Exodus 30

Lao Bible (ฉบับอักษรลาว)

← Chapter 29 Jump to: Chapter 31 →

1“ອ໋ອຍ ຕສຸ ຫລົ່ງ ຕະຊຸ ດຢັ໋ງ ໂຕສ໋ວ ນອມ ປົ໊ວ ຮູງ ເຕ້ຍ.

2ນ້າຍ ນອມ ເຕ້ຍ ອ໋ອຍ ຕສຸ ຢຽດ ເດາະ ເຝີຍ-ປູງ, ຢຽດ ເດາະ ດ໊າວ, ຢຽດ ເດາະ ຈັ໊ງ, ອີ ເດາະ ຮລັງ. ເປຢີຍ ປູງ ເກ໊າະ ເຍີຍ ຈອງ ເຖສົາ ເຕ້ຍ ຕສຢັ້ງ ຈ໊ຽນ ຢຽດ ດົ້ງ ດຢັ໋ງ.

3ອ໋ອຍ ຕສຸ ຫລົ່ງ ຈຽມ ປວັງ ຈ໊ຽນ ເຕ້ຍ ກູ້ ຫງວ່າຍ ແໝງ, ເປຢີຍ ປູງ ເຕ້ຍ ເຮລນ ເຖສົາ ຈອງ. ແອ໋ງ ຫລົ່ງ ຈຽມ ໂຕສ໋ວ ປິນ ຮ່ອມ ກ໋ອມ ເຕ້ຍ ເຮລນ.

4ແອ໋ງ ໂຕສ໋ວ ອີ ນອມ ຈຽມ-ຄວີງ ຕີ໋ງ ຈ໊ຽນ ອີ ປູງ ເຕ້ຍ ກະເຮລນ, ປິນ ກະເດ໊ຍ ແໝງ, ເຫວີ່ຍ ຖສຸນ ດຢັ໋ງ ແກງ ເຕ້ຍ.

5ແກງ ເຕ້ຍ ດຢັ໋ງ ຢ່າ ອ໋ອຍ ຕສຸ ຫລົ່ງ ຕະຊຸ ດຢັ໋ງ ປວັງ ຈ໊ຽນ ຈຽມ.

6ນ້າຍ ນອມ ປົ໊ວ ຮູງ ເຕ້ຍ ອ໋ອຍ ຕສຸ ອັນ ຈ໊ຽນ ແລ໌ງ ແຫງ່ງ ຫວ່າ ຟາງ ດສະຮມຽນ, ແບະ ແກ້ງ ເດຍ ກະເຫຍ່ຍ, ເຊ ຢຽມ ແລ໌ງ ແຫງ່ງ ຫວ່າ ຟາງ ເຍີຍ ຟາງ-ອກ໋າຍ ວົ້ວ ນອມ ເຖສີຍ ເອນ ເຍີຍ ເຫວີ່ຍ ດສະຮມຽນ ແໝງ. ເຊ ເຢຍ ອ໋ອຍ ປວັ້ງ ເມີ່ຍ ເຍີຍ ຕ໋ອງ.

7“ອາລົນ ດອມໆ ຕ້າຍ ຫລິ່ວ ເລີ໌ຍ ຕັງ ເຍີຍ ຕສຢັ້ງ ໂຫ່, ນິ່ນ ອ໋ອຍ ຕສຸ ຢຽມ ວົ້ວ ປົ໊ວ ຮູງ ເຕ້ຍ ປົ໊ວ ຮູງ.

8ດສ໋ຽມ-ຢ້າງ ປົ໊ວ ຕັງ ເຍີຍ ຕສຢັ້ງ ໂຫ່, ນິ່ນ ອ໋ອຍ ຕສຸ ແອ໋ງ ປົ໊ວ ຮູງ. ອ໋ອຍ ຕສຸ ຕ່ອຍ ເຈ໋ຍ ຕ່ອຍ ຢຽມ ຕສ໊ຽວ ເຍີຍ ດສະຮມຽນ ຕສັ່ນໆ ປົ໊ວ ຮູງ.

9ໄມ້ ຕູ໋ງ ຕໍ້ ໄມ້ ມ່າຍ ເລີ໌ຍ ຫລົ່ງ ເຍີຍ ຮູງ ອັນ ນ້າຍ ນອມ ເຕ້ຍ ປົ໊ວ. ຢ່າ ໄມ້ ຕູ໋ງ ຕໍ້ ປົ໊ວ ເຕສ່ຍ ເຍີຍ ກະນ້າຍ ໄຟ ເຕສ່ຍ ເຍີຍ ລ່າງ ຕສິ ໄຟ ເທສ້ຍ ເຕສ່ຍ ເຍີຍ ກະນ້າຍ ອັນ ນ້າຍ ນອມ ເຕ້ຍ ຝົ່ງ ຫໍ່.

