taˍ peuˬ ve yaw moˍ lonˉ hkʼe hpeh‸ leh, teˇ maˬ ka‸ maˇ hkʼeh‸ sheˍ. Nyi sha jaˇ ve yoˬ.

7Nawˬ ve mehˆ hpfuhˇ htawˇ uˉ nyiˉ hawˉ lo awˬ gʼeuˆ ba chehˇ ve yoˬ.

8Ngaˬ geh lo nanˇhawˉhkanˇ ma hkaw‸ chi gʼaˇ, awˬ miˇ ma i hiˉ chi gʼaˇ leh, awˬ nu ve yaˇ miˇ haˉ hkʼa biˇ chehˇ taˍ ve yoˬ.

9Ya‸ hkʼaˇ, ngaˬ ha‸ jaˇ ve yaˇ miˇ teˇ gʼaˇ tiˉ cawˬ leh, yawˇ lehˬ aˉ pui kʼaˍ hkʼa shuˍ nyi sha jaˇ ve yoˬ. Yawˇ lehˬ awˬ e ve teˇ gʼaˇ tiˉ ve yaˇ miˇ hpeh‸ leh, awˬ e ha‸ jaˇ ve yaˇ miˇ hpeh‸ ve yoˬ. Yaˇ miˇ hkʼa peu-eˬ yawˇ hta‸ nyi taˍ leh chiˇ mvuh chehˇ ve yoˬ. Nanˇhawˉhkanˇ ma leh awˬ miˇ ma i teˇ hpaˍ htawˇ, yawˇ hta‸ chiˇ mvuh chehˇ ve yoˬ.

10Mvuhˇ shawˉ awˬ gʼeuˆ ba la chehˇ ve hkʼe hpeh‸ ve chaw chi a shu le. Yaˇ miˇ chi lehˬ mvuhˇ nyi, ha pa hkʼa shuˍ nyi sha leh, awˬ gʼeuˆ ba da‸ jaˇ ve yoˬ.

11Suhˆ cehˬ ehˉ teˇ hpaˍ hta‸ maˇ kʼoˆ, a pehˉ meuˇ te awˬ caˍ caˍ la chehˇ ve hta‸ maˇ kʼoˆ, aˉ ci ku cehˬ awˬ veˆ veˆ la chehˇ ve hta‸ maˇ kʼoˆ, ca nyi tuˬ ngaˬ hko hkʼaw lo‸-e ve yoˬ.

12Ngaˬ lehˬ cheˇ cheˇ veˆ veˆ hpeh‸ chehˇ ve yoˬ. Iˉ mvuhˇ lawˬ gʼa‸ paˍ lehˬ ma‸ bawˆ kuiˬ lo kʼai tuˬ awˬ gʼaˇ uiˍ ve hkʼe, nawˬ lehˬ ngaˬ hta‸ ha‸ ve awˬ gʼaˇ uiˍ tcuh laˇ ve yoˬ.

13Shuˆlanˍ venˇ hkʼaw chehˇ ve yaˇ miˇ-oˬ, kʼaˍ hkʼeˆ loˬ. Ngaˬ hui nawˬ kʼaˍ hkʼeˆ chehˇ ve hta‸ mawˬ gaˇ ve yoˬ. Aˬ hto‸ ma pa taw nawˬ hui ngaˬ hta‸ mawˬ gaˇ ve le. Chaw chi ma ve mehˆ gʼuˇ suhˍ ngaˬ kʼaˍ hkʼeˆ maˍ laˇ ve hta‸ nyi gaˇ ve laˇ.

← Chapter 5 Jump to: Chapter 7 →