1 Samuel 14 — Mizo CL

1Ni khat chu Saula fapa Jonathana chuan a râlthuam kengtu hnênah, “Hawh, râl lehlama Filistia sipai hmunah sâwn i va kal teh ang,” a ti a. A pa chu a hrilh lo va.

2Saula chu Gibea ram hmâwr Migron hmuna theibuhfai buk hnuaiah a awm a. A hnêna awm sipaite chu zaruk lai an ni.

3Puithiam Ahija pawh puithiam kawr hain a awm bawk a. Ani hi Silo khuaa Lalpa puithiam, Elia fa Finehasa fapa Ikaboda unaupa Ahituba fa a ni. Jonathana chu râl lehlamah a kal tawh tih tu mahin an hre lo.

4Filistia sipai bûk Jonathanan a panna khân sîr tawnah chuan lungpui tohlâwt a awm a: a pakhat hming chu Boze a ni a, pakhat dang chu Senea a ni.

5Pakhat chu hmâr lam Mikmas lam hawi zâwngin a awm a, pakhat chu chhim lam Geba hawi zâwngin a awm a.

6Jonathanan a râlthuam kengtu tlangvâl hnênah chuan, “Hawh, serh tan lohho awmnaah sâwn i kal teh ang, Lalpan min ṭanpui ngei ang. An tam emaw, an tlêm emaw Lalpa tân min hnehtîr harsatna eng mah a awm lo,” a ti a.

7A râlthuam kengtu chuan, “I duh ang chuan ti la, ka zui zêl ang che. Ka phatsan lo vang che,” a ti a.

8Jonathana chuan, “Aw le, hnaih ila, hmuh tûrin i va inlan ang.

9‘In hnêna kan lo kal hma chu lo awm rawh u,’ min tih chuan kan hmunah kan awm reng ang a, an hnênah kan chho lo vang.

10‘Lo chho teh rêng u,’ min tih chuan kan chho vang a, chu chu Lalpan anni chu kan kutah min pe tawh a ni tih chhinchhiahna a ni ang,” a ti a.

11Tichuan, an pahnihin Filistia sipaiho hmuh tûrin an va inlan a. Filistia mite chuan, “En teh u, Hebrai mite an bihrûkna hmun ata an lo chhuak e,” an ti a.

12Vênbûka sipaite chuan Jonathana leh a râlthuam kengtu chu an au va, “Lo chho teh rêng u, in hre mai ang,” an ti a. Jonathana chuan a râlthuam kengtu hnênah chuan, ‘Mi rawn zui chho rawh, Lalpa chuan anni chu Israel-te kutah a pe ta e,” a ti a.

13Jonathana chu a vâk chho ta a, a râlthuam kengtu chuan a zui zêl a. Jonathana hmaah chuan anni chu an tlu ta zawih zawih a, a hnungah a râlthuam kengtu chuan a rawn that zêl a.

14Inbeih hmasak ber ni chuan Jonathana leh a râlthuam kengtu chuan fîng chanve vêl chhûngah chauh mi sawmhnih lai an that a.

15Sipai zawng zawng, riahbûka awm te, phûla awm te, vênbûka awm te, hmatâwng pâwlte chu an chiai a, an buai ta mur mur a. Lîr te a nghîng a, Pathianin manganna nasa tak a thlentîr ta a.

16Benjamin bial Gibea khuaa Saula râlvengtu sipaite chuan an han thlîr a; ngai teh, Filistia-ho chu mangang takin an tlân darh chum chum a.

17Saula chuan a sipaite hnênah, “Inchhiar ula, tute nge kim lo han en teh u,” a ti a. An han inchhiar chuan Jonathana leh a râlthuam kengtu chu an lo awm ve lo va.

18Saula chuan Ahija hnênah, “Puithiam kawr kha han phawrh teh,” a ti a. Ani chuan puithiam kawr chu Israel-te hmaah a ha a ni.

19Saulan puithiam a biak lai chuan Filistia riahhmuna an buaina chu a zual tawlh tawlh a, Saulan puithiam hnênah chuan, “Dah leh mai rawh,” a ti a.

20Tichuan, Saula leh a hnêna mipui awmte chu an pung khâwm a, indona hmunah an kal ta a. Ngai teh, Filistia mite chu anmahni leh anmahni khandaihin an lo inbei chiam a, an buai nuai nuai a.

21Tûn hma lama Filistia ṭan ṭhîn Hebrai mite leh riahhmuna lo awmte chu Israel lamah an lo pakai a, Saula leh Jonathana lamah an ṭang ta a.

22Chutiang bawkin Efraim tlângrama Israel mi, biru zawng zawng pawh chu Filistia mite an tlânchhia tih an hriatin indonaah chuan an lo tel ve a, an rawn ûm ve nghâl a.

23Chumi ni chuan Israel-ho chu Lalpan a hnehtîr a, Beth-aven thleng rawkin an bei zui a.

24Saulan mipuite chu a vau va, “Ka hmêlmate chunga phuba ka lâk ni hian khaw thim hmaa chaw ei chuan ânchhia dawng rawh se,” a tih avângin chumi ni chuan tu man eng mah an ei lo, Israel-te chu an chau hle a.

25Mipui chuan ngaw an va thleng a, khawizu a lo tam hle a.

26Mipuiin ngaw chhûng an luh chuan khawizu chu a lo far zawih zawih a, ânchhe dawn an hlauh avângin tu man an pir lo.

27Jonathana erawh chuan a pain mipui a vauna kha a hre ve lo va, tiang hmawrin khawithlâr chu a chhun a, a han tem a, a lo harh ta sawt a.