10ຢຽດ ຫຮຍັງ ຢຽດ ດສຸ່ນ ອາລົນ ອ໋ອຍ ຕສຸ ສາ ດສຸ່ນ ປົ໊ວ ຮູງ ເຕ້ຍ ເຍີຍ ຫວຸຍ. ຕ່ອຍ ເຈ໋ຍ ຕ່ອຍ, ຫຮຍັງໆ ອ໋ອຍ ຕສຸ ຫລົ່ງ ເຕສ່ຍ ຟິ ຕສຸ໌ຍ ວົ້ວ ເຕົ້າ ແຊງ-ຄູ້ ເຍີຍ ດສຢ໊າມ ໄຕສ໋ ເຕ້ຍ ຈອງ. ນ້າຍ ນອມ ເຕ້ຍ ຕສ່ຽວ ເກົ້າ ທສີງ-ເດສ່ງ ເຈ໋ຍ ຝູງ ປຸນ ຕສ໊ຽວ. ”

11ຕສ໊ຽວ ກ໊ອງ ບົ໋ວ ໂມເຊ,

12“ເມີ່ຍ ຝາວ ອິສະລາເອນ ມ່ຽນ ເຍີຍ ມ່ຽນ ໂຮ໌ວ ວົ້ວ ຕສັ່ນ, ເຕົ້າໆ ມ່ຽນ ອ໋ອຍ ຕສຸ ທສວດ ຍ່ານ ປຸນ ຕສ໊ຽວ, ເຫວີ່ຍ ຕສົວະ ກັ້ນ ເຍີຍ ແໝ່ງ. ຮນັ້ງ ໜ່າຍ, ເມີ່ຍ ຊ້າວ ນິ່ນ ບົວ ເຍີຍ ຕສຢັ້ງ ໂຫ່ ຖສີງ ຕ້າຍ ໄມ້ ປວັ້ງ ຕສຸ ຫາຍ ຫຍູ່ງ ເຕສະ ໜ່ານ.

13ຕະຟ່ານ ຊ້າວ ເປັຍ ມ່ຽນ ໂຮ໌ວ ຕານ ເຍີຍ ໂມ໌ວ ເຕົ້າ ມ່ຽນ ອ໋ອຍ ຕສຸ ທສວດ ຢຽດ ຕສິ້ນ ຟາມ-ປວນ ຍ່ານ ຕສິ໋ວ ສີງ ຕິ່ນ ຕີ່ງ ຕ້າຍ ເຍີຍ ເຮນ້ຍ-ຕ້າວ. ນ້າຍ ເຕີ໋ຍ ຢຽດ ຕສິ້ນ ຟາມ-ປວນ ຍ່ານ ເຊ ເຫວີ່ຍ ຝົ່ງ ຫໍ່ ປຸນ ຕສ໊ຽວ.

14ຕະຟ່ານ ຝາວ ບົ໋ວ ຊ້າວ ເຍີຍ ມ່ຽນ, ຢຽມ ຫຍີ່ ຕສຽບ ຫຮຍັງ ຝາວ ແໝງ, ອ໋ອຍ ຕສຸ ທສວດ ນ້າຍ ເຕີ໋ຍ ຕສົວະ ແໝ່ງ ຍ່ານ ຝົ່ງ ຫໍ່ ປຸນ ຕສ໊ຽວ.

15ເມີ່ຍ ບົວ ຕໍ້ ເຫວີ່ຍ ຕສົວະ ແໝ່ງ ເຍີຍ ຢຽດ ຕສິ້ນ ຟາມ-ປວນ ຍ່ານ ຝົ່ງ ຫໍ່ ປຸນ ຕສ໊ຽວ, ມ່ຽນ ມ່າຍ ມ່ຽນ ຢ່າ ໄມ້ ທສວດ ເກົ້າ ທສ້ຳ. ມ່ຽນ ຈົ່ມ ມ່ຽນ ຢ່າ ໄມ້ ທສວດ ເກົ້າ ໂຕສະ.

