1 Samuel 15

Mizo CL

← Chapter 14 Jump to: Chapter 16 →

1Samuela chuan Saula hnênah, “ Lalpan a mi Israel-te chunga rorêltu atân hriak thih tûr chein min tîr a; chuvângin, Lalpa thu hi ngaithla rawh le.

2Engkim Lalpa chuan heti hian a ti, ‘Israel-te chu Aigupta ram ata an lo chhuah lai khân Amalek-hovin kawng lakah an lo tihbuai avângin ka hrem dâwn a ni.

3Amalek-ho bei tûrin chhuak la, an thil neih zawng zawng tiboral vek ang che. A hmei a pa, nausên hnute hne lai chenin, an bâwngpa te, berâm te, sanghâwngsei te, sabengtung te nên tihlum vek ang che,’ a ti e” a ti a.

4Tichuan, Saulan Telem khuaah mipui a ko khâwm a, Israel mi nuaihnih leh Juda mi sîngkhat lai an ni.

5Saula chuan Amalek khawpui chu a pan a, ruamah lambun tumin a lo châng a.

6Aigupta ram aṭanga Israel-te an lo chhuah khân, Ken mite chuan an lo khawngaih hle a, Saula chuan an hnênah, “Lo chhuak ula, Amalek mite zîng ata inthiarfihlîm rawh u; chutilo zawng an zîngah ka tiboral ve dah ang che u,” a ti a. Chutichuan, Ken mite chu Amalek mite zîng ata chu an chhuak a.

7Saula chuan Amalek mite chu Havila aṭanga Aigupta ram dep Sur thlengin a hneh a.

8Amalek lal Agaga chu a nung chungin a man a, mi dang zawng chu khandaihin a that a.

9Saula leh a mite chuan Agaga te, berâm ṭha ṭha te, bâwngpa ṭha leh thau thau te, berâmno ṭha ṭha te chu an tihlum duh lo va, ṭha lo deuh leh an duh loh chauh chu an that vek a.

10Lalpa thu chu Samuela hnênah a lo thleng a,

11“Saula, lal atân ka lo ruat ta chu pawi ka ti hle mai; min hawisan a, ka thupêk a zâwm si lo,” a ti a. Samuela chu a thin a ur hle a, zankhuain Lalpa a au va.

12A tûkah chuan Samuela chu zîng takah a tho va, Saula hmuh tumin a chhuak a; mahse “Saula chu Karmel-ah a kal a, chutah chuan dam lai lung a phun a, a lo kîr leh a, Gilgal-ah a chhuk leh ta,” tiin Samuela chu miin an lo hrilh a.

13Samuela chuan Saula hnên a lo thleng a, Saula chuan, “ Lalpan malsâwm che rawh se; Lalpa thupêk ang chuan ka ti ta e,” a lo ti a.

14Samuela chuan, “Chûng berâm bê leh bâwng bû ka hriatte chu engtizia nge ni?” a ti a.

15Saula chuan, “Amalek mite ta an rawn lâksak a ni. Mite chuan berâm leh bâwng, a ṭha ṭha chu Lalpa, i Pathian hnêna thilhlan atân an rawn la a, a dang zawng chu kan tihlum vek e,” a ti a.

16Samuela chuan Saula hnênah, “Nizâna Lalpan ka hnêna thu a sawi ka hrilh teh ang che,” a ti a. Saula chuan, “Sawi ta che,” a ti a.

17“Inngai pawimawh lo mah la, Israel hnam hotu atân ruat i ni lâwm ni? Lalpan Israel lal atân hriak a thih che a.

18Lalpan thil ti tûrin a tîr chhuak che a, ‘Kal la, mi sualho, Amalek mite chu tihlum vek rawh, an boral vek hma chuan bei zêl rawh,’ a ti che a.

19Engati nge Lalpa thu zâwm lova râllâk thil i lâk bawrh bawrha, Lalpa mit hmuha thil ṭha lo i tih le?” a ti a.

20Saula chuan Samuela hnênah, “ Lalpa thu chu ka zâwm alâwm. Lalpa min tirhnaah chuan ka kal a, Amalek lal Agaga ka rawn man a, Amalek mite chu ka that vek asin.

21Amaherawhchu, mite chuan râllâk thil - berâm leh bâwngte tihboral tûr zînga a ṭha ṭha chu Lalpa i Pathian hnêna Gilgal-a hlan atân an rawn la a ni,” a ti a.

22Samuela chuan: “Hâlral thilhlan leh inthawinate aiin: Lalpa chuan a thu awih a lâwm zâwk lo vem ni? Ngai teh, thilhlan aiin thu awih a ṭha zâwk a, Berâmno thau aiin a thu pawm a ṭha zâwk.

23Hei hi aien sualte nên thuhmun a ni. Luhlul hi milem biak tluk a ni. Lalpa thu i zawm loh avângin Ani pawhin lal atân a duh bîk ta lo a che,” a ti a.

24Saula chuan Samuela hnênah, “Ka lo tisual dêr mai a, Lalpa thupêk leh i thu ka zâwm lo a ni e, mipui ka hlau va, an thu ka zâwm mai a ni.

25Tûnah ka ngên a che, ka sual ngaidam la, Lalpa ka biak theih nân min hawpui leh rawh aw,” a ti a.

26Samuela chuan Saula hnênah, “Ka hawpui tawp lo vang che, Lalpa thu i duh lo va, Lalpa pawhin Israel-te lal atân a duh bîk ta lo che a ni,” a ti a.

27Samuela chu kal tuma a han her chuan, Saulan a puan fêmah a lo chelh a, a thlêr ta a.

28Samuelan a hnênah, “Vawiin aṭang hian Lalpan Israel ram chu a chhuhsak ta che a; mi, nang aia ṭha zâwk mi dang hnênah a pe ta a ni.

29Israel Miropuia chu a daw lo vang, a lamlêt hek lo vang; mihring anga lamlêt leh mai mi a ni si lo,” a ti a.

30Saula chuan, “Ka lo tisual ta a ni; mahse, ka mite zînga upaho leh Israel-te hmaah min zahder hrâm la, min hâwnpui leh rawh; Lalpa i Pathian chu ka bia ang,” a ti a.

31Tichuan, Samuelan Saula chu a hâwnpui a, Saula chuan Lalpa chu chibai a bûk ta a.

32Samuela chuan, “Amalek lal Agaga chu ka hnênah han hruai rawh,” a ti a. Agaga chu khûr chungin a hnênah a va kal a, “Thihna râpthlâk chu ka pumpelh tawh a ni ang chu maw?” a ti a.

33Samuela chuan, “I khandaihin hmeichhiate fa nei lova i siam ṭhîn ang khân i nu pawh hmeichhe zînga fa nei lo nu a ni ang,” a ti a. Samuela chuan Gilgal khuaah Lalpa mit hmuhin a sât sawm ta berh a.

34Samuela chu Rama khuaah a kal a, Saula pawh a awmna Gibea khuaah ama inah a haw chho ta a.

35Samuela chuan a dam chhûngin Saula chu a tlawh leh ta lo va. Samuela chu Saula avâng chuan a rilru a na hle a; Lalpa chuan, Israel lal atân Saula a lo siam chu pawi a ti hle a.

← Chapter 14 Jump to: Chapter 16 →