28An zînga mi pakhat chuan a hnênah, “I pain hetiangin min vau asin, ‘Tu pawh, vawiina chaw ei apiangin ânchhia dawng rawh se,” a tih avângin mite chu an chau zo ta a nih hi,” a ti a.

29Jonathana chuan, “Ka pa hian mite tân harsatna a siam mai mai a nih hi; en ta che u, kei pawhin khawizu tlêm tê ka han tem a, ka harh tâk hi,” a ti a.

30“Mite hian an hmêlmate laka an thil lâk hi an duh duhin vawiin hian ei sela chu an chak phah ang a, Filistia mite hi kan that tam lehzual tûr’” a ti a.

31Chumi ni chuan Filistia mite chu an hneh a, Mikmas aṭangin Aijalon thlengin an ûm a, Israel-te pawh chu an chau ve ta hle a.

32Mite chuan an râllâk thil: berâm te, bâwngpa te, bâwngno te chu an la sawk sawk a, leiah an phet thlu a, an talh a, a thisen chawpin an ei ta mai a.

33Saula hnênah, “Mite chuan thisen chawpin sa an ei a Lalpa lakah thil an tisual ta e,” tiin an sawi a. Ani chuan, “Dik lo takin thil in ti ta a ni, hetah hian lung min han lâk teh u,” a ti a.

34Saulan chûng mite hnênah chuan, “Vâk darh ula, mi hnênah, ‘mi tinin bâwngpa leh berâm han la sela, hetah hian talh sela, ei rawh se. A thisen chawpa eiin Lalpa chungah thil tisual suh u,’ tiin hrilh rawh u,” a ti a. Chumi zân chuan an bâwngpa an rawn kai ṭheuh va, chutah chuan an talh a.

35Saula chuan Lalpa tân maichâm a siam a, chu chu Lalpa tâna a maichâm siam hmasak ber a ni.

36Saula chuan, “Zânah Filistia mite chu bei ila, zîng khaw ên thlengin i bei ang u, tu mah zuah tûr a ni lo,” a ti a. Anni chuan, “Ṭha i tih ang chuan ti rawh,” an ti a. Puithiam erawh chuan, “Pathian i râwn rih ang u,” a ti a.

37Saula chuan, “Filistia mite chu ka zu bei ang em? Israel-te kutah i pe ang em?” tiin a zâwt a. Chumi ni chuan Pathianin a chhâng lo.

38Saula chuan, “Nangni mipui hotu zawng zawngte u, lo hnai ula, vawiin hian eng nge kan tihsual hriat chhuah i tum teh ang.

39Lalpa, Israel-te chhanhimtu, mi nunga chhâlin ka sawi e, ka fapa Jonathana tihsual pawh ni se, a thi ngei tûr a ni,” a ti a. Nimahsela, mipui zîng aṭangin tu mahin an chhang lo.

40Israel mi zawng zawng hnênah chuan, “Inbûk ila, nangniho hi lehlamah ṭang ula, kei leh ka fapa Jonathana hi lehlamah kan ṭang ang e,” a ti a. Mite chuan Saula hnênah, “Ṭha i tih ang chuan ti mai rawh,” an ti a.

41Saula chuan Israel-te Pathian hnênah chuan, “A dik tak chu han tar lang ta che,” a ti a. Ṭhumvâwr chu Saula leh Jonathana chungah chuan a tla a, mipui chu an fihlîm ta a.

42Saula chuan, “Kei leh ka fapa Jonathana thlei nân ṭhumvâwr rawh u,” a ti a. Jonathana chungah chuan a tla ta a.

43Saula chuan Jonathana hnênah, “Eng nge i tihsual min hrilh rawh” a ti a. Jonathana chuan a hnênah, “Ka tiang hmâwra khawizu tlêm chu ka tem ngei alâwm; chuvângin, ka thi mai tûr a ni,” a ti a.

44Saula chuan, “Jonathan, i thi ngei tûr a ni, i thih loh chuan na deuh pawhin Pathianin a tih tihin min ti rawh se,” a ti a.

45Mite chuan Saula hnênah, “Israel-te tâna hnehna ropui tak thlentu Jonathana hi a thi ang maw? A thi tawp lo vang. Lalpa nunna chhâlin kan sawi e, a samzai pakhat pawh leiah a tla lo vang,” an ti a. Mipui chuan Jonathana chu thi lo tûrin an chhan chhuak ta a.

46Chumi hnu chuan Saulan Filistia mi a ûm chu a kîrsan a, Filistia mite pawh an ram lamah an haw ta a.

47Saula chu Israel lal a lo nih chuan kil tina an hmêlma Moab mi te, Amon mi te, Edom mi te, Zoba lal te, Filistia mite chu a do va. A hawina lam apiangah a hneh zêl a.

48Huai takin a bei a. Amalek mite pawh a hneh a, Israel-te chu rapbettute kut ata a chhan chhuak a.

49Saula fate chu Jonathana te, Isvia te, Malkisua te an ni; a fanu upa zâwk chu Merabi a ni a, a naupang zâwk chu Mikali a ni.

50Saula nupui hming chu Ahinoami, Ahimaaza fanu a ni. A sipai hotu ber hming chu Abnera a ni, a pami Nera fapa a ni.

51Kisa chu Saula pa a ni a, Abnera pa Nera chu Abiela fapa a ni.

52A dam chhûng zawng, Saula chu Filistia mite nên nasa takin an indo ṭhîn a, Saula chuan mi chak emaw, mi huaisen emaw a hmuh apiang lamṭang atân a siam zêl ṭhîn.