Song of Solomon 6

Malayalam (BSI) 2016 (സത്യവേദപുസ്തകം C.L. (BSI))

← Chapter 5 Jump to: Chapter 7 →

1പെണ്‍കൊടികളില്‍ അതിസുന്ദരീ, നിന്‍റെ പ്രിയന്‍ എവിടെപ്പോയി? ഏതു വഴിക്കാണ് അവന്‍ പോയത്? ഞങ്ങളും നിന്നോടൊത്ത് അവനെ തിരയാം.

2എന്‍റെ പ്രിയന്‍ ആടുകളെ മേയ്‍ക്കാനും ലില്ലിപ്പൂക്കള്‍ പറിക്കാനും തന്‍റെ ഉദ്യാനത്തിലേക്കു പോയി, സുഗന്ധസസ്യങ്ങളുടെ തടങ്ങളിലേക്ക് ഇറങ്ങിപ്പോയി.

3ഞാന്‍ എന്‍റെ പ്രിയതമന്‍റേതാണ്; അവന്‍ എന്‍റേതും. അവന്‍ ലില്ലിപ്പൂക്കളുടെ ഇടയില്‍ ആടു മേയ്‍ക്കുന്നു.

4എന്‍റെ പ്രിയേ, നീ തിര്‍സാ നഗരിപോലെ സുന്ദരി; യെരൂശലേംപോലെ മനോഹരി, പതാകകള്‍ വഹിച്ചുകൊണ്ടു വരുന്ന സൈന്യംപോലെ നീ ഭയദായിനി.

5നിന്‍റെ നോട്ടം എങ്കല്‍നിന്നു പിന്‍വലിക്കുക; അത് എന്നെ അസ്വസ്ഥനാക്കുന്നു. നിന്‍റെ കാര്‍കൂന്തല്‍, ഗിലെയാദു മലഞ്ചെരിവിലൂടെ ഇറങ്ങിവരുന്ന കോലാട്ടിന്‍നിര പോലെയാണ്.

6നിന്‍റെ ദന്തനിര കുളിച്ചു കയറി വരുന്ന ചെമ്മരിയാട്ടിന്‍പറ്റംപോലെ വെണ്‍മയുള്ളതാണ്; അവ ഒന്നൊഴിയാതെ എല്ലാം നിരയൊത്തിരിക്കുന്നു.

7നിന്‍റെ കവിള്‍ത്തടങ്ങള്‍ മാതളപ്പഴപ്പാതികള്‍ പോലെ മൂടുപടത്തിനുള്ളില്‍ ശോഭിക്കുന്നു.

8അറുപതു രാജ്ഞിമാരും എണ്‍പതു ഉപനാരിമാരും എണ്ണമറ്റ തരുണികളും രാജാവിനുണ്ട്.

9എന്നാല്‍ എന്‍റെ പ്രാവ് ഒരുവള്‍ മാത്രം; അവള്‍ കുറ്റമറ്റവള്‍, അമ്മയുടെ ഓമനമകള്‍, ഉദരത്തില്‍ വഹിച്ചവളുടെ അഭിമാനം; പെണ്‍കൊടികള്‍ അവളെ ഭാഗ്യവതി എന്നു വിളിച്ചു; രാജ്ഞിമാരും ഉപനാരിമാരും അവളെ പുകഴ്ത്തി.

10ഉഷശ്ശോഭ ചൊരിയുന്ന ഇവള്‍ ആര്‍? ചന്ദ്രനെപ്പോലെ സൗന്ദര്യം തികഞ്ഞ ഇവള്‍ ആര്‍? സൂര്യതേജസ്സു വിതറുന്ന ഇവള്‍ ആര്‍? പതാകയേന്തിയ സൈന്യനിരപോലെ ഭയദായിനിയായ ഇവള്‍ ആര്‍?

11പൂത്തുലയുന്ന താഴ്വര കാണാന്‍, മുന്തിരിവള്ളി മൊട്ടിട്ടോ എന്നും, മാതളം പൂത്തോ എന്നും നോക്കാന്‍, ഞാന്‍ ബദാംതോട്ടത്തിലേക്ക് ഇറങ്ങിച്ചെന്നു.

12ഞാനറിയാതെതന്നെ മനോരഥം എന്നെ നാഥന്‍റെ സന്നിധിയില്‍ എത്തിച്ചു.

13ഹേ, ശൂലേംകുമാരീ, മടങ്ങിവരൂ, മടങ്ങിവരൂ; ഞങ്ങള്‍ നിന്നെ ഒന്നു കാണട്ടെ, മടങ്ങിവരൂ, മടങ്ങിവരൂ; രണ്ടു സൈന്യങ്ങള്‍ക്കിടയില്‍, നൃത്തം ചെയ്യുന്നവളെ എന്നപോലെ നിങ്ങളെന്തിനു ശൂലേംകാരിയെ നോക്കുന്നു?

← Chapter 5 Jump to: Chapter 7 →