Hosea 4

Malagasy (Baiboly Protestanta Malagasy 2011)

← Chapter 3 Jump to: Chapter 5 →

1Mihainoa ny tenin’NY TOMPO, ianareo Zanak’Israely! Fa manana ady amin’ny mponina amin’ny tany NY TOMPO satria tsy misy fahamarinana, na fitiavana na fahalalana an’Andriamanitra eo amin’ny tany,

2fa fanozonana sy lainga, famonoana sy halatra ary fijangajangana kosa; eny, manao an-keriny izy ary tsy mitsahatra ny mandatsa-dra.

3Noho izany dia mitomany ny tany ary reraka izay rehetra mitoetra ao aminy mbamin’ny bibidia sy ny voromanidina; eny, na dia ny hazandrano any anaty ranomasina aza dia ringana koa.

4Kanefa aza misy miampanga na manome tsiny fa ny olonao dia efa tahaka ireo mifamaly amin’ny mpisorona.

5Ho tafintohina antoandro ianao; ny mpaminany koa dia hiara-tafintohina aminao amin’ny alina, ary hovonoiko ny reninao.

6Ringana ny oloko noho ny tsy fisian’ny fahalalana. Satria nandà ny fahalalana ianao, dia mba holaviko kosa tsy ho mpisoroko intsony; nanadino ny lalànan’Andriamanitrao ianao, ka mba hohadinoiko kosa ny zanakao.

7Arakaraka ny nitomboany no nanotany Tamiko ka hampodiko ho henatra kosa ny voninahiny.

8Mamoky tena amin’ny fanatitra fanadiovana izay aterin’ny oloko izy ireo, ka satriny ihany ho diso ny olona.

9Ho sahala ihany ny hanjo ny olona sy ny mpisorona; hovaliako noho ny lalany izy, ary hatsingeriko aminy ny nataony.

10Koa hihinana izy nefa tsy ho voky, hijangajanga izy nefa tsy hitombo isa satria efa tsy nahoany intsony NY TOMPO.

11Fijangajangana sy divay ary ranom-boaloboka no mahavery ny saina.

12Mila saina amin’ny tapa-kazony ny oloko ary ny tehiny no miteny aminy; fa ny fanahim-pijangajangana no nampania azy; mijangajanga izy ka manalavitra an’Andriamaniny.

13Eny an-tampon’ny tendrombohitra no amonoany zavatra hatao fanatitra; eny amin’ny havoana no andoroany ditin-kazo manitra, dia eny ambanin’ny hazo oaka sy ny hazo kesika ary ny hazo terebinta izay tsara alokaloka! Koa izany no ijejojejoan’ny zanakavavinareo sy ijangajangan’ny vinantovavinareo.

14Tsy hamaly ny zanakavavinareo Aho raha mijejojejo izy, na ny vinantovavinareo raha mijangajanga izy, fa ny tenany aza dia mitokana mankany amin’ny mpijangajanga sady mamono zavatra hatao fanatitra miaraka amin’ireo mpijangajanga ho fanompoan-tsampy. Tsy ho vanona ny firenena tsy misaina.

15Na dia mijangajanga aza ianao, ry Israely, aoka tsy mba hanota ny Joda; aza mankany Gilgala ianareo na miakatra any Bety-Avena; ary aza mianiana hoe: Raha velona koa NY TOMPO!

16Fa maditra toy ny vantotra ombivavy maditra ny Israely; koa ankehitriny dia handrasan’NY TOMPO toy ny zanak’ondry eny amin’ny malalaka izy.

17Lasa mpiombona amin’ny sampy i Efraima; aoka izy ho eo!

18Raha vao mitsahatra ny fibobohany divay dia tsy manao afa-tsy ny mijangajanga izy. Mankasitraka fahafaham-baraka ireo mpitondra azy.

19Voapaoky ny elatry ny rivotra izy ka ho menatra noho ny zavatra novonoiny hatao fanatitra.

← Chapter 3 Jump to: Chapter 5 →