Ecclesiastes 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Mam leb n tagsa neb nins b sẽn maand pãng dũniyã pʋg ka wã yelle. Gese, b sẽn namsd-b rãmbã nintãm yitame, la ned ka belsd bãmb ye. Bãmb namsdbã tara pãnga, la ned ka belsd bãmb ye.

2Maam, mam yetame tɩ neb nins sẽn ki wã tara sũ-noog n yɩɩd neb nins sẽn ket n vɩ wã.

3La ned ning sẽn nan ka be wã ne sẽn nan ka yãnd-a tʋʋm-wẽns nins sẽn maand dũniyã pʋg ka wã n são bãmb fãa.

4Mam yãndame tɩ tʋʋm nins fãa nebã sẽn maandã, la tõogr ning nebã sẽn tõogd b tʋʋmã pʋgã, yaa sũ-kiir la ned kam fãa maand ne a to. Woto me yaa zaalem, la a wẽnda wa ned sẽn digd sebgo.

5Yalem kalemdeda a nugu, la yaa a meng la a sãamda.

6Nug-pʋg pʋgẽ vʋʋsg n são nug pʋs a yiib pʋgẽ tʋʋmd sẽn wẽnd f sẽn digd sebgo.

7Mam leb n yãnda bũmb a to sẽn yaa zaalem dũniyã pʋga.

8Yaa ned sẽn yaa a yembr n ka tar doagd ye. Yẽnda ka tar bi-ribl wall ba-biig ye. La baoosgo, yẽnda tʋʋmdã ka tar tɛk ye. Yẽnda ninã ka tɩgd arzegs ye. Yaa ãnda yĩng la mam sẽn tʋmd n mongd m meng sũ-noog woto wã? Woto me yaa zaalem la a yaa tʋʋmd sẽn yaa wẽnga.

9Neb a yiib n são nin-yende. Bala, bãmb paamda b tʋʋmdã yõod sõama.

10Bãmb ned a yembr sã n lʋɩ, a to wã yikd-a lame. La nin-yend tara toogo. Bala, yẽnda sã n lʋɩ, ned a to ka be sẽn na n yik yẽnda ye.

11Woto me, neb a yiib sã n gãe ne taaba, b wɩngda taab yĩnsi. La ned sã n yaa a yembre, a na n yɩɩ wãn n wɩng a yĩnga?

12Ned sã n tar pãng n tõe n tõog nin-yende, b sã n yaa b yiibu, b tõogr yaa toogo. La wĩir sã n kal a tãabo, a ka tõe n kaoog nana ye.

13Biig sẽn yaa naong soab n tar yam n são rĩm-kʋdr sẽn yaa nin-yaalg n ka leb n deegd saglgo.

14Bala, ned tõe n yii bi-bees roog n lebg rĩmã, wa ned sẽn dog ne naam n yaool n yaa naong soab a meng soolmẽ wã.

15Mam yãnda nin-vɩɩs nins fãa sẽn kẽnd dũniyã pʋg ka wã tɩ b tũud biig ning sẽn na n wa reeg yembrã zĩig n lebg rĩmã.

16Neb nins fãa sẽn pʋgd-b yẽnda, tɩ yẽnda be b taoorã sõor yaa wʋsgo. Baoosgo, neb nins sẽn na n yaool n wa wã ka na n paam sũ-noog yẽnda yĩng ye. Woto me yaa zaalem la a wẽnda ned sẽn digd sebgo.

17Fo sã n dabd Wẽnnaam doogẽ wã, bɩ f maan gũusg ne f nao-kẽndre. Kolg n kelge, tɩ rẽ n são yalembã maand maanego. Bala, bãmb ka mi tɩ bãmb sẽn maandã yaa wẽng ye.

← Chapter 3 Jump to: Chapter 5 →