Song of Solomon 6

Malagasy 2004 (DIEM PROTESTANTA)

← Chapter 5 Jump to: Chapter 7 →

1Fa nankaiza ny malalanao, ry vehivavy tsara tarehy indrindra? Nivily aiza ny malalanao mba hiarahanay aminao hitady azy?

2Midina any an-jaridainany ny malalako, dia any an-tsaham-boninkazo mandraradraraka, mba hirao-bilona any sy hioty lisy.

3An’ny malalako aho ary ahy ny malalako. Amin’ny toerana misy lisy no mirao-bilona izy.

4Ianao, rahavako, dia tsara tarehy tahaka ny tanàna Tiritsà sady kanto tahaka an’i Jerosalema ary mahatalanjona toa andian-kintana.

5Aza ajerinao ahy ny masonao fa mampiontanontana ny foko. Ny volon-dohanao dia toy ny andian’osy midina ny tendrombohitra Gilehada.

6Ny nifinao dia fotsy toa andian’ondrivavy izay efa voahety sy avy nampandroana; samy manana rahavavy kambana ireo, ka tsy misy izay tsy tahaka izany.

7Menamena toa hasin’ampongabendanitra ireo takolakao anatin’ny voalinao.

8Mpanjakavavy enimpolo no an’ny mpanjaka, valopolo ny vaditsindranony ary tsy hita isa ny zatovovaviny;

9fa vehivavy iray ihany no voromahailalako, dia ilay voromahailalako tsy misy tomika, vavitokan’ny reniny sady zanany tiany indrindra. Ireo vehivavy hafa izay mahita azy dia manambara azy hoe sambatra; ary ny mpanjakavavy sy ny vaditsindrano dia samy midera azy manao hoe:

10«Fa iza moa io vehivavy io izay manjelanjelatra toy ny maraina sady tsara tarehy toy ny volana sy mamirapiratra toy ny masoandro ary mahatalanjona toa andian-kintana?»

11Midina ao an-jaridainam-boankazo aho hijery ny tsirim-boly eny an-dohasaha sy hizaha raha mitsimoka ny voaloboka na mamony ny ampongabendanitra.

12Kanefa tsy ampoimpoiziko ny nanjo ahy; fa nahatonga ahy hatahotahotra ianao, ry ilay vehivavy mpiray firenena amiko sady zanakavavin’olom-banona.

← Chapter 5 Jump to: Chapter 7 →