Exodus 20

Lao Bible (ฉบับอักษรลาว)

← Chapter 19 Jump to: Chapter 21 →

1ທິນ-ຮູ່ງ ກ໊ອງ ນ້າຍ ເຕີ໋ຍ ຢຽດ ຕສູ໊ງ ຫວ່າ.

2“ເຢຍ ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕົ້ງ ຕໍ້ ເມີ່ຍ ບົວ ທສວດ ອີຢິ໊ບ ເຕີ່ຍ-ປູງ, ຕສຸ ໂຕສ໋ວ ໂນ່ວ ເຍີຍ ເຕີ່ຍ-ປູງ ວົ້ວ ເຕົ້າ.

3“ທສວດ ລິ໌ວ ເຢຍ, ໄມ້ ຕູ໋ງ ຕສັ່ງ ກັ້ນ ເຕົ້າ ຕສ້ຽນ.

4“ໄມ້ ຕູ໋ງ ເຫວີ່ຍ ກັ້ນ ໂຕສ໋ວ ຫາຍ ຫຍູ່ງ ໝິ່ວ-ຝັງ. ໄມ້ ກຸ໊ນ ຢຽມ ກູ້ ຫງວ່າຍ ລູ່ງ, ຢຽມ ກະເດ໊ຍ ເດົາ, ໄຟ ຢຽມ ເດົາ-ເດ໊ຍ ເຍີຍ ວວມ ກະຍົ໌ວ ຫາຍ ຫຍູ່ງ ເຍີຍ ຝັງ.

5ໄມ້ ຕູ໋ງ ເກວີ່ຍ ເອຈ່ຍ ປ໋າຍ ນ້າຍ ເຕີ໋ຍ ໝິ່ວ-ຝັງ ຢ່າ ໄມ້ ຕູ໋ງ ຕສັ່ງ, ເຫວີ່ຍ ຕສຸ ເຢຍ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ແດສງ ຈ໊ຽນ ເມີ່ຍ ບົວ. ເຢຍ ອ໋ອຍ ຕີ່ງ ດສອງ ເຢຍ ວົ້ວ ເຕີ໋ຍ ມ່ຽນ ເຍີຍ ຕສຸ໌ຍ, ຕີ່ງ ເຖົາ ນິ່ນ ບົວ ເຍີຍ ປົວ ເປຢີຍ ຕ່ອຍ ເຕສີ໊ຍ-ຟຸນ.

6ມປ່າ ຫາຍ ເຕົ້າ ຮນ້ຳ ເຢຍ, ເອີຍ ຈ໊ຽນ ເຢຍ ເຍີຍ ເລີ໌ຍ-ຫລັດ ໂຕສ໋ວ, ເຢຍ ຕສ່ຽວ ຮນ້ຳ ນິ່ນ ເຈ໋ຍ ມີ່ງ ເຖົາ ຢຽດ ທສິນ ຕ່ອຍ.

7“ໄມ້ ຕູ໋ງ ຫລະໄກວ້ ຫລົ່ງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ບົ໋ວ. ຫາຍ ເຕົ້າ ຫລະໄກວ້ ຫລົ່ງ ຕສ໊ຽວ ເຍີຍ ບົ໋ວ, ຕສ໊ຽວ ອ໋ອຍ ຕີ່ງ ວົ້ວ ເຕົ້າ ເຍີຍ ຕສຸ໌ຍ.

8“ອ໋ອຍ ຕສຸ ຈັ໋ງ ຈ໊ຽນ ຫລົ່ງ ຕີ້ງ ກົງ ຮນອຍ ເປ໋ນ ນອມ ທສີງ-ເດສ່ງ ຮນອຍ.

9ມ່າຍ ຈຸ໊ ຮນອຍ ໂຕສ໋ວ ເມີ່ຍ ບົວ ເຍີຍ ຢຽດ ຕສູ໊ງ ກົງ.

10ມປ່າ ຕະທສຽດ ຮນອຍ ວົ້ວ ຮນອຍ ເຊ ຕີ້ງ ກົງ ຮນອຍ ເຫວີ່ຍ ຝູງ ປຸນ ຕສ໊ຽວ. ວົ້ວ ຮນອຍ ໄມ້ ຕູ໋ງ ໂຕສ໋ວ ຫາຍ ຫຍູ່ງ ກົງ. ເມີ່ຍ ບົວ ກັ້ນ ເຖສົາ ເມີ່ຍ ບົວ ເຍີຍ ນ່າມ ໂຍ໌ວ, ເມີ່ຍ ບົວ ເຍີຍ ໂນ່ວ ເກົ໊າ ໂນ່ວ ເປີ໌ຍ, ເມີ່ຍ ບົວ ເຍີຍ ແຊງ-ຄູ້, ໄຟ ຢຽມ ເມີ່ຍ ບົວ ເຍີຍ ຕສີ້ງ ເຍີຍ ກັ້ນ ຝີງ ມ່ຽນ ຢ່າ ໄມ້ ຕູ໋ງ ໂຕສ໋ວ ຫາຍ ຫຍູ່ງ ກົງ.

