Ecclesiastes 5

Mossi MPBU (WẼNNAAM SEBRE 2014)

← Chapter 4 Jump to: Chapter 6 →

1Ra yɩ yãg-yãg n yiis gomd f noorẽ ye. Ra yɩ tao-tao n yiis f sũur tagsg gomd Wẽnnaam taoor ye. Bala, Wẽnnaam bee saasẽ, la fo bee dũniyã zugu. Dẽ wã, bɩ f ra gom wʋsg ye.

2Sɩd me, yɛl wʋsg tagsg sẽn wat ne zãmsdã, woto me, yaa goam wʋsgã pʋg la b bãngd yalem koɛɛg n bake.

3Fo sã n pʋlem Wẽnnaam bũmbu, bɩ f pids-a n da bas tɩ kaoos ye. Bala, nin-yaalg ka tat Wẽnnaam yam ye. Bɩ f pids pʋleng ning fo sẽn pʋlmã.

4Fo sẽn ka pʋlem n são fo sẽn na n pʋlem n yaool n ka pids ye.

5Ra sak tɩ f noor kɩt tɩ f maan yel-wẽnd ye, la f ra yeel b sẽn tʋm-a soab fo nengẽ wã tɩ fo rag n tudgame ye. Wẽnnaam sũur sã n puug ne fo koɛɛgã tɩ b sãam f nug tʋʋmdã, a yõod yaa bõe?

6Bala, zãmsd sã n yaa wʋsgo, yel-yaalsã me yaa wʋsgo. Woto me, goam sã n yaa wʋsgo yel-yaalsã me yaa wʋsgo. Dẽ wã, bɩ f zoe Wẽnnaam.

7Fo sã n yãnd tɩ b maand naong rãmb pãng soolem pʋgẽ, n ka maand sẽn zemse, la b ka kaood bʋʋd tɩrga, bɩ f ra bas tɩ bõn-kãng ling foom ye. Bala, ned sã n yaa nin-kãsenga, nin-kãseng n kogend yẽnda, la nin-kãsems a taab n be n yɩɩd bãmb fãa.

8Tẽn-gãongã yõod yaa nebã fãa yĩnga. Baa rĩm meng teega pʋʋg sẽn kõt bũmb ningã.

9Ned sã n nong ligdi, ligd ka sekd-a ye. Ned sã n nong naar wʋsgo, a ka na n paam paoong ye. Woto me yaa zaalem.

10Paoong sã n paasdẽ, a rɩtbã me sõor paasdame. Paoong yõod yaa bõe ne a soaadbã, sã n ka bãmb ninã sẽn getã bala?

11Tʋmtʋmd sã n tar dɩɩb bilf wall wʋsgo, a gõeem noom-a lame. La arzɛk soab tɩgrã ka basd-a t'a gũs ye.

12Mam yãnda toog sẽn wat ne namsg dũniyã pʋga. Yaa ned sẽn bĩngd arzegs sẽn na n wa ne toog a meng yĩnga.

13Yẽnda arzegsã tũnugda tʋʋm-beed n menem zãnga. Yẽnda sẽn dog bi-ribl ningã ka tar bũmb baa fɩ a nugẽ ye.

14Yẽnda sẽn dag n yi a ma pʋgẽ to-to wã, yẽnda na n leb n looga zaalem wa yẽnda sẽn dag n wa wã. Yẽnda ka na n tol n zã a tʋʋmã yõod baa a yembr n loog ye.

15Woto me leb n yaa toog sẽn wat ne namsgo. Yẽnda na n looga wa yẽnda sẽn dag n wa to-to wã. Bõe yõod la yẽnda na n paam a sẽn tʋmd sobg yĩngã pʋga?

16Sẽn paase, yẽnda vɩɩmã rayã fãa bee lik bida pʋga, la yẽnda paamda sũ-sãang wʋsgo, la yĩns toogo, la sũ-toogo.

17Ad mam sẽn yãnde: Mam yãndame t'a yaa sõama tɩ ned rɩ la a yũ, la a paam naar a tʋʋmã fãa yẽnda sẽn maand dũniyã zugã pʋga, hal a vɩɩmã Wẽnnaam sẽn kõ yẽnda wã tɛka. Yẽnda pʋɩɩr la woto.

18Baoosgo, Wẽnnaam sã n kõ ned arzegs la paoongo, la b leb n kõ-a pãn-tõog t'a tar n dɩtẽ, n tar a meng rẽnda, la a maand sũ-noog ne a tʋʋmdã, bõn-kãng yaa Wẽnnaam kũuni.

19Sɩd me, yẽnda ka na n tol n tags a vɩɩmã rasem sõor yell wʋsgo, Wẽnnaam sẽn kɩt tɩ yẽnda sũurã pid ne sũ-noogã yĩnga.

← Chapter 4 Jump to: Chapter 6 →