16ເມີ່ຍ ຊຽວ ອິສະລາເອນ ມ່ຽນ ທສວດ ນ້າຍ ເຕີ໋ຍ ຕສົວະ ແໝ່ງ ເຍີຍ ຍ່ານ, ອ໋ອຍ ຕສຸ ຫລົ່ງ ເຫວີ່ຍ ຫວຸ່ຍ ປວັ້ງ ເຍີຍ ດົ໊ບ-ລິ່ວ ຖຈຽມ ຫລົ່ງ ເຍີຍ ກະນ້າຍ, ເຫວີ່ຍ ຢຽມ ຕສ໊ຽວ ເຍີຍ ດສະຮມຽນ ປຸນ ຕສ໊ຽວ ຈັ໋ງ ອິສະລາເອນ ມ່ຽນ, ເຫວີ່ຍ ຕສົວະ ເມີ່ຍ ບົວ ເຍີຍ ແໝ່ງ.”

17ຕສ໊ຽວ ກ໊ອງ ບົ໋ວ ໂມເຊ,

18“ເມີ່ຍ ອ໋ອຍ ຕສຸ ຫລົ່ງ ຕົ້ງ ຊິ ໂຕສ໋ວ ນອມ ດສ໋າວ ປົ໌ວ-ເຕສົ໋າ ປຸ້ນ, ແອ໋ງ ຫລົ່ງ ຕົ້ງ ຊິ ໂຕສ໋ວ ນອມ ທາບ ເຫວີ່ຍ ທາບ ປຸ້ນ. ຕໍ້ ມີ່ງ ຕົນ ຈ໊ຽນ ຫວຸ່ຍ ປວັ້ງ ເຍີຍ ດົ໊ບ-ລິ່ວ ເຖສົາ ເຕສ່ຍ-ຕ້ອງ ບຸດົ໋ງ, ຕສ້າງ ຈ໊ຽນ ວວມ.

19ອາລົນ ເຖສົາ ນິ່ນ ເຍີຍ ຕອນ ບົວ ອ໋ອຍ ຕສຸ ຫລົ່ງ ດສ໋າວ ປົ໌ວ-ເຕສົ໋າ.

20ນິ່ນ ບົວ ຫາຍ ຕສັ່ນ ເປັຍ ຫວຸ່ຍ ປວັ້ງ ດົ໊ບ ລິ່ວ, ນິ່ນ ບົວ ອ໋ອຍ ຕສຸ ດສ໋າວ ປົ໌ວ-ເຕສົ໋າ ຖສີງ ຕ້າຍ ໄມ້ ໄຕ່. ຫາຍ ຕສັ່ນ ມີ່ງ ຟັດ ເຕສ່ຍ-ຕ້ອງ ເຫວີ່ຍ ຟູ-ສູ, ເຊ ຕໍ້ ກະນ້າຍ ຫລົ່ງ ໂຕ໌ວ ປົ໊ວ ເຕສ່ຍ ຝົ່ງ ຫໍ່ ປຸນ ຕສ໊ຽວ,

21ຢ່າ ອ໋ອຍ ຕສຸ ດສ໋າວ ປົ໌ວ-ເຕສົ໋າ ຖສີງ ຕ້າຍ ໄມ້ ໄຕ່. ນ້າຍ ເຊ ອາລົນ ເຖສົາ ນິ່ນ ເຍີຍ ເຕສີ໊ຍ-ຟຸນ ຕ່ອຍ ເຈ໋ຍ ຕ່ອຍ, ຢຽດ ລິ໌ວ ອ໋ອຍ ຕສຸ ກັນ ເຍີຍ ເລີ໌ຍ.”

22ຕສ໊ຽວ ແອ໋ງ ກ໊ອງ ບົ໋ວ ໂມເຊ,

23“ເຕສ໊າະ ນ້າຍ ເຕີ໋ຍ ດາງ ເຍີຍ ຫລາບ ຫລິ່ວ, ມູຢໍ່ ວວມ ປົວ ຈ້ອຍ ເຖສົາ ຫຍີ່ ຕສຽບ ຈົ໊ວ ລູ໌ງ, ເຈ໋ຍ-ໂລ່ວ ດຢັ໋ງ-ດົ໊ບ ຢຽດ ຈ້ອຍ ຟ່າ ຕສຽບ ເປ໊ດ ລູ໌ງ, ຕສ້າ ອການ ຢຽດ ຈ້ອຍ ຟ່າ ຕສຽບ ເປ໊ດ ລູ໌ງ,

24ການບຸນ ປົວ ຈ້ອຍ ຫຍີ່ ຕສຽບ ຈົ໊ວ ລູ໌ງ. (ນ້າຍ ເຕີ໋ຍ ຢຽດ ຕສູ໊ງ ອ໋ອຍ ຕສຸ ຕສິ໋ວ ສີງ ຕິ່ນ ຕີ່ງ ຕ້າຍ ເຍີຍ ເຮນ້ຍ-ຕ້າວ.) ແອ໋ງ ຕສອບ ເປຢີຍ ກ່ອງ ກະລັ້ນ ໂຢ້ວ.