11ເຫວີ່ຍ ຕສຸ ຕສ໊ຽວ ຫລົ່ງ ຈຸ໊ ຮນອຍ ເຕສີ໋ຍ ລູ່ງ ເຕສີ໋ຍ ເດົາ ເຕສີ໋ຍ ຄ້ອຍ ເຖສົາ ຢຽມ ນ້າຍ ເຕີ໋ຍ ກະຍົ໌ວ ເຍີຍ ຢຽດ ຕສູ໊ງ ກະນ້າຍ. ມປ່າ ເສ່ຍ ຮນອຍ ວົ້ວ ຮນອຍ ທິນ-ຮູ່ງ ຕີ້ງ ກົງ ອ໊ະ. ເຫວີ່ຍ ນ້າຍ ຕສ໊ຽວ ເຖສີຍ ຟຸ ວົ້ວ ນອມ ຮນອຍ ເປ໋ນ ນິ່ນ ເຍີຍ ທສີງ-ເດສ່ງ ຮນອຍ.

12“ອ໋ອຍ ຕສຸ ຖົງ ໜິ່ມ ເມີ່ຍ ບົວ ເຍີຍ ເຕ໋ຍ ໝ່າ, ເມີ່ຍ ບົວ ຖສີງ ຕ້າຍ ຕສຢັ້ງ ຕຸ໊ ສ່ຽວ ຍ່ວນ ດ໊າວ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ເຍີຍ ເຕີ່ຍ-ປູງ.

13“ໄມ້ ຕູ໋ງ ໄຕ໋ ມ່ຽນ.

14“ໄມ້ ຕູ໋ງ ຫຮຢຽນ ເອົ໊າ ຫຮຢຽນ ໂອກ໋.

15“ໄມ້ ຕູ໋ງ ໂຕສ໋ວ ຕສະ.

16“ໄມ້ ຕູ໋ງ ໂຕສ໋ວ ຈ໊າ ຕສອງ-ເຕສ໋ງ ຫ່ອຍ ມ່ຽນ.

17“ໄມ້ ຕູ໋ງ ເມົ້າ ມ່ຽນ ເຍີຍ ເປຢົ໊າ. ໄມ້ ຕູ໋ງ ເໝວີ່ຍ ເຈັ໊ຍ ມ່ຽນ ເຍີຍ ເອົ໊າ, ມ່ຽນ ເຍີຍ ໂນ່ວ ເກົ໊າ ໂນ່ວ ເປີ໌ຍ, ມ່ຽນ ເຍີຍ ງົ່ງ ໄຟ ລໍ່ ໄຟ ນິ່ນ ມ່າຍ ເຍີຍ ຫາຍ ຫຍູ່ງ ກະນ້າຍ.”

18ຕສວັ໋ງ ແປະ ຝີງ ໄຮ໌ ບະອົງ ບຸຍ, ປວັດ ປ໌ອງ ບະຫລີ່ງ, ໄຮ໌ ດສັດ ເຍີຍ ເຖຈຍ, ຢ່າ ປວັດ ໂຕ໌ວ-ສຽວ ຢຽມ ບົງ ທສຸດໆ ເຍີຍ ທສວດ, ນິ່ນ ບົວ ເກ້ງ! ກ້ຳ ເດສ໋ຍ ໄຫ່, ຊິນ ຕສິ໋ນ ເດສ່ງ. ແປະ ຝີງ ໂຊ້ວ ໂກໆ ເຍີຍ,

19ແອ໋ງ ກ໊ອງ ບົ໋ວ ໂມເຊ, “ໂທ້ ເມີ່ຍ ກັ້ນ ໂຕ່ວ ຫວ່າ ປຸນ ເຢຍ ບົວ ມ່າະ! ເຢຍ ບົວ ຕສ່ຽວ ໝວັງ. ໄມ້ ຕູ໋ງ ປຸນ ທິນ-ຮູ່ງ ເຖສົາ ເຢຍ ບົວ ກ໊ອງ ຫວ່າ. ເດສ໋ຍ ເຢຍ ບົວ ຕສຸ ໄຕ່.”

