Psalms 65

Malayalam (BSI) 2016 (സത്യവേദപുസ്തകം C.L. (BSI))

← Chapter 64 Jump to: Chapter 66 →

1ഗായകസംഘനേതാവിന്; ദാവീദിന്‍റെ സങ്കീര്‍ത്തനം [1] ദൈവമേ, സീയോനില്‍ വസിക്കുന്ന അങ്ങയെ സ്തുതിക്കുന്നത് ഉചിതമല്ലോ. അങ്ങേക്കുള്ള നേര്‍ച്ചകള്‍ ഞങ്ങള്‍ നിറവേറ്റും.

2പ്രാര്‍ഥന കേള്‍ക്കുന്ന ദൈവമേ, സര്‍വമനുഷ്യരും തങ്ങളുടെ പാപഭാരവുമായി തിരുസന്നിധിയില്‍ വരുന്നു.

3ഞങ്ങളുടെ അതിക്രമങ്ങള്‍ ഞങ്ങളെ കീഴടക്കുമ്പോള്‍, അവിടുന്ന് അവ തുടച്ചുനീക്കുന്നു.

4അവിടുത്തെ ആലയത്തിന്‍റെ അങ്കണത്തില്‍ പാര്‍ക്കാന്‍, അവിടുന്നു തിരഞ്ഞെടുത്തു കൊണ്ടുവന്ന ജനം അനുഗൃഹീതര്‍. ഞങ്ങള്‍ അവിടുത്തെ ആലയത്തില്‍നിന്ന്, വിശുദ്ധമന്ദിരത്തില്‍നിന്നു തന്നെ, ലഭിക്കുന്ന അനുഗ്രഹങ്ങള്‍കൊണ്ടു തൃപ്തരാകും.

5ഞങ്ങളെ രക്ഷിക്കുന്ന ദൈവമേ, അവിടുന്നു ഞങ്ങള്‍ക്കുവേണ്ടി അദ്ഭുതങ്ങള്‍ പ്രവര്‍ത്തിച്ചു. ഞങ്ങളുടെ അപേക്ഷ കേട്ട് ഞങ്ങളെ വിടുവിച്ചു. അവിടുന്നാണ് സര്‍വഭൂമിയുടെയും വിദൂരത്തുള്ള സമുദ്രങ്ങളുടെയും പ്രത്യാശ.

6അവിടുന്നു സ്വശക്തിയാല്‍ പര്‍വതങ്ങളെ ഉറപ്പിച്ചു നിര്‍ത്തിയിരിക്കുന്നു. അവിടുന്നു ശക്തി ധരിച്ചിരിക്കുന്നു.

7ആഴിയുടെ മുഴക്കവും തിരമാലകളുടെ ഗര്‍ജനവും അവിടുന്നു ശമിപ്പിക്കുന്നു. വിജാതീയരുടെ കലഹം അവിടുന്ന് ഇല്ലാതാക്കുന്നു.

8ഭൂമിയുടെ വിദൂരസീമകളില്‍ വസിക്കുന്നവരും അവിടുത്തെ അദ്ഭുതപ്രവൃത്തികള്‍ കണ്ടു ഭയപ്പെടുന്നു. ഭൂമിയുടെ കിഴക്കുമുതല്‍ പടിഞ്ഞാറേ അറ്റം വരെയുള്ളവര്‍, അവിടുത്തെ പ്രവൃത്തികള്‍ കണ്ടു ഘോഷിച്ചുല്ലസിക്കുന്നു.

9അവിടുന്നു മഴ പെയ്യിച്ച് ഭൂമിയെ പരിരക്ഷിക്കുന്നു. അങ്ങ് അതിനെ അത്യധികം ഫലപുഷ്ടമാക്കുന്നു. ദൈവത്തിന്‍റെ നദി നിറഞ്ഞൊഴുകുന്നു. അവിടുന്നു ഭൂമിയെ ഒരുക്കി അവര്‍ക്കു ധാന്യം നല്‌കുന്നു.

10അവിടുന്നു സമൃദ്ധമായ മഴ നല്‌കി അതിന്‍റെ ഉഴവുചാലുകളെ നനയ്‍ക്കുന്നു. അവിടുന്നു കട്ട ഉടച്ചു നിരത്തുകയും മഴ പെയ്യിച്ച് അതിനെ കുതിര്‍ക്കുകയും ചെയ്യുന്നു. അവിടുന്നു ചെടികള്‍ മുളപ്പിച്ച് അതിനെ അനുഗ്രഹിക്കുന്നു.

11സമൃദ്ധമായ വിളവുകൊണ്ട് അവിടുന്നു സംവത്സരത്തെ കിരീടം അണിയിക്കുന്നു. അവിടുന്നു കടന്നുപോകുന്ന പാതകളിലെല്ലാം സമൃദ്ധി വര്‍ഷിക്കുന്നു.

12മരുഭൂമിയിലെ പുല്‍പ്പുറങ്ങള്‍ സമൃദ്ധിയായി വളരുന്നു. കുന്നുകള്‍ ആനന്ദമണിയുന്നു.

13മേച്ചില്‍പ്പുറങ്ങള്‍ ആട്ടിന്‍പറ്റങ്ങളെക്കൊണ്ട് നിറഞ്ഞിരിക്കുന്നു. താഴ്വരകള്‍ ധാന്യംകൊണ്ടു മൂടിയിരിക്കുന്നു. അവ സന്തോഷംകൊണ്ടു ഘോഷിച്ചുല്ലസിക്കുന്നു.

← Chapter 64 Jump to: Chapter 66 →