25ປຸນ ເຕົ້າ ເຜວ ກະນ້າຍ-ດາງ ເຍີຍ ຕສັ່ງ ມ່ຽນ ເຕສ໊າະ ນ້າຍ ເຕີ໋ຍ ຢຽດ ຕສູ໊ງ ເຜວ ຕ້າຍ ດາງ ເຍີຍ, ໂຕສ໋ວ ເປ໋ນ ອອນ ມ່ຽນ ເຍີຍ ທສີງ-ເດສ່ງ ໂຢ້ວ.

26ຫລົ່ງ ນ້າຍ ເຕີ໋ຍ ໂຢ້ວ ໂຕ໋ ຫວຸ່ຍ ປວັ້ງ ເຍີຍ ດົ໊ບ-ລິ່ວ ເຖສົາ ແລ໌ງ ແຫງ່ງ ຫວ່າ ຟາງ,

27ເຕ້ຍ ເຖສົາ ເຕ້ຍ ເຍີຍ ຢຽດ ຕສູ໊ງ ຈາ-ສີ່, ໂຕ໋ ຕັງ ເຖສົາ ຕັງ ເຍີຍ ຈາ-ສີ່, ໂຕ໋ ປົ໊ວ ຮູງ ເຕ້ຍ,

28ໂຕ໋ ປົ໊ວ ເຕສ່ຍ ກະນ້າຍ ເຍີຍ ເຕສ່ຍ-ຕ້ອງ ເຖສົາ ເຕສ່ຍ-ຕ້ອງ ເຍີຍ ຈາ-ສີ່, ລ່ຽມ ປຸ້ນ ເຖສົາ ປຸ້ນ ເຍີຍ ທາບ.

29ອ໋ອຍ ຕສຸ ສາ ເດສ່ງ ນ້າຍ ເຕີ໋ຍ ກະນ້າຍ, ຢຽດ ຕສູ໊ງ ຕສ່ຽວ ເປ໋ນ ເກົ້າ ທສີງ-ເດສ່ງ ເຈ໋ຍ ເຍີຍ ກະນ້າຍ. ຕະຟ່ານ ຫາຍ ຫຍູ່ງ ຄວັດ ຕສຸ ນ້າຍ ເຕີ໋ຍ ກະນ້າຍ, ວົ້ວ ຫຍູ່ງ ຕສ່ຽວ ທສີງ-ເດສ່ງ ອ໊ະ.

30“ແອ໋ງ ເຕສ໊າະ ນ້າຍ ເຕີ໋ຍ ໂຢ້ວ ໂຕ໋ ອາລົນ ເຖສົາ ນິ່ນ ເຍີຍ ຕອນ ບົວ ສາ ນິ່ນ ບົວ ທສີງ-ເດສ່ງ ເຫວີ່ຍ ໂຕສ໋ວ ໄຊ ມ່ຽນ ຟູ-ສູ ເຢຍ.

31ເມີ່ຍ ອ໋ອຍ ຕສຸ ກ໊ອງ ບົ໋ວ ອິສະລາເອນ ມ່ຽນ, ‘ນ້າຍ ເຊ ເຢຍ ເຍີຍ ທສີງ-ເດສ່ງ ໂຢ້ວ ເຫວີ່ຍ ຕ່ອຍ ເຈ໋ຍ ຕ່ອຍ ຢຽດ ລິ໌ວ ຫລົ່ງ.

32ນ້າຍ ຫຍູ່ງ ໂຢ້ວ ໄມ້ ຕູ໋ງ ຫລະໄກວ້ ໂຕ໋ ໄມ້ ເຕສີ໌ຍ ໂຕສ໋ວ ໄຊ ມ່ຽນ ເຍີຍ ມ່ຽນ. ຢ່າ ໄມ້ ຕູ໋ງ ຫລົ່ງ ນ້າຍ ຫຍູ່ງ ຕສະເອີ໋ຍ ເຜວ ຕ້າຍ ເຫວີ່ຍ ກັ້ນ ຫຍູ່ງ ເຈົ໊າ ຫລົ່ງ. ນ້າຍ ເຕີ໋ຍ ໂຢ້ວ ເຊ ທສີງ-ເດສ່ງ. ອ໋ອຍ ຕສຸ ຈັ໋ງ ຈ໊ຽນ ຕສະເກ້ງ ທສີງ-ເດສ່ງ.