20ໂມເຊ ກ໊ອງ ບົ໋ວ ຕສວັ໋ງ ມ່ຽນ, “ໄມ້ ຕູ໋ງ ກ້ຳ ເດສ໋ຍ ມ່າະ! ທິນ-ຮູ່ງ ຕ້າຍ ເສີຍ ເມີ່ຍ ບົວ, ປຸນ ເມີ່ຍ ບົວ ຕສັ່ນໆ ກ້ຳ ເດສ໋ຍ ນິ່ນ, ທ່າຍ ນິ່ນ, ຕສ່ຽວ ໄມ້ ປ໌າມ ຕສຸ໌ຍ.”

21ແປະ ຝີງ ໂຊ້ວ ຈ໊ຽນ ວົ້ວ ໂກ ເຍີຍ. ຂູງ ໂມເຊ ມີ່ງ ຟັດ ທິນ-ຮູ່ງ ຢຽມ ວົ້ວ ນອມ ມັບ ແມ່ງ ມັບ ຫຮມວັງ ເຍີຍ ຕ໋ອງ ຮນັ້ງ.

22ຕສ໊ຽວ ກ໊ອງ ບົ໋ວ ໂມເຊ, “ອ໋ອຍ ຕສຸ ຮນັ້ງ ນ້າຍ ນໍ ບົ໋ວ ອິສະລາເອນ ມ່ຽນ, ‘ເມີ່ຍ ບົວ ກັ້ນ ປວັດ ເຢຍ ຢຽມ ກູ້ ຫງວ່າຍ ລູ່ງ ເຖສົາ ເມີ່ຍ ບົວ ກ໊ອງ ຫວ່າ.

23ເມີ່ຍ ບົວ ໄມ້ ຕູ໋ງ ຫລົ່ງ ຈຽມ ໄຟ ຍ່ານ ໂຕສ໋ວ ຫາຍ ຫຍູ່ງ ຕສ້ຽນ ເຍີຍ ຝັງ ຕ້າຍ ເຖສົາ ຈ໊ຽນ ເຢຍ ຕສັ່ງ.

24“‘ອ໋ອຍ ຕສຸ ຫລົ່ງ ເນຍ ເຫວີ່ຍ ເຢຍ ເຖສີຍ ເຕສ່ຍ-ຕ້ອງ, ຢ່າ ຫລົ່ງ ເມີ່ຍ ບົວ ເຍີຍ ງົ່ງ ໄຟ ປະກີ ຢູ້ງ ໄຟ ຢູ້ງ ໂຕສ໋ວ ປົ໊ວ ເຕສ່ຍ ເຍີຍ ກະນ້າຍ ເຖສົາ ເຕສ່ຍ ເຫວີ່ຍ ຈິວ ທົງ ເຍີຍ ກະນ້າຍ. ຕະຟ່ານ ຢຽມ ຫາຍ ນອມ ຕ໋ອງ ເຢຍ ປຸນ ມ່ຽນ ຈັ໋ງ ເຢຍ ເຍີຍ ບົ໋ວ, ເຢຍ ຕສ່ຽວ ມີ່ງ ວົ້ວ ນອມ ຕ໋ອງ ເຖສີຍ ຟຸ ປຸນ ເມີ່ຍ ບົວ.

25ເຊ ກ໊ອງ ຫລົ່ງ ຫລະເປຢີ໊ຍ ເຫວີ່ຍ ເຢຍ ເຖສີຍ ເຕສ່ຍ-ຕ້ອງ, ໄມ້ ຕູ໋ງ ຫລົ່ງ ຕສຸ ຕ້າຍ ເຍີຍ ໄຟ ດີ້ງ ຕ້າຍ ເຍີຍ ຫລະເປຢີ໊ຍ. ເຊ ກ໊ອງ ຫລົ່ງ ຕສຸ ຕ້າຍ ໄຟ ດີ້ງ ຕ້າຍ ເຍີຍ ຫລະເປຢີ໊ຍ ນໍ, ນ້າຍ ເຕີ໋ຍ ຫລະເປຢີ໊ຍ ມ່າຍ ຫວຸຍ ອ໊ະ.

26ຢ່າ ໄມ້ ຕູ໋ງ ຈ໋າ ເທີຍ ຝາວ ເຢຍ ເຍີຍ ເຕສ່ຍ-ຕ້ອງ. ເດສ໋ຍ ປີ໋ງ-ທສ້ຽວ ໄຮ່ ທສວດ.’

← Chapter 19 Jump to: Chapter 21 →