Ecclesiastes 1

Mossi MPBU (WẼNNAAM SEBRE 2014)

Jump to: Chapter 2 →

1Woto yaa Koɛɛg soabã gomde. Yẽnda yaa a Davɩɩd biiga, n yaa Zeruzalɛm dĩma.

2Koɛɛg soabã yeelame yaa: «Zaalem woo zaalem, bũmb fãa yaa zaalem.

3Ninsaal sẽn maand tʋʋm nins fãa dũniyã zugã yõod bee yɛɛnẽ?

4Zamaan loogdame, tɩ zamaan a to wa, la dũniyã paada woto wakat fãa.

5Sõor pukdame, la wĩndg lʋɩtame, la a yãgdame n dat n ta zĩig ning a sẽn na n leb n pukã.

6Sebg kẽngda goabga, n wẽnemded n dabd rɩtgo. Sebgã gilgdame n gilgdẽ, la a lebd n dɩkda a pĩnd sorã n wẽnemdedẽ.

7Kʋɩlsã fãa koom zoetame n kẽngd ko-kãsengã pʋgẽ, la ko-kãsengã ka pit ye. A zoet n dabda zĩig ning ko-zoetem sẽn kẽngdẽ wã, n gilgdẽ n lebgd n wat be yɛsa.

8Bũmb fãa tʋʋmd yaa toogo. Ned goam ka sekd-a ye. Bũmb nins nin sẽn yãtã ka sekd-a ye, la tʋbr sẽn wʋmd bũmb ninsã ka sekd-a ye.

9Bũmb ning sẽn dag n zĩnd pĩndã n na n zĩndi. La bũmb ning sẽn dag n maan pĩndã n na n maane. Bõn-paalg ka be dũniyã zug ye.

10Bũmb beeme tɩ neb gomd a yell n yetẽ tɩ b ges bõn-paalg bɩ? Bũmb ning sẽn dag n zĩnd pĩndã n be tõnd zamaanẽ.

11B ka tẽegd bũmb nins sẽn dag n zĩnd pĩndã yell ye. La bũmb ning sẽn na n wa maanã, neb nins sẽn na n wa wã ka na n tẽeg bõn-kãens yell ye.»

12Maam a koɛɛg soab yɩɩ Israyɛll rĩm n zĩnd Zeruzalɛm.

13Mam tagsame n na n bao ne yam n bãng bũmb nins fãa sẽn maand saasã tẽngrã võore. Wẽnnaam dɩka tʋʋm toog n kõ ninsaalbã.

14Mam yãnda tʋʋm nins fãa sẽn maand saasã tẽngrã. Fãa yaa zaalem. Fãa yaa wa ned sẽn digd sobg bala.

15Bũmb ning sẽn golem ka tõe n tẽeg ye. La bũmb ning sẽn paoog ka tõe n sõd ye.

16Mam dag n tagsdame tɩ mam tara yam n yɩɩd neb nins fãa sẽn deng maam n soog Zeruzalɛmã. Mam yãnda yam la bãngr wʋsgo.

17Mam dag n tagsdame n dat n bãng yam ne zu-kaalgo, la yalemd võore. La mam mikame tɩ yõwã me yaa wa ned sẽn digd sobg bala.

18Bala, ned yam sã n waoogẽ, a tara sũ-sãang wʋsgo. La ned sẽn paasd a meng bãngre, a paasda a meng toogo.

Jump to: Chapter 2 →