33ຫາຍ ເຕົ້າ ເຜວ ນ້າຍ ຫຍູ່ງ ໂຢ້ວ ຕ້າຍ ຫລົ່ງ ໄຟ ຫລະໄກວ້ ໂຕ໋ ໄມ້ ເຕສີ໌ຍ ໂຕສ໋ວ ໄຊ ເຍີຍ ມ່ຽນ, ວົ້ວ ເຕົ້າ ຢຽມ ນິ່ນ ເຍີຍ ມ່ຽນ ບຸດົ໋ງ ຕສູ໊ງ ຕສຸ ໄພ ກວັ່ງ.’”

34ຕສ໊ຽວ ແອ໋ງ ກ໊ອງ ບົ໋ວ ໂມເຊ, “ເຕສ໊າະ ນ້າຍ ເຕີ໋ຍ ດາງ ເຍີຍ ຫລາບ ຫລິ່ວ ຕ້າຍ ຫຍູ່ງໆ ຟີ່ ບົວະ. ມ່າຍ ຫຍູ່ງ ດຢັ໋ງ-ຕສູງ-ດາງ, ເຖສົາ ຖຈະມົດ ເຖສົາ ອໍເຫວີຍ ແອ໋ງ ເຖສົາ ກັ້ນ ຫຍູ່ງ ດຢັ໋ງ-ຕສູງ ເຫ່ວ ຟານເກນເຊນ.

35ປຸນ ເຕົ້າ ເຜວ ກະນ້າຍ-ດາງ ເຍີຍ ຕສັ່ງ ມ່ຽນ ເຜວ ນ້າຍ ເຕີ໋ຍ ກະນ້າຍ ໂຕສ໋ວ ຮູງ. ແອ໋ງ ຕສອບ ເຕີ໋ຍ ເດສົ໊າ ປຸນ ຮູງ ທສີງ-ເດສ່ງ, ໄມ້ ມ່າຍ ຫວຸຍ.

36ເຕສ໊າະ ເຕີ໋ຍ ຮູງ ໝໍ່ ເປ໋ນ ບ໊ວນ ຕໍ້ ມີ່ງ ຫວຸ່ຍ ປວັ້ງ ເຍີຍ ດົ໊ບ-ລິ່ວ ກະຍົ໌ວ ອັນ ຈ໊ຽນ ແລ໌ງ ແຫງ່ງ ຫວ່າ ຟາງ ດສະຮມຽນ ແໝງ, ຕົ້ງ ເຢຍ ອ໋ອຍ ປວັ້ງ ເມີ່ຍ ເຍີຍ ຕ໋ອງ. ເມີ່ຍ ບົວ ອ໋ອຍ ຕສຸ ຈັ໋ງ ຈ໊ຽນ ນ້າຍ ເຕີ໋ຍ ຮູງ ຕສະເກ້ງ ທສີງ-ເດສ່ງ ເຈ໋ຍ ເຍີຍ ຮູງ.

37ໄມ້ ຕູ໋ງ ຫລົ່ງ ນ້າຍ ຫຍູ່ງ ຕສະເອີ໋ຍ ເຜວ ຕ້າຍ ເຫວີ່ຍ ກັ້ນ ຫລົ່ງ. ອ໋ອຍ ຕສຸ ຈັ໋ງ ຈ໊ຽນ ນ້າຍ ເຕີ໋ຍ ຮູງ ເຊ ທສີງ-ເດສ່ງ, ຝູງ ປຸນ ຕສ໊ຽວ.

38ຫາຍ ເຕົ້າ ເຜວ ນ້າຍ ຫຍູ່ງ ຮູງ ຕ້າຍ ເຫວີ່ຍ ກັ້ນ ຫລົ່ງ ໂຕສ໋ວ ດາງ ເຍີຍ ເຖຈຍ, ວົ້ວ ເຕົ້າ ຢຽມ ນິ່ນ ເຍີຍ ມ່ຽນ ບຸດົ໋ງ ຕສູ໊ງ ຕສຸ ໄພ ກວັ່ງ.”

← Chapter 29 Jump to: Chapter 31 →