Joshua 20

Malayalam Bible (OV-BSI) 2016 (സത്യവേദപുസ്തകം OV Bible (BSI))

← Chapter 19 Jump to: Chapter 21 →

1പിന്നെ യഹോവ യോശുവയോട് അരുളിച്ചെയ്തത്:

2നീ യിസ്രായേൽമക്കളോടു പറയേണ്ടത് എന്തെന്നാൽ: അറിയാതെ അബദ്ധവശാൽ ഒരാളെ കൊന്നുപോയവന്‍ ഓടിപ്പോയി ഇരിക്കേണ്ടതിന് ഞാന്‍ മോശെ മുഖാന്തരം നിങ്ങളോടു കല്പിച്ച സങ്കേതനഗരങ്ങള്‍ നിശ്ചയിപ്പിന്‍.

3രക്തപ്രതികാരകന്‍ കൊല്ലാതിരിപ്പാന്‍ അവ നിങ്ങള്‍ക്ക് സങ്കേതമായിരിക്കേണം.

4ആ പട്ടണങ്ങളിൽ ഒന്നിലേക്ക് ഓടിച്ചെല്ലുന്നവന്‍ പട്ടണത്തിന്‍റെ പടിവാതിൽക്കൽ നിന്നുകൊണ്ട് തന്‍റെ കാര്യം പട്ടണത്തിലെ മൂപ്പന്മാരെ അറിയിക്കുകയും അവര്‍ അവനെ പട്ടണത്തിൽ കൈക്കൊണ്ട് തങ്ങളുടെ ഇടയിൽ പാര്‍ക്കേണ്ടതിന് അവന് ഒരു സ്ഥലം കൊടുക്കയും വേണം.

5രക്തപ്രതികാരകന്‍ അവനെ പിന്തുടര്‍ന്നു ചെന്നാൽ കൊലചെയ്തവന്‍ മനസ്സറിയാതെയും പൂര്‍വദ്വേഷം കൂടാതെയും തന്‍റെ കൂട്ടുകാരനെ കൊന്നുപോയതാകയാൽ അവര്‍ അവനെ അവന്‍റെ കൈയിൽ ഏല്പിക്കരുത്.

6അവന്‍ സഭയുടെ മുമ്പാകെ വിസ്താരത്തിനു നില്ക്കുംവരെയോ അന്നുള്ള പുരോഹിതന്‍റെ മരണംവരെയോ ആ പട്ടണത്തിൽ പാര്‍ക്കേണം; അതിന്‍റെശേഷം കൊലചെയ്തവന് താന്‍ വിട്ടോടിപ്പോന്ന സ്വന്തപട്ടണത്തിലേക്കും തന്‍റെ വീട്ടിലേക്കും മടങ്ങിച്ചെല്ലാം.

7അങ്ങനെ അവര്‍ നഫ്താലിമലനാട്ടിൽ ഗലീലയിലെ കേദെശും എഫ്രയീംമലനാട്ടിൽ ശെഖേമും യെഹൂദാമലനാട്ടിൽ ഹെബ്രോന്‍ എന്ന കിര്യത്ത്-അര്‍ബ്ബയും

8കിഴക്ക് യെരീഹോവിനെതിരേ യോര്‍ദ്ദാനക്കരെ മരുഭൂമിയിൽ രൂബേന്‍ഗോത്രത്തിൽ സമഭൂമിയിലുള്ള ബേസെരും ഗിലെയാദിൽ ഗാദ്ഗോത്രത്തിൽ രാമോത്തും ബാശാനിൽ മനശ്ശെഗോത്രത്തിൽ ഗോലാനും നിശ്ചയിച്ചു.

9അബദ്ധവശാൽ ഒരുത്തനെ കൊന്നുപോയവന്‍ സഭയുടെ മുമ്പാകെ നില്ക്കുംവരെ രക്തപ്രതികാരകന്‍റെ കൈയാൽ മരിക്കാതെ ഓടിപ്പോയി ഇരിക്കേണ്ടതിന് യിസ്രായേൽമക്കള്‍ക്കൊക്കെയും അവരുടെ ഇടയിൽ വന്നുപാര്‍ക്കുന്ന പരദേശിക്കും വേണ്ടി നിശ്ചയിച്ച പട്ടണങ്ങള്‍ ഇവ തന്നെ.

← Chapter 19 Jump to: Chapter 21 →