Song of Solomon 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to:

1Nawˬ lehˬ ngaˬ e ve cuˉ hta‸ dawˬ uiˍ la ve ngaˬ nyi paˍ hpeh‸ ve hkʼe kʼo, hkʼaˬ ma da‸ jaˇ tuˬ ve le. Oˇ hkʼe hpeh‸ ve kʼo, ngaˬ nawˬ hta‸ boˆ nu laˇ tuˬ yoˬ. Chaw teˇ gʼaˇ hta‸ ka‸ ngaˬ a muˆ taˍ tuˬ ve maˇ heˆ.

2Ngaˬ nawˬ hta‸ ngaˬ e ve yehˬ lo shiˍ kʼai laˇ leh, awˬ pe‸ hawnˉ ve a pehˉ meuˇ gʼuiˬ leh aˉ ci ku shiˍ yuˬ te taˍ ve tzuhˬ taw laˇ tuˬ yoˬ.

3Nawˬ ve la‸ mehˍ paˉ la‸ sheh ngaˬ ve oˉ kʼoˍ hawˉ lo teh taˍ leh, nawˬ ve la‸ sha paˉ la‸ sheh ngaˬ hta‸ shoˆ laˇ chehˇ ve yoˬ.

4Yeˍruˆsaˍlehnˍ yaˇ miˇ teˇ hpaˍ-oˬ, Ngaˬ huiˉ maˬ ha‸ da‸ chehˇ ve hta‸ te sho‸ sha‸ laˇ tuˬ ve maˇ heˆ, teh‸ a ciˉ ka ti‸ te laˇ-oˆ.

5Yawˇ ve chaw haˉ paˍ hta‸ kʼuˉ taˍ leh, heh puiˉ hkʼaw lo tu kʼaw‸ la chehˇ ve chaw oˇ ve a shu le. Nawˬ paw la kuiˬ, a pfuhˉ caˉ cehˬ hawˉ lo ngaˬ nawˬ hta‸ nawˍ tu piˇ taˍ ve yoˬ.

6Ngaˬ hta‸ ceh tiˉ nawˬ gʼa ha‸ leh gʼa kʼuˉ taˍ ve yoˬ. Awˬ nu ve chaw teˇ gʼaˇ hta‸ ka‸ nawˬ maˇ gʼa ha‸. Maˇ gʼa ca kʼuˉ taˍ. Ha‸ ve teˇ ceuˬ lehˬ, suh ve hkʼe taw kanˇ paˆ uiˍ leh, aˬ miˍ hkʼa shuˍ to‸ tawˆ la piˇ puiˉ ve yoˬ.

7Iˉ kaˆ hkʼaˬ ma nyiˉ pfuhˍ ve ka‸ suh-e tuˬ ve maˇ heˆ. Chaw teˇ gʼaˇ lehˬ, ha‸ ve teˇ ceuˬ hta‸ awˬ hpfuhˇ hkʼaˬ ma piˇ ve htawˇ, vuiˬ yuˬ gʼa tuˬ ve maˇ heˆ.

8Ngaˬ hui awˬ nyi ma ehˉ teˇ gʼaˇ cawˬ ve yoˬ. Yawˇ ve cuˉ lehˬ i jaˇ sheˍ ve yoˬ. Chaw haˉ paˍ teˇ gʼaˇ yawˇ hta‸ ca maˆ la ve kʼo, ngaˬ hui hkʼaˬ hkʼe gʼa te piˇ tuˬ ve le.

9Yawˇ lehˬ gʼo‸ pa hpeh‸ ve hkʼe kʼo, ngaˬ hui hpu ta‸ yehˬ teˇ maˬ te leh yawˇ hta‸ ha‸ shaˉ piˇ tuˬ yoˬ. Yawˇ lehˬ venˇ taˍ meu‸ hpe‸ hpeh‸ ve hkʼe kʼo, ngaˬ hui htawˇ baˉ yuˬ ko taˍ piˇ tuˬ yoˬ.

10Ngaˬ lehˬ gʼo‸ pa hpeh‸ ve yoˬ. Ngaˬ ve cuˉ teˇ hpaˍ lehˬ ta‸ yehˬ hpeh‸ ve yoˬ. Ngaˬ gawˬ lehˍ gʼa chehˇ taˍ ve hta‸, ngaˬ ve chaw haˉ paˍ shiˍ taˍ ve yoˬ.

11Baˍlaˍhaˍnonˍ teh‸ kʼoˆ ve chehˇ kuiˬ lo Sawˉla‸monˍ a pehˉ meuˇ hko teˇ maˬ cawˬ ve yoˬ. Yawˇ lehˬ hko oˇ ve muiˬ caˇ paˍ teˇ hpaˍ hta‸ ngaˍ piˇ taˍ ve yoˬ. Yawˇ hui lehˬ, hko oˇ ve ngaˍ hpfuhˇ yawˇ hta‸ teˇ gʼaˇ teˇ hinˉ piˇ chehˇ ve yoˬ.

12Ngaˬ ve hko teˇ maˬ cawˬ ve yoˬ. Sawˉla‸monˍ-oˬ, nawˬ lehˬ hpu teˇ hinˉ gʼa chehˇ leh, muiˬ caˇ paˍ teˇ hpaˍ lehˬ nyiˇ ha gʼa chehˇ ve yoˬ.

13Ngaˬ ha‸ ve yaˇ miˇ haˉ-oˬ, nawˬ hko hkʼaw lo chehˇ taˍ leh tawˇ yaw chehˇ ve awˬ hkawˇ ngaˬ hta‸ kaˇ tcuh laˇ-oˆ. Ngaˬ ve awˬ chawˇ teˇ hpaˍ htawˇ law na chehˇ taˍ ve yoˬ.

14Ngaˬ ha‸ ve chaw haˉ paˍ-oˬ, awˬ pe‸ hawnˉ ve suhˆ cehˬ teˇ hpaˍ geh hkʼaw hkʼoˆ lo chehˇ ve hkuiˉ zuhˬ hkʼa shuˍ ngaˬ geh gʼuiˇ ya‸ la-o.

← Chapter 7 Jump to: