1 Samuel 25

Mizo CL

← Chapter 24 Jump to: Chapter 26 →

1Samuela chu a thi a, Israel mi zawng zawng chu amah sûn tûrin an lo kal khâwm a. Rama khuaa a in kiangah chuan an phûm a. Tin, Davida chu a tho va, Paran thlalêrah chuan a chhuk a.

2Maon khuaah chuan mi pakhat a awm a, Karmel-ah ram a nei a, a hausa hle a ni. Kêl sângkhat leh berâm sângthum a nei a, Karmel tlângah chuan a berâm hmulte chu a mêt a.

3Chu pa hming chu Nabala a ni a, a nupui hming chu Abigaili a ni. Chu hmeichhia chu a felin a hmêl a ṭha hle a, a pasal erawh chu mi kawm tak leh thinbutut nei a ni. Ani chu Kaleba thlah a ni a.

4Chutah chuan Nabalan berâm hmul a mêt tih Davida chuan thlalêr aṭangin a lo hria a.

5Davida chuan a hnênah tlangvâl sâwm a tîr a, a mi tirhte hnênah chuan,

6“Karmel tlânga Nabala hnênah chho ula, ka hmingin chibai bûk ang che u. ‘I chungah te, in chhûngkaw chungah te, i neih zawng zawng chungah te thlamuanna awm rawh se.

7He laiah berâm hmul i mêt tih ka lo hria a, i berâmpute pawh kan zîngah an khawsa ṭhîn a, an pawi eng mah kan khawih ngai lo, Karmel tlânga an awm chhûngin an thil eng mah a bo ngai hek lo.

8I hote zâwt la, an hrilh thei ang che. Chuvângin, ka hote hi lo khawngaih la, hei in ruai ṭheh ni takin an lo kal hi, i neih ang ang, i chhiahhlawhte leh i fapa Davida hi lo pe tûrin ka ngên a che,’ va ti rawh u,” a ti a.

9Davida hote chu an kal a, chûng thu zawng zawng chu Davida hmingin an sawi a; tichuan, an nghâk ta a.

10Davida hote chu Nabala chuan a chhâng ta a, “Davida chu tu nge maw ni le: Jesaia fapa chu tu nge ni? Tûnlai hian chhiahhlawh pute tlân bosan an tam mai a.

11Ka chaw te, ka tui te, ka berâm hmul mêttu te tâna ka talh sa te hi tute nge maw an nih pawh ka hriat hleih loh hnênah ka pe tehlul ang maw” a ti a.

12Davida tirh tlangvâlte chu an lo kîr leh a, chûng thu zawng zawng chu an hrilh a.

13Davida chuan a mite hnênah, “Khandaih pai ṭheuh rawh u,” a ti a. Tichuan, khandaih an pai ta sang sang a, Davida pawh chuan a khandaih a pai a, mi zali laiin an zui chho va, mi zahnih chu bungraw vêngin an awm a.

14Chhiahhlawh pakhatin Nabala nupui Abigaili hnênah, “Ngai teh, Davida chuan thlalêr aṭangin kan pu chibai bûk tûrin mi a rawn tîr a, ani chuan a lo hau va.

15Chûng mite chu an ṭha hle a, kan pawi eng mah an khawih lo va, phûla kan awm ho chhûng zawng khân eng mah kan hloh ngai hek lo.

16Berâm vênga an bula kan awm chhûngin kan tân chhûn leh zânah kulh an ni ngawt mai a.

17Tûnah, he thil hi engtin nge i tih dâwn ngaihtuah teh; chutilo chu kan pu chungah leh a chhûngkaw chungah thil ṭha lo a thleng mai ang e; kan pu lah hi a sual khawp a, thu hrilh theih pawh a ni si lo,” a ti a.

18Abigaili chuan hmanhmawh takin chhang tlang zahnih leh uain bûr hnih leh berâm panga, a hmin sa te, vaikan kg. sâwm leh pasarih leh grep pho ro bâwr te, theipui hlâwm zahnih nên a rawn la a, sabengtung a phurhtîr a.

19A chhiahhlawh tlangvâlte hnênah chuan, “Lo kal hmasa ula, ka rawn zui ang che u,” a ti a. A pasal Nabala erawh chu a hrilh lo.

20Sabengtung chungah chuan a chuang a, a kal ta a. Leisekawt a thlen laiin Davida leh a hote chuan an rawn pan a, an intâwk ta a.

21Davida chuan, “He pa thil neih zawng zawng hi pakhat mah bo lovin thlalêrah khân a thlâwnin ka lo vênsak a nih hi le, a chunga ka ṭhatna hi thil ṭha lovin min rûl ta si a.

22Khawvâr hmaa an zînga mipa naupang pakhat tê pawh ka zuah chuan Pathianin a tih tihin, na tak pawhin min ti rawh se,” a ti rilru a ni.

23Abigaili chuan Davida a hmuh veleh a sabengtung aṭangin a chhuk a, Davida chu bawkkhupin chibai a bûk a.

24A ke bulah a kûn a, a hnênah, “Ka pu, keima thiam loh vâng chauh a ni e, a mawh chu ka phur ang. I chhiahhlawhnuin i hnêna ka ngen hi khawngaih takin min ngaihthlâksak ang che.

25Ka pu, he mi sualpa thu hi ngaimawh suh, a hming Nabala a ni ang ngei hian mi â a nih hi, â takin thil a ti ṭhîn a ni, kei i chhiahhlawhnu hian ka pu mi tirhte ka lo hmu lo atin a ni.

26Tûnah ka pu, Lalpa mi nung leh i hming chhâlin ka sawi e, “Thisen chhuah lo tûr leh phuba la lo tûrin Lalpa chuan a vêng che a, i hmêlma, i ṭhat lohna zawngtute chu Nabala ang hian awm rawh se.

27Tin, hei ka pu, i chhiahhlawhnuin i tân thilpêk ka rawn ken hi i ṭhuihruai tlangvâlte hian min dawnsak sela,

28i chhiahhlawhnu sualna hi khawngaih takin ngaidam ang che. Lalpa chuan ka pu lalna chu tinghet sela; ka pu hi Lalpa tâna do i ni si a, i dam chhûngin thil ṭha lo i tih hmuh tûr awm suh se.

29Miten tihhlum tumin ûm che mah sela, ka pu nunna chu Lalpa i Pathian chuan vênghim tlat sela, i hmêlmate nunna erawh chu lungtê an perh bo daih ang hi ni rawh se.

30Israel-te hruaitu atân a ruat tawh si che a, Lalpa chuan i tâna thil ṭha a lo tiam tawh zawng zawng chu thlentîr rawh se.

31Chhan awm lova thisen i chhuah ngai loh leh phuba i lâk ngai loh hi, ka pu, i inchhîr rêng rêng lo vang. Lalpan ka pu hi a tihhlawhtlin hunah i chhiahhlawhnu hi min hre reng ang che aw,” a ti a.

32Davida chuan Abigaili hnênah, “Vawiina mi lo hmuak tûra tîrtu che Israel-te Pathian Lalpa chu fakin awm rawh se.

33I remhriatna avângin duhsakna dawng ang che, thisen chhuah sualna lak ata min vên avâng leh phuba la lo tûra vawiina ka kut i chelh avâng hian.

34Tina lo tûr che ua min khaptu Israel-te Pathian Lalpa, mi nung hmingin ka sawi e. Nang chuan mi lo hmuak lo la chu Nabala leh a mite chu tu mah zuah lovin naktûk zîng khaw ên hmain thah vek ka lo tum asin,” a ti a.

35Davida chuan a thil rawn ken chu a lo dawnsak a, “Thlamuang takin haw rawh, i dîl chu ka hria e, i duh ang chuan ka tihsak ang che,” a ti a.

36Abigaili chu Nabala hnênah chuan a hâwng ta a, inah chuan ruai ropui tak an lo ṭheh a, Nabala chu a rui hle a, a lo ṭawng lûng lûng a. chuvângin, a tûk khawvâr hma chuan a hnênah eng mah a sawi lo.

37A tûkah chuan Nabala pawh a rui tawh lo va, a nupui chuan thil awmzia zawng zawng chu a han hrilh chuan a mit sulh a, a che thei ta lo va.

38Ni sâwm hnuah Nabala chu Lalpa kut tuarin a thi ta a.

39Nabala thih thu Davidan a lo hriat chuan, “Nabalan min hmuhsitna phuba min lâksak a, thil sual ti lo tûra a chhiahhlawh min vêngtu Lalpa chu fakin awm sela, Lalpa chuan Nabala chu a thil tihdik loh avângin a tuartîr a nih hi,” a ti a. Davida chuan Abigaili chu a nupui atâna va be tûrin mi a tîr a.

40Davida chhiahhlawhte chu Karmel tlângah Abigaili hnênah chuan an va kal a, a hnênah, “Davida chuan a nupui atân hruai tûr chein min tîr a ni,” an ti a.

41Tichuan, Abigaili chu a tho va, bawkkhupin chibai a bûk a, “Ngai teh, i chhiahhlawhnu hi ka pu chhiahhlawhte ke sil tûr pawhin ka inpeih e,” a ti a.

42A tho thuai a, sabengtung chungah a chuang a, a tirhkah nula panga nên chuan Davida mi tirhte chu an zui a; tichuan, a nupuiah a awm ta a.

43Davida chuan Jezreel mi, Ahinoami a lo nei tawh bawk a, an pahnih chuan nupuiah a nei ta a.

44Saula khân a fanu Mikali, Davida nupui kha, Galim khaw mi Laisa fapa Paltia a lo neihtîr tawh reng a ni.

← Chapter 24 Jump to: Chapter